Jeremiya 38:1-28
38 Shefatiya mwana wa Metani, Gedhariya mwana wa Pashuri, Jukai mwana wa Sheremiya na Pashuri mwana wa Marikija vakazwa masoko a Jeremiya aaivhunja vandhu vese eciti:
2 “Jehovha anonanga kudari: ‘Mundhu wese anoenderera mberi ari mu dhorobha rino, anozofa ngo banga, njara no ndhendha. Asi mundhu wese anoenda koozvidira mu nyara jo Vakaradhiya anozoenderera mberi ecipona, wozowana upenyu hwake inga kafani,* wozorarama.’
3 Jehovha anoti: ‘Zvokadi dhorobha iri rinozodihwa mu nyara jo masoca a mambo wo Bhabhironi, iyena anozoritora.’”
4 Ngo kudaro, vatungamiriri vakaenda koovhunja mambo kudari: “Tapota, itanyi kuti mwanarume uwu aurawe, ngokuti masoko aya ari kurembesa masoca asara o mudhorobha rino kubatanijavo no vandhu vese. Mwanarume uwu aaripi kupsanga runyararo kuitira vandhu ava, asi ari kuda kuti vandhu ava vawihwe ngo matambujiko.”
5 Mambo Zedhekiya wakadavira kudari: “Iyena ari mu nyara jenyu, mambo apana caanokwanisa kuita kuti amuphingaije.”
6 Ngo kudaro, vakabata Jeremiya voenda komudira mu mwimbo wa* Marikija mwana wa mambo, wainga pa Ruvanje wo Varindiri. Ivona vakadereja Jeremiya kwenda mu mwimbo vecishandisa mapote. Mu mwimbo mainga mucina kumwa, asi mainga muno matope. Ngo kudaro, Jeremiya wakatanga kundondomera mu matope.
7 Ebhedhimereki mu Etiyopiya, wainga ngomwa* pa nyumba ya mambo, wakazwa kuti Jeremiya wadihwa mu mwimbo.* Mambo wainga akagara pa Musuvo wa Bhenjamini.
8 Ebhedhimereki paakabuda pa nyumba ya mambo, wakaenda kovhunja mambo kudari:
9 “Mambo wangu, zvaitari vanarume ava ku muporofeti Jeremiya zvakashata maningi! Ivona vamudira mu mwimbo,* iyena anozofiremo ngo ndava yo njara, ngokuti mudhorobha amucina pau.”
10 Mambo wakavhunja Ebhedhimereki mu Etiyopiya, masoko aya: “Torai makumatatu o vanarume vamuno, muende koovhisa muporofeti Jeremiya mu mwimbo* acito afa.”
11 Ngo kudaro, Ebhedhimereki wakatora vanarume vaya, vonghwina mu nyumba ya mambo, voenda mu ndau iri pasi po sara inovigihwa mare, ivona vakatora mapendera manganani no nguvo jokare, vojidereja mu mwimbo* mainga muna Jeremiya vecishandisa mapote.
12 Ebhedhimereki mu Etiyopiya wakavhunja Jeremiya kudari: “Dirai mapendera aya no nguvo iji jokare mumakhaja* ako kuti utame kukhuvazika ngo mapote.” Jeremiya wakaita zvondhozvo.
13 Ivona vakakweva Jeremiya ngo mapote vomuvhisa mu mwimbo.* Jeremiya wakaenderera mberi ari pa Ruvanje wo Varindiri.
14 Mambo Zedhekiya wakatuma vandhu kuti vaende kootora muporofeti Jeremiya vaviye naye kwaari pa musuvo wo citatu, wainga pa nyumba ya Jehovha. Mambo wakavhunja Jeremiya kudari: “Ndino zvandinoda kukuvhunjisa. Ucandifisira ciri cese.”
15 Jeremiya wakavhunja Zedhekiya kudari: “Kudari inini ndikamuvhunja, imwimwi zvokadi munozondiuraya. Kudari inini ndikamupangira, imwimwi amuzondizwiri.”
