Jeremiya 44:1-30
44 Jeremiya wakaashira masoko aya kuti avhunje Vajudha vese vaigara mu nyika yo Ejipita, vaigara ku Migidhori, Tafinesi, Nofi no mu nyika yo Patirosi. Iyena wakati:
2 “Jehovha wo hondo, Mwari wo Iziraeri anoti: ‘Imwimwi makavona dambujiko rese randakaviisira Jerusarema no randakaviisira madhorobha ese o Judha. Nyamasi iwona ari mathere, pacina no mundhu anogaremo.
3 Izvi zvakaitika ngo ndava yo zviro zvakashata zvovakaita kuti vandituke. Veciita mupiro no kushandira zvimwari zvimweni zvavainga vacikazivi, nee imwimwi nee majicekuru enyu.
4 Inini ndaitumira kwamuri vashandiri vangu vese, vaporofeti; ndaivatumira kuphinda no kuphinda ndeciti: “Ndapota, mucadoita zviro izvi zvinosembhusa zvandinonyenya.”
5 Asi ivona avazivi kuzwira nee avazivi kuteya njeve kuti vasiye zviito zvavo zvakashata, vasiye kuita mupiro ku zvimwari zvimweni.
6 Ndizvona zvakaitisa kuti ndidurure ushungu hwangu no kucamwa kwangu, izvo zvakapisa madhorobha o Judha no makwanja o Jerusarema. Iwona akava mathere acina ciro, inga zvaari nyamasi.’
7 “Wari, Jehovha Mwari wo hondo, Mwari wo Iziraeri anoti: ‘Ngenyi muri kujiviisira dambujiko guru rinouraya vanarume vese vo Judha, vanakaji, vana vadoko, vana vo panyara, ricikazosii no mundhu ari wese?
8 Ngenyi imwimwi maidikana kundituka ngo zviito zvenyu, meciita mupiro ku zvimwari zvimweni zvo Ejipita kwamakaenda koogara? Imwimwi munozofa, mozoita inga ciro catukwa no cinoshohwa pakati po majinja ese o panyika.
9 Kureva kuti makanganwa zvakashata zvakaitwa ngo majicekuru enyu? Zvakashata zvakaitwa ngo majimambo o Judha? Zvakashata zvakaitwa ngo vakaji vavo? Kubatanijavo no zvakashata zvakaitwa ndimwi kamare no zvakashata zvakaithwa ngo vakaji venyu mu nyika yo Judha no mumakwanja o Jerusarema?
10 Mbhera na nyamasi, amuzivi kuzvidodokesa, amuzivi kuthya, amuzivi kuzwira mutemo wangu nee amuzivi kuzwira mupango jangu jandakadira pamberi penyu no pamberi po majicekuru enyu.’
11 “Ngo kudaro, Jehovha wo hondo, Mwari wo Iziraeri anoti: ‘Ndasunga kumuviisira dambujiko ro kupeja Vajudha vese.
12 Ndinozotora Vajudha vakasara, avo vakasunga kwenda kogara ku nyika yo Ejipita, vese vanozofira mu nyika yo Ejipita. Ivona vanozofa ngo banga no kupejwa ngo njara kuvhira mudoko mbhera mukuru. Ivona vanozofa ngo banga no njara. Imwimwi munozoita inga ciro catukwa, ciro cinothyisa, ciro cinoshohwa no ciro cicikareremejwi.
13 Ndinozokhawisa vagari vo nyika yo Ejipita inga kukhawisa kwandakaita Jerusarema ngo banga, njara no ndhendha.
14 Vajudha vakasara vakaenda koogara ku nyika yo Ejipita avazokwanisi kupokonyoka nee kupona kuti vahwirire ku nyika yo Judha. Ivona vanozoda maningi kuhwirira koogara kondhoyo, asi avazohwiriri, kusiyapo basi vashoma vanozotiza.’”
15 Vanarume vese vainga vakaziva kuti vakaji vavo vainga vakaita mupiro ku zvimwari zvimweni no vakaji vese vaingepo, voumba cikwata cikuru, kubatanijavo no vandhu vese vaigara ku Patirosi mu nyika yo Ejipita. Ivona vakadavira Jeremiya kudari:
16 “Atizozwiri masoko owakativhunja wecishandisa zina ra Jehovha.
17 Tinozozwira masoko ese akabuda pamuromo pedu. Tinozoita mupiro kuna Vahosi vo Kudenga* no kudurura zvipo zvo doro kwavari inga zvatakaita itusu, majicekuru edu, majimambo edu no vatungamiriri vedu mu madhorobha o Judha no mumakwanja o Jerusarema. Pa mukuwo uu, itusu tainga no zvokuha zvakawanda. Apana caiticotera nee aticaisongana no dambujiko riri rese.
18 Pasure po kusiya kuitira mupiro Vahosi vo Kudenga* no kudurura zvipo zvo doro kwavari, takatanga kucotehwa ngo zviro zvese, touraiwa ngo banga no njara.”
