Jeremiya 43:1-13
43 Jeremiya paakapera kuvhunja vandhu vese masoko a Jehovha Mwari wavo, hina, masoko ese a Jehovha Mwari wavo aakatumwa kuti avavhunje,
2 Azariya mwana wa Hoshaya, Johanaa mwana wa Kareya no vanarume vese vaijikuja vakavhunja Jeremiya kudari: “Zvauri kunangaro ngo zvokunyepa! Jehovha Mwari wedu aazivi kukutuma kuti unange kuti: ‘Mucadoenda ku Ejipita koogara kondhoyo.’
3 Asi Bharuki mwana wa Neriya ndiyena ari kukucengeja kuti ubhuye zvakashata kwatiri kuti tidihwe mu nyara jo Vakaradhiya, kuti vatiuraye kana kutitora votiendesa kuuranda ku Bhabhironi.”
4 Asi Johanaa mwana wa Kareya, vatungamiriri vese vo masoca pamwepo no vandhu vese, avazivi kuzwira masoko a Jehovha o kuenderera mberi vecigara mu nyika yo Judha.
5 Kusiyapo izvi, Johanaa mwana wa Kareya no vatungamiriri vese vo masoca vakatora Vajudha vese vainga vakasara, avo vainga vakahwirira kuti vagare ku nyika yo Judha vecivha ku majinja ese ovainga vakandhandhanisihwa.
6 Vakatora vanarume, vanakaji, vana vadoko, vana vokaji va mambo no vese vaya vakapuwa Gedhariya mwana wa Ahikami muzukuru wa Shafani kuti avangwarire. Gedhariya wakapuwa vandhu ava ndi Nebhuzaradhani mutungamiriri wo varindiri. Vakatoravo muporofeti Jeremiya na Bharuki mwana wa Neriya.
7 Ivona vakaenda ku nyika yo Ejipita, ngokuti avazivi kuzwira izwi ra Jehovha, voenda mbhera kuguma ku Tafinesi.
8 Jeremiya paainga ku Tafinesi, Jehovha wakabhuya naye eciti:
9 “Torai mapuwe manganani makuru umavige mumatope pamberi po Vajudha pa ruvanje unoitihwa zvidhina pa musuvo wo nyumba ya Faro ku Tafinesi.
10 Vavhunjei kudari: ‘Jehovha wo hondo, Mwari wo Vaiziraeri anoti: “Ndiri kudaninja mushandiri wangu Nebhukadhinezari* mambo wo Bhabhironi, ndinozodira cigaro cake co umambo panyezuru po mapuwe aya andavigari. Iyena anozotambanuja tende yake yo umambo panyezuru pawo.
11 Iyena anozoviya ohwisa nyika yo Ejipita. Mundhu wese anodikana kuurawa ngo mutungu unouraya, anozofa ngo mutungu unouraya. Mundhu wese anodikana kwenda kuuranda, anozoenda kuuranda. Mundhu wese anodikana kuurawa ngo banga, anozofa ngo banga.
12 Ndinozopisa ngo muriro nyumba jo zvimwari zvo Ejipita, iyena anozojipisa no kutora vandhu woenda navo kuuranda. Kudari inga muhavisi aanesehwi kusimira nguvo yake, mu njira yakafanana, mambo Nebhukadhenezari aazonesehwivo kunyisa nyika yo Ejipita. Iyena anozobuda mondhomo ngo runyararo.
13 Iyena anozophwanya njiki jo mapuwe jo Bheti-shemeshi mu nyika yo Ejipita no kupisa ngo muriro nyumba jo zvimwari zvo Ejipita.”’”
Masoko o Pasi
^ Gama ngo Gama: “Nebhukadhirezari.” Aya ndiwona matarihwe amweni.
