Jeremiya 42:1-22
42 Vatungamiriri vese vo masoca, kubatanijavo na Johanaa mwana wa Kareya, Jezaniya mwana wa Hoshaya, pamwepo no vandhu vese, kuvhira ku vana vadoko mbhera ku madhodha, vakakhwedera
2 vovhunja Jeremiya kudari: “Tapota, izwai cikumbiro cedu co kuda kuitihwa unyasha, utikumbirire kuna Jehovha Mwari wako, hina, ku vese ava vakasara, ngokuti vainga vakawanda, asi vasara vashoma inga zvauri kutovonari.
3 Jehovha Mwari wako ngaativhunje gwanja ratinodikana kufamba no zvatinodikana kuita.”
4 Muporofeti Jeremiya wakavadavira kudari: “Ndazvizwa zvamandivhunjari, ndinokumbira kuna Jehovha Mwari wenyu mukuzwirana no zvamakumbira, ndinozomuvhunja masoko ese andinonga ndavhunjwa ndi Jehovha. Andizomufisiri no ciro cimwe haco.”
5 Ivona vakavhunja Jeremiya kudari: “Jehovha ngaave capupu cokadi no cakagondeka kwatiri, kudari tikatama kuita zvese zvaanotivhunja Jehovha Mwari wako ecishandisa iwewe.
6 Azvinenyi kuti soko rake rakanaka kana rakashata, itusu tinozozwira izwi ra Jehovha Mwari wedu, wiya watakakutuma kwaari kuti zviro zvifambe ushoni, ngokuti itusu tinozozwira izwi ra Jehovha Mwari wedu.”
7 Pasure po gumi ro njiku, Jehovha wakabhuya na Jeremiya.
8 Ngo kudaro, iyena wakadaninja Johanaa mwana wa Kareya no vatungamiriri vese vo masoca vaainga navo kubatanijavo no vandhu vese kuvhira ku vana vadoko mbhera ku madhodha.
9 Perapo iyena wakati kwavari: “Imwimwi makandituma kuti ndivhunje Jehovha Mwari wo Vaiziraeri, kudeketera kwenyu mecikumbira kuitihwa unyasha. Ngo kudaro iyena anoti:
10 ‘Kudari imwimwi mukaenderera mberi muri mu nyika iyi, inini ndinozomuvangisa, andizomuwisi, ndinozomusima andizomuvhiti, ngokuti ndinozocinja murangariro wangu ndotama kumuviisira matambujiko andakamuvhunjaya.
11 Mucadothya mambo wo Bhabhironi, uwo wamuri kuthya.’
“‘Mucadomuthya,’ izvi ndizvona zvinonanga Jehovha, ‘ngokuti inini ndinemwi kuti ndimuponese no kumusujunura mu nyara jake.
12 Inini ndinozomukhombijira usizi. Iyena anozomukhombijiravo usizi, wozomuita kuti muhwirire ku nyika yenyu.
13 “‘Asi kudari imwimwi mukananga kuti: “Haiwa, itusu atizogari mu nyika iyi!” motama kuzwira izwi ra Jehovha Mwari wenyu
14 meciti: “Haiwa, itusu tinozoenda ku Ejipita, kwaticikazovoni hondo, kwaticikazozwi kurira ko mbhayapaya nee atizozwi njara; itusu tinozogara kondhoyo.”
15 Izwanyi izwi ra Jehovha imwimwi vandhu vakasara vo Judha. Jehovha wo hondo, Mwari wo Iziraeri anonanga kudari: “Kudari imwimwi mukakheta kwenda ku Ejipita mogara kondhoyo,
16 banga ramuri kuthyaro rinozomugumira ku nyika yo Ejipita, njara yamuri kuthyari inozomutevera mbhera ku Ejipita, imwimwi mozofira kondhoyo.
17 Vandhu vese vanonga vakheta kugara ku Ejipita vanozofa ngo banga, ngo njara no ndhendha. Apana na umwe anozopona no kupokonyoka pa dambujiko randinozovaviisira.”’
18 “Ngokuti Jehovha wo hondo, Mwari wo Iziraeri, anoti: ‘Kudari inga ndakadurura ushungu wangu no kucamwa kwangu ku vagari vo Jerusarema, mu njira yakaezana, inini ndinozodurura kucamwa kwangu kwamuri, kudari mukaenda ku Ejipita. Imwimwi munozoita inga ciro catukwa, ciro cinothyisa, ciro cinoshohwa no ciro cicikareremejwi. Imwimwi narini amuzovonizve ndau iyi.’
19 “Jehovha wabhuya ngo pamusoro penyu, imwimwi vandhu vakasara vo Judha. Mucadoenda ku Ejipita. Ceujanyi kuti nyamasi ndamuvhunja kuti
20 kuposa kwenyu kunozomuuraisa. Ngokuti imwimwi kamare makandituma kuna Jehovha Mwari wenyu meciti: ‘Kumbirai ngo pamusoro pedu kuna Jehovha Mwari wedu, tivhunjei zvese zvinonanga Jehovha Mwari wedu, itusu tinozozviita.’
21 Inini ndamuvhunja nyamasi masoko aya, asi imwimwi amuzozwiri izwi ra Jehovha Mwari wenyu nee amuzoiti zvaandivhunjari kuti ndimuvhunje.
22 Ngo kudaro, nasanyi kuziva kuti munozofa ngo banga, ngo njara no ndhendha ku ndau yamunozoda koogara.”
