Jeremiya 4:1-31
4 “Iwewe Iziraeri, kudari ukahwirira,” izvi ndizvona zvinonanga Jehovha,“Kudari ukahwirira kwandiriWovhisa zvithombe zvako zvinonyagajisa pamberi pangu,Iwewe auzovi mundhu anogara ecitiza.
2 Kudari iwewe ukaita zviro zvokadi, zvakarurama no zvakarungama,Wopika weciti: ‘Ndiri kupika ngo zina ra Jehovha Mwari anopona!’
Ngo kudaro, vandhu vo majinja vanozokomborehwa ngo ndava yake,*Ivona vanozodada ngo ndava yake.”*
3 Ngokuti izvi ndizvona zvinonanga Jehovha ku vandhu vo Judha no Jerusarema:
“Rimanyi nyika jicizivi kurimwa,Mucaenderera mberi mecisima mbeu pakati po muzwa.
4 Imwimwi vandhu vo Judha no vagari vo Jerusarema,Jicenesenyi* pamberi pa Jehovha,Cenesanyi* mwoyo yenyu,Kuti ushungu hwangu utame kubwaka inga muriroWopisa mu njira yokuti apana anokwanisa kuujima,Ngo ndava yo zviito zvenyu zvakashata zvamunoita.”
5 Tokotesanyi izvi mu Judha, zvizivisenyi mu Jerusarema.
Khuwanyi no kurija mbhayapaya mu nyika yese.
Khuwisisanyi ngo izwi guru meciti: “Ungananyi,Ngatitize tiende ku madhorobha akavangiswa.
6 Musanyi citatijo cinokhombija gwanja rinoenda ku Ziyoni.
Mucagara makaima, psakanyi kokutizira,”Ngokuti ndiri kuviisa dambujiko kuvha kanjikazi, dambujiko rakakura.
7 Iyena wakabuda inga mbhondoro inobuda musora pa ndau painofindara;Muparaji o vandhu vo majinja ari kuviya.
Iyena wakabuda mu ndau yaanogara kuti aite kuti nyika yenyu ive ndau inothyisa.
Madhorobha enyu anozoparajwa, oita mathere acina vandhu.
8 Ngo kudaro, simiranyi mapendera o saku,Cemanyi no kucumba,Ngokuti ushungu unobwaka wa Jehovha uciri na itusu.
9 “Pa njiku yondhoyo,” izvi ndizvona zvinonanga Jehovha, “mambo anozoruza cicunge,*Vatungamiriri vanozoruzavo cicunge;Vapiri vanozothyavo maningi, vaporofeti vanozotama zvokuita.”
10 Ngo kudaro, inini ndakati: “Yowee, Mambo Mukuru-kuru Jehovha! Kunasa kunanga, imwimwi makacengeja vandhu ava vo Jerusarema pamakati: ‘Imwimwi munozova no runyararo,’ pamukuvo wokuti banga riri padokoriro redu.”
11 Pa mukuvo wondhowo, vandhu ava no vandhu vo Jerusarema vanozovhunjwa kudari:
“Mbhepo inopisa maningi inobuda kuvha kuzvimatundhu zvicina sora zvo mucipareInozovhunguza vandhu vangu;*Iyona airipi kuviya kouruja* tirigu nee koocenesa mucece.
12 Mbhepo iri kuviya ngo simba yecivha kondhoyo, mukuzwirana no zvandakananga.
Wari inini ndinozozivisa kutonga kwandinoda kuvaita.
13 Vonai! Muvengi anozoviya inga makore o nvura,Ngoro jake jo hondo jakaita inga dutu.
Haci jake jinogogoma maningi kupinda hokotora.
Nyathwa kwatiri, ngokuti tapera kuparajwa!
14 Iwewe Jerusarema sukai ushati wo mwoyo wako, kuti uponeswe.
Unozoenderera mberi wecirangarira zvakashata mbhera rini?
15 Ngokuti izwi riri kuviisa masoko kuvha ku Dhani,Kunja kwa izvi, riri kuzivisa dambujiko kuvha kumatundhu a Efraimi.
16 Vhunjanyi izvi majinja;Zvizivisenyi ku Jerusarema.”
“Varindiri* vari kuviya vecivha ku nyika yo ndhambo,Vanozokhuwira madhorobha o Judha.