19 Vanakaji vakaengejera veciti: “Pataiita mupiro ku Vahosi vo Kudenga,* takavadururira zvipo zvo doro. Itusu takavaitirazve mupiro wo mabhoro akaezana no mufananijo wavo no kuvadururira zvipo zvo doro. Kureva kuti takaita izvi ticikazivi kuvhunjwa ngo majimwamuna edu here?”
20 Jeremiya wakadavira vandhu vese, vanarume, vakaji vavo, no vese vaaibhuya naye kudari:
21 “Zvipo zvamakaita mu madhorobha o Judha no mumakwanja o Jerusarema, imwimwi, majicekuru enyu, majimambo enyu, vatungamiriri venyu no vandhu, zvakaceukijwa ndi Jehovha wozvirangarira mu mwoyo mwake!
22 Pakupejisira, Jehovha aazivi kukwanisa kucijikira zviito zvenyu zvakashata no zviro zvinosembhusa zvamakaita. Nyika yenyu yaita inga mathere, ciro cinothyisa, muezaniso wo ciro catukwa icina no mugari ari wese inga zvamuri kuvonari nyamasi.
23 Zvecivoneka kuti imwimwi makaita mupiro iji moshaishira Jehovha, motama kuzwira izwi ra Jehovha, kutama kuzwira mutemo wake, mupango jake no ndhungamiriro jake, dambujiko iri ramugumira inga zvamuri kuvonari nyamasi.”
24 Jeremiya wakaenderera mberi ecibhuya no vandhu vese no vanakaji vese kudari: “Izwanyi soko ra Jehovha, imwimwi mwese vagari vo Judha muri kugarari mu nyika yo Ejipita.
25 Jehovha wo hondo, Mwari wo Iziraeri anoti: ‘Zvomakananga imwimwi no vakaji venyu ngo muromo wenyu, mazvikwanirisa ngo nyara jenyu ngokuti makananga kudari: “Kunasa kunanga, itusu tinozokwanirisa mbhiko jedu jese jo kuita mupiro ku Vahosi vo Kudenga* no kuvadururira zvipo zvo doro.” Kunasa kunanga, imwimwi vanakaji munozoenderera mberi mecikwanirisa mbhiko jenyu no kuita zvamakagondesa.’
26 Ngo kudaro, izwanyi soko ra Jehovha imwimwi mwese vagari vo Judha muri kugarari mu nyika yo Ejipita: ‘“Ndinopika ngo zina rangu guru,” izvi ndizvona zvinonanga Jehovha, “kuti mu nyika yese yo Ejipita, akuna no mundhu umwe wo Judha anozopikazve ecishandisa zina rangu eciti: ‘Ndinopika ngo zina ra Jehovha Mwari anopona, mambo Mukuru-Kuru!’
27 Ndiri kuenderera mberi ndakavasota kuti ndivaviisire dambujiko, haiwa ciro cakanaka. Vandhu vese vo Judha vari kugara mu nyika yo Ejipita vanozourawa ngo banga no njara mbhera vatame kuzowanikazve.
28 Vashoma basi ndivona vanozopokonyoka pakuurawa ngo banga, vozobuda mu nyika yo Ejipita vohwirira ku nyika yo Judha. Ngo kudaro, vandhu vese vakasara vo Judha vakaendaya koogara ku nyika yo Ejipita, vanozoziva kuti masoko aani akakwanirisika, ngo avo kana ngo angu!”’”
29 “‘Ici ndicona citatijo kwamuri,’ izvi ndizvona zvinonanga Jehovha, ‘cokuti ndinozomupanica mu ndau ino kuti muzive kuti cigondiso cangu ngo pamusoro po dambujiko randiri kuda kumuviisira cinozokwanirisika.
30 Jehovha anonanga kudari: “Ndiri kudira Faro Hofra mambo wo Ejipita mu nyara jo vavengi vake no mu nyara jo vaya vari kupsanga kumuuraya. Inga zvandakaita na Zedhekiya mambo wo Judha wandakadira mu nyara ja Nebhukadhinezari* mambo wo Bhabhironi uwo wainga muvengi wake waipsaka kumuuraya.”’”
Masoko o Pasi
^ Iri izina ro cimwari cokaji cainamatwa ngo Vaiziraeri vacizivi kugondeka. Kangaije ivona vainanga kuti cimwari ici ndicona caiitisa kuti vanakaji vabare.
^ Iri izina ro cimwari cokaji cainamatwa ngo Vaiziraeri vacizivi kugondeka. Kangaije ivona vainanga kuti cimwari ici ndicona caiitisa kuti vanakaji vabare.
^ Iri izina ro cimwari cokaji cainamatwa ngo Vaiziraeri vacizivi kugondeka. Kangaije ivona vainanga kuti cimwari ici ndicona caiitisa kuti vanakaji vabare.
^ Iri izina ro cimwari cokaji cainamatwa ngo Vaiziraeri vacizivi kugondeka. Kangaije ivona vainanga kuti cimwari ici ndicona caiitisa kuti vanakaji vabare.
^ Gama ngo Gama: “Nebhukadhirezari.” Aya ndiwona matarihwe amweni.
