Jeremiya 41:1-18
41 Pa mweji wo cinomwe, Ishimaeri mwana wa Netaniya mwana wa Erishama, uwo wainga umwe wo mubarihwana wo cigaro co umambo, ari umwe wo mutungamiriri wo nyumba ya mambo, wakaenda no gumi ro vanarume vamweni kuna Gedhariya mwana wa Ahikami mu Mizipa. Pavainga veciha vese mu Mizipa,
2 Ishimaeri mwana Netaniya no gumi ro vanarume vaainga navo, vakamuka vouraya Gedhariya mwana wa Ahikami muzukuru wa Shafani ngo banga. Ngo kudaro, ivona vakauraya wiya wainga wakagajwa ndi mambo wo Bhabhironi kuti atungamirire nyika.
3 Ishimaeri wakaurayazve Vajudha vese vainga na Gedhariya mu Mizipa, kubatanijavo no masoca ese o Vakaradhiya vainga mondhomo.
4 Pa njiku yo cipiri pasure po kufa ka Gedhariya, pacito pava no mundhu ari wese waiziva ngo pamusoro po kufa kwake,
5 pakaguma makumasere o vanarume vaivha ku Shekemi, ku Shiro no Samariya. Ivona vainga no ndevhu jakapahwa no nguvo jakamweka, vaingazve vakazviceka-ceka muviri javo, mu nyara mavo mainga muno zvipo zvo mucece no oribhano, vecizviviisa ku nyumba ya Jehovha.
6 Ngo kudaro, Ishimaeri mwana wa Netaniya, wakaenda koosongana navo mu Mizipa, ecifamba ecicema. Paakasongana navo, iyena wakavavhunja kudari: “Ngatende kuna Gedhariya mwana wa Ahikami.”
7 Asi povakanghwina mu dhorobha, Ishimaeri mwana wa Netaniya no vanarume vake, vakavauraya vovakhandira mu mwimbo.
8 Asi pakati pavo painga pano vanarume vakavhunja Ishimaeri kudari: “Ucatiuraya, ngokuti itisu tino tirigu, sevhadha, mafuta no uci wakavigwa mu munda.” Ngo kudaro, iyena aazivi kuvauraya inga zvaakaita no hama javo.
9 Ishimaeri wakakhandira mu mwimbo wakakura mutembo jo vandhu vese vaainga akauraya, mwimbo uwu wainga wakaithwa* ndi mambo Aza ngo ndava ya Bhahasha mambo wo Iziraeri. Ndiwona mwimbo uwu wakashandiswa ndi Ishimaeri mwana wa Netaniya, wouzaja ngo mutembo* jo vandhu vakafa.
10 Ishimaeri wakaendesa kuuranda vandhu vese vainga vakasara mu Mizipa, kubatanijavo no vana vokaji va mambo no vamweni vese vainga vakasiiwa mu Mizipa. Nebhuzaradhani mutungamiriri wo varindiri wakatora vandhu ava, ovapa Gedhariya mwana wa Ahikami kuti avangwarire. Ishimaeri mwana wa Netaniya wakapinda navo kuuranda ecidarika ngo mu nyika yo Vaamoni.
11 Johanaa mwana wa Kareya no vatungamiriri vake vese vo masoca vaainga navo, pavakazwa zvishaishi zvese zvakaitwa ndi Ishimaeri mwana wa Netaniya,
12 wakaunganija vanarume vake vese, woenda kohwisa Ishimaeri mwana wa Netaniya, ivona vakamuwana phedo no kumwa zinji* yo mu Gibhiyoni.
13 Vandhu vese vainga na Ishimaeri vakadakara pavakavona Johanaa mwana wa Kareya no vatungamiriri vake vese vo masoca vaainga navo.
14 Vandhu vese vainga na Ishimaeri veciendeswa kuuranda vecivha ku Mizipa vakamufuratira, vohwirira na Johanaa mwana wa Kareya.
15 Asi Ishimaeri mwana wa Netaniya pamwepo no vanarume vake vasere vakatiza Johanaa. Ivona vakaenda ku nyika yo Vaamoni.
16 Johanaa mwana wa Kareya no vatungamiriri vake vese vo masoca vaainga navo, vakatora vandhu vese vakasara mu Mizipa, vovapokonyora mu nyara ma Ishimaeri mwana wa Netaniya pasure po kufa ka Gedhariya mwana wa Ahikami. Ivona vakatora vanarume vo Gibhiyoni, masoca, vanakaji, vana vadoko no vatungamiriri vo umambo.
17 Ivona vakapinda, voenda koogara ku ndau inoashihwa varendo yo Kimihamu phedo no Bheterehema vano cido co kwenda ku Ejipita,
18 ngo ndava yo Vakaradhiya, ngokuti ivona vaivathya. Zvecivoneka kuti Ishimaeri mwana wa Netaniya wainga akauraya Gedhariya mwana wa Ahikami wiya wainga akagajwa ndi mambo wo Bhabhironi kuti atungamirire nyika.
Masoko o Pasi
^ Kana: “sime iyi yainga yakaithwa.”
^ Muviri wo mundhu wakafa.
^ Kangaije: “ no ndau inogara kumwa yakawanda.”