17 Ivona vanozotendeneja dhorobha ro Jerusarema mu mativi ese inga varindiri vanongwarira munda,Ngokuti irona arizivi kundizwira,” izvi ndizvona zvinonanga Jehovha.
18 “Mufambiro wako no zviito zvako zvinozokuwira.
Dambukijo rako rakakura maningi,Ngokuti irona raguma mbhera mu mwoyo mako!”
19 Yowee, maiwee! Yowee maiwee!
Ndiri kuhwajihwa maningi mu mwoyo mangu.
Mwoyo wangu uri kutaka ngo simba.
Andikwanisi kuenderera mberi ndakanyarara.
Ngokuti ndazwa kurira ko mbhayapaya,Kurira ko mbhayapaya ko hondo.
20 Paiziviswa masoko o dambujiko pasure po dambujiko rimweni,Ngokuti nyika yese iri kuparajwa.
Tende jangu japera kuparajwa ngo civhumbu,Ngo kukasika nguvo jo tende yangu japera kumweka.
21 Ndinozoenderera mberi ndecivona citatijo cinokhombija gwanja rinoenda ku Ziyoni mbhera rini?
Ndinozoenderera mberi ndecizwa kurira ko mbhayapaya mbhera rini?
22 Ngokuti vandhu vangu mapenji;Ivona avandireremeji.
Ivona ivana vacina hwiru, avakwanisi kuzwisisa.
Ivona vakangwara* maningi pakuita zviro zvakashata,Asi avakwanisi kuita zviro zvakanaka.
23 Ndakasota nyika yavo, iyona yainga icina ciro, yaaita inga bani.
Ndakasota kumatenga kwainga kucinazve ruvheneko.
24 Ndakasota matundhu, ndovona kuti iwona aitetemera.
Ndakasota zvimatundhu, izvona zvaitetemera.
25 Ndakasota, ndovona kuti painga pacinazve no mundhu,Shiri jese jainga japera kutiza.
26 Ndakasota ndovona kuti munda wo mucero wainga waacipare,Madhorobha ayo ese ainga apera kuphwanyiwa.
Izvi zvakaizwa ndi Jehovha.
Ngo ndava yo ushungu hwake hunobwaka.
27 Ngokuti Jehovha anonanga kudari: “Nyika iyi aizogari no vandhu,Asi andizoiparaji mukuperera.
28 Ngo kudaro, nyika iyi inozocema,Matenga anozoita cidima.
Ngokuti inini ndakazvinanga, ndosunga kuzviita,Inini andizocinji murangariro wangu, nee andizohwiriri sure.
29 Pavakazwa musindo wo vapakiri vo haci no wo vandhu vanofura ngo uta,Vandhu vese vomudhorobha vakatiza.
Vandhu vakatizira mugwasha,Vofindara mu mapuwe.
Madhorobha ese akasiiwa,Apacina no ari wese anogaremo.”
30 Iwewe wari wapera kuparajwa, waro unoda kuitenyizve?
Iwewe waisimira nguvo jakanaka maningi,Iwewe waijisejesa ngo zvinemeso zvo goridhi,Waisejesa majiso ako ngo tinta yokusvipa.
Wakajisejesa biresi ngokuti vaya vaikuda, vakakuramba;Wari ivona vari kuda kukuuraya.
31 Ndiri kuzwa kugomera inga kugomera ko mwanakaji ari kuhwaja,Ndiri kuzwa kukhuwa inga kukhuwa ko mwanakaji ari kubara mwana wake wokutanga,Ndiri kuzwa izwi ro kufemeruka ro mwana wokaji wo Ziyoni.
Iyena anotambanuja nyara onanga kudari:
“Khombo kwandiri ngokuti ndaremba ngo ndava yo vandhu ava vanouraya!”
Masoko o Pasi
^ Zvinoreva: “Jehovha.”
^ Zvinoreva: “Jehovha.”
^ Gama ngo Gama: “Jisokenyi.”
^ Gama ngo Gama: “Vhisanyi ganda ro mwoyo wenyu.”
^ Kana: “mwoyo wa mambo unozothya.”
^ Gama ngo Gama: “mwana wokaji wo vandhu vangu.”
^ Kana: “kourusa.”
^ Gama ngo Gama: “Vavonereri.” Zvinoreva vaya vanogara vakasota dhorobha kuti vazive nguva yokurihwisa.
^ Kana: “vano uzivi.”
