Jeremiya 39:1-18
39 Mu gore ro cipfumbamwe ro kutonga ka Zedhekiya mambo wo Judha, mu mweji wo cigumi, Nebhukadhinezari* mambo wo Bhabhironi no masoca ake ese vakaguma ku Jerusarema voritendeneja.
2 Pa njiku yo cipfumbamwe yo mweji wo cirongomuna wo gore ro gumi na rimwe ro kutonga ka Zedhekiya, ivona vakaphwanya muru* wo dhorobha.
3 Vatungamiriri vese va mambo wo Bhabhironi vakanghwina vogara pasi, pa Musuvo wo Pakati. Ivona vainga ava: Nerigari-sharizeri Musamigari, Nebho-sasekimu Murabhisarisi, Nerigari-sharizeri Murabhimagi* no vatungamiriri vamweni vese va mambo wo Bhabhironi.
4 Zedhekiya mambo wo Judha no masoca ese pavakavavona vakatiza. Ivona vakabuda mudhorobha co usiku vofamba ngo gwanja ro munda wa mambo, vonghwina ngo musuvo uri pakati po muru* muviri, voenda ngo gwanja ro ku Arabha.
5 Asi masoca o Vakaradhiya akavatevera mbhera owana Zedhekiya mu bani ro Jeriko. Ivona vakamutora voenda naye kuna Nebhukadhinezari* mambo wo Bhabhironi ku Ribhira mu nyika yo Hamati. Kondhoyo ndikona kwaakatonga zvaaidikana kuithwa.
6 Mambo wo Bhabhironi wakatuma vandhu kuti vaende koouraya vana va Zedhekiya ku Ribhira pamberi pake. Iyena wakatumazve vandhu kuti vaende koouraya vandhu vese vanoreremejwa vo ku Judha.
7 Ngo kudaro, iyena wakapofumaja majiso a Zedhekiya. Perepo wakamusunga ngo magaragajero o utare, womutora kwenda naye ku Bhabhironi.
8 Vakaradhiya vakapisa nyumba ya mambo no nyumba jo vandhu. Ivona vakaphwanya muru* jo Jerusarema.
9 Nebhuzaradhani mutungamiriri wo varindiri wakatora vandhu vamweni vainga vakasara mu dhorobha no vandhu vainga vakatizira kwaari woenda navo ku Bhabhironi. Iyena wakatorazve vandhu vainga vakatizira ku divi rake no vandhu vaya vainga vakapona.
10 Asi Nebhuzaradhani mutungamiriri wo varindiri wakasiya mu nyika yo Judha vandhu vanganani vainga vecitambujika maningi, vaya vainga vacina no ciro. Pa njiku yondhoyo, iyena wakavapa munda yo muuvha no munda imweni kuti varime.
11 Nebhukadhinezari* mambo wo Bhabhironi wakapa Nebhuzaradhani mutungamiriri wo varindiri ndhungamiriro iji ngo pamusoro pa Jeremiya:
12 “Mutorenyi mumukorondhe ushoni. Mucamuitira zvakashata. Itanyi zvese zvaanomukumbira.”
13 Nebhuzaradhani mutungamiriri wo varindiri, Nebhushazibhani Murabhisarisi, Nerigari-sharizeri Murabhimagi* no vatungamiriri vese va mambo wo Bhabhironi vakatuma vandhu
14 kuti vaende koovhisa Jeremiya pa Ruvanje wo Varindiri. Ivona vakamupa Gedhariya mwana wa Ahikami muzukuru wa Shafani kuti amutore aende naye kumuzi kwake. Ngo kudaro, Jeremiya waipona pakati po vandhu.
15 Paainga akafungihwa pa Ruvanje wo Varindiri, Jehovha wakabhuya na Jeremiya eciti:
16 “Endai, vhunjai Ebhedhimereki Muetiyopiya kudari: ‘Jehovha wo hondo Mwari wo Vaiziraeri anoti: “Ndiri kuita zviro zvandakananga kuti ndaizozviitira dhorobha iri. Ndinoda kuriviisira matambujiko kuciripi zviro zvaushoni. Pa njiku yondhoyo, iwewe unozovona izvi zveciitika.”’
17 “‘Asi inini ndinozokuponesa pa njiku yondhoyo,’ izvi ndizvona zvinonanga Jehovha, ‘iwewe auzodihwi mu nyara jo vandhu vaurikuthya.’
18 “‘Kunasa kunanga, inini ndinozokuponesa, iwewe auzourawi ngo banga. Iwewe unozoponesa upenyu hwako, ngokuti wakandithemba,’ izvi ndizvona zvinonanga Jehovha.”
Masoko o Pasi
^ Gama ngo Gama: “Nebhukadhirezari.” Aya ndiwona matarihwe amweni.
^ Kana: “mupfimbiji.”
^ Kana: “Mukuru-kuru wa vaya vanoita zvomasaramuso, (muzivi wo ndhondho).”
^ Kana: “mupfimbiji.”
^ Gama ngo Gama: “Nebhukadhirezari.” Aya ndiwona matarihwe amweni.
^ Kana: “mupfimbiji.”
^ Gama ngo Gama: “Nebhukadhirezari.” Aya ndiwona matarihwe amweni.
^ Kana: “Mukuru-kuru wa vaya vanoita zvomasaramuso, (muzivi wo ndhondho).”
