Jeremiya 40:1-16
40 Jehovha wakabhuya na Jeremiya, Nebhuzaradhani mungwariri wo varindiri paakapera kusujunura Jeremiya mu Rama. Jeremiya wainga wakasungwa paakatohwa kwenda kondhoyo. Iyena wainga pakati po vandhu vese vaiendeswa ku uranda vaivha ku Jerusaremano ku Judha vecienda ku Bhabhironi.
2 Mutungamiriri wo varindiri wakatora Jeremiya womuvhunja kudari: “Jehovha Mwari wako wakananga matambujiko aya ngo pamusoro po ndau iyi.
3 Jehovha waviisa matambujiko aya mukuzwirana no zvaakananga. Ngokuti imwimwi makashaishira Jehovha, amuzivi kuzwira zvaakananga. Ndizvona zvakaitisa kuti izvi zvimuitikire.
4 Wari inini ndiri kusujunura njinga jakasungari nyara jako. Kudari iwewe ukavona kuti zvakanaka kwenda na inini ku Bhabhironi, ngatende, inini ndinozokukorondha. Asi kudari ucikadi kwenda na inini ku Bhabhironi, ucaviya. Vonai, nyika yese iyi iri pamberi pako, endai kwiya kwaunovona kuti kwakanaka.”
5 Jeremiya acito amufuratira kuti apinde, Nebhuzaradhani wakati: “Endai kuna Gedhariya mwana wa Ahikami muzukuru wa Shafani uwo wakagajwa ndi mambo wo Bhabhironi kuti ave mutungairiri wo madhorobha o Judha. Iwewe garai naye pakati po vandhu kana ungaenda kwaunovona kuti kwakanaka.”
Mutungamiriri wo varindiri wakamupa zvokuha no cipo womusiya kuti apinde.
6 Ngo kudaro, Jeremiya wakaenda kuna Gedhariya mwana wa Ahikami ku Mizipa. Wakagara naye pakati po vandhu vainga vakasara munyikemo.
7 Pakufamba ko nguva, vatungamiriri vese vo masoca vainga munyikemo no vanarume vavo vakazwa kuti mambo wo Bhabhironi wainga wagaja Gedhariya mwana wa Ahikami munyikemo. Iyena waizotungamirira vanarume, vanakaji no vana vadoko vainga varombo munyikemo, avo vainga vacizivi kutohwa kwendeswa ku Bhabhironi.
8 Ngo kudaro, ivona vakaenda kuna Gedhariya ku Mizipa. Kondhoyo kwainga kuna Ishimaeri mwana wa Netaniya; Johanaa na Jonatani vana va Kareya; Seraya mwana wa Tanihumeti; vana va Efai Munetofa, Jezaniya mwana wa Maakati pamwepo no vanarume vavo vese.
9 Gedhariya mwana wa Ahikami muzukuru wa Shafani wakaita mbhiko pamberi pavo no po vanarume vavo veciti: “Mucathya kwenda koshandira Vakaradhiya, garanyi mu nyika mecishandira mambo wo Bhabhironi. Zviro zvese zvinozomufambira ushoni.
10 Asi inini ndinozoenderera mberi ndecigara mu Mizipa kuti ndimuimirire pamberi po Vakaradhiya vanozoviya kwatiri. Asi imwimwi diranyi mu mujiyo mwenyu, mamunovigira zviro, vhinyu, mucero inoivha pa mukuvo wo cirimo no mafuta. Perapo garanyi mu madhorobha omakatora.”
11 Vajudha vese vaigara ku Mowabhi, ku Amoni, ku Edhomi no vamweni vainga mu nyika jimweni jese vakazwavo kuti mambo wo Bhabhironi wakaita kuti vandhu vamweni vasare vecigara Mujudha. Iyena wakagajavo Gedhariya mwana wa Ahikami muzukuru wa Shafani kuti ave mutungamiriri wavo.
12 Vajudha vese vakatanga kuviya vecivha mu ndau javainga vakandhandhanikira vecinghwina mu nyika yo Judha. Vakaenda kuna Gedhariya mu Mizipa. Ivona vakabojera mucero jo mukuwo wo cirimo jakawanda maningi voita vhinyu yakawanda maningi.
13 Johanaa mwana wa Kareya no vatungamiriri vese vo masoca vainga mu nyika, vakaenda kuna Gedhariya ku Mizipa.
14 Ivona vakamuvhunja kudari: “Imwimwi amuzvizivi kani kuti Bhaharisi mambo wo Vaamoni watuma Ishimaeri mwana wa Netaniya kuti aviye kuzomuuraya?” Asi Gedhariya mwana wa Ahikami aazivi kutenda zvavainangaro.
15 Ngo kudaro, Johanaa mwana wa Kareya wakavhunja Gedhariya ku Mizipa ngo cifise-fise kudari: “Ndinoda kwenda kouraya Ishimaeri mwana wa Netaniya apana anodikana kuzviziva. Ngokuti ngenyi iyena ari kuda kumuuraya? Ngenyi vandhu vese vo Judha vari kuungana na imwimwi vangada kundhandhaniswa? Ngenyi Vajudha vese vakasara vanodikana kuurawa?”
16 Asi Gedhariya mwana wa Ahikami wakavhunja Johanaa mwana wa Kareya kudari: “Ucaita zviro zvakadaro, ngokuti zvauri kunangaro ngo pamusoro pa Ishimaeri ngo zvokunyepa.”