16 Ngo kudaro, mambo Zedhekiya wakapika kuna Jeremiya ngo cifise-fise eciti: “Ndinopika ngo zina ra Jehovha Mwari anopona, wiya wakatipari upenyu, inini andizokuurayi nee andizokudiri mu nyara jo vandhu ava vari kudari kukuuraya.”
17 Jeremiya wakavhunja Zedhekiya kudari: “Jehovha Mwari wo hondo, Mwari wo Vaiziraeri anoti: ‘Kudari iwewe ukaenda kojidira* mu nyara jo vatungamiriri va mambo wo Bhabhironi, iwewe auzourawi nee dhorobha iri arizopiswi ngo muriro. Iwewe no vandhu vo pamuzi pako amuzourawi.
18 Asi kudari iwewe ukatama kojidira mu nyara jo vatungamiriri va mambo wo Bhabhironi, dhorobha iri rinozodihwa mu nyara jo Vakaradhiya, ivona vanozoripisa ngo muriro. Iwewe auzopokonyoki mu nyara javo.’”
19 Mambo Zedhekiya wakavhunja Jeremiya kudari: “Inini ndiri kuthya Vajudha vakatizira ku divi ro Vakaradhiya. Ngokuti kudari ndikadihwa mu nyara javo, kangaije ivona vanozonditaja ngo njira yakashata maningi.”
20 Asi Jeremiya wakati: “Imwimwi amuzodihwi mu nyara javo. Ndapota, zwiranyi izwi ra Jehovha, itanyi zvandiri kumuvhunjari, imwimwi munozogara ushoni mozoenderera mberi mecipona.
21 Asi kudari imwimwi mukaramba kojidira mu nyara jo vatungamiriri va mambo wo Bhabhironi, Jehovha wakandikhombija zviro izvi:
22 Ndiri kuvona vanakaji vese vakasara vo pa nyumba ya mambo wo Judha vecitohwa veciendeswa ku vatungamiriri va mambo wo Bhabhironi, ivona vari kunanga kudari:
‘Vanarume vowaithembaya vakakucengeja, vokunyisa.
Ivona vakaita kuti soka jako jindondomere mu matope.
Wari uno, ivona vakufuratira vokutiza.’
23 Vakaji venyu vese no vana venyu vese vari kutohwa veciendeswa kuno Vakaradhiya, imwimwi amuzopokonyoki mu nyara javo, asi munozobathwa ndi mambo wo Bhabhironi. Ngo ndava yenyu kamare dhorobha iri rinozopiswa ngo muriro.”
24 Ngo kudaro, Zedhekiya wakavhunja Jeremiya kudari: “Ucaita kuti mundhu ari wese azive zviro zvese zvawanangari, kuti iwewe utame kufa.
25 Kudari vatungamiriri vakaziva kuti inini ndabhuya newe, voviya kokuvhunjisa kudari: ‘Tapota, tivhunjei zvawavhunja mambo. Ucatifisira ciri cese, itusu atizokuurayi. Mambo wakakuvhunjenyi?’
26 Iwewe unodikana kuvadavira kudari: ‘Inini ndaikumbira mambo kuti atame kundihwirija ku nyumba ya Jehonatani, kuti nditame kufira kondhoyo.’”
27 Pasure pa izvi, vatungamiriri vese vakaenda kuna Jeremiya vomuita muvhunjo. Iyena wakavavhunja zviro zvese zvaainga akavhunjwa ndi mambo. Ngo kudaro, ivona avazivi kuzomuvhunjisazve ciri cese, ngokuti apana na umwe wavo wainga akazwa mabhuyo avo.
28 Jeremiya wakaenderera mberi ari pa Ruvanje wo Varindiri mbhera pa njiku yakatohwa Jerusarema. Iyena wainga acindori pondhopo mbhera Jerusarema parakatohwa.
Masoko o Pasi
^ Kana: “anozopona.”
^ Kana: “sime ya.”
^ Kana: “mutungamiriri wo nyumba ya mambo.”
^ Kana: “sime.”
^ Kana: “sime.”
^ Kana: “sime.”
^ Kana: “sime.”
^ Vonanyi Kudurujihwa ko Magama.
^ Kana: “sime.”
^ Kana: “kojietha.”
