Jeremiya 48:1-47
-
Uporofeti ngo pamusoro po Mowabhi (1-47)
48 Jehovha wo hondo, Mwari wo Iziraeri, anonanga kudari ngo pamusoro po Mowabhi:
“Maiwee Nebho, ngokuti iyona yaphwanyiwa!
Kiriyataimi, yakapserujwa yotohwa.
Ndau yokutizira yakangwaririka, yapserujwa yophwanywa.
2 Ivona avazosimbizve Mowabhi.
Vakaronga mazano vari mu Heshibhoni kuti variphwanye:
‘Viyanyi, ngatende kopeja jinja iri,’Iwewevo Madhimeni, garai wakanyarara,Ngokuti banga rinozokutevera.
3 Kuri kuzika izwi ro vandhu vari kucema riri kuvha ku Horonaimi,Izwi ro vandhu vari kucema ngo ndava yo kuparaja no kuphwanyika kukuru.
4 Mowabhi waparajwa.
Vana vake vari kucema.
5 Vandhu vari kukhwira kwenda ku Ruhiti vecicema.
Pa muterero wo Horonaimi pari kuzika kukhuwa ngo kuhwajihwa ngo ndava yo dambujiko.
6 Tizanyi kuti muponese upenyu hwenyu!
Munodikana kuita inga muti wo mujunipa uri mucipare.
7 Zvecivoneka kuti imwimwi munothemba mabasa enyu no upfumi hwenyu,Imwimwi munozotohwavo.
Kemoshi anozoenda kuuranda,Pamwepo no vapiri no vatungamiriri vake.
8 Muparaji anozonghwina mu madhorobha ese,Apana dhorobha rinozosara.
Muterero unozoparajwa,Bani rinozoparajwa mukuzwirana no zvakanangwa ndi Jehovha.
9 Diranyi citatijo kuitira Mowabhi,Ngokuti iyena anozotiza paanonga aamathereMadhorobha ake anozova ciro cinothyisa,Ozogara acina no mundhu ari wese.
10 Ngaatukwe mundhu wiya anoita basa ra Jehovha, asi acikariiti ngo mwoyo wese!
Ngaatukwe mundhu wiya anoita basa rake kuti atame kupopomeja sangi!
11 Vamowabhi vakagarisika kuvhira mu ujaha hwavo,Inga vhinyu yakadora mu ndau mainogara.
Ivona avazivi kuvhiswa mu mujiyo umwe kwenda ku mujiyo umweni,Nee kumboenda kuuranda.
Ndizvona zvinovaitisa kuti kunaka kwavo, kutame kucinja.
Nee kunuhira kwavo kutame kucinja.
12 “‘Ngo kudaro, jiri kuguma njiku,’ izvi ndizvona zvinonanga Jehovha, ‘njiku jokuti ndinozovatumira vandhu vanozovadurura. Ivona vanozovadurura, vosiya mujiyo javo jicina zviro no kuphwanya-phwanya majuvi avo akakura.*
13 Vamowabhi vanozopseruka pavanozovona Kemoshi inga kupseruka kwavakaita Vaiziraeri pavakavona Bheteri, iro ravaithemba.
14 Ngenyi makacunga kunanga kuti: “Tiri masoca ano simba, takanasiririka kuti tiyende ku hondo”?’
15 ‘Mowabhi yaphwanyiwa,Madhorobha ayo anghwiniwa ngo muvengi,Majaha ayo aanothemba apera kuurawa,’Izvi ndizvona zvinonanga mambo uwo ano zina rokuti Jehovha wo hondo.
16 Dambujiko ro Vamowabhi, raaphedo kuti rigume;Kuparajwa kwavo kwakhwedera ngo kukasika.
17 Vandhu vese vanogara phedo navo, ngavavaitire pena,Vese vaya vanoziva zina ravo.
Vavhunjenyi kudari: ‘Ndonga yakavanga ingaitisa kudini kuti iguhwe, ndonga yakaseja, yaguhwa ngenyi?’
18 Bzukai pa cigaro cako cino nduma no cinoreremejwa,Izwai nyota, iwewe mwana wokaji anogara mu Dhibhoni,Ngokuti muparaji wo Mowabhi wakugumira,Iyena anozophwanya ndau jese jakavangiswa.
19 Imai mumbhiripiri mo gwanja, uvone mwanakaji anogara ku Aroweri.
Vhunjisai mwanarume ari kutiza no mwanakaji ari kupokonyoka kudari: ‘Kuri kuitikenyi?’
20 Mowabhi wapserujwa wogara ecithya.
Cumbanyi no kucema.
Zivisanyi mu Arinoni kuti Mowabhi waparajwa.
21 “Mwari wakapera kutonga nyika yo mubani, iyena watonga Horoni, Jahazi, Mefaati;
22 Dhibhoni, Nebho, Bheti-dhibhirataimi;
23 Kiriyataimi, Bheti-gamuri, Bheti-miyoni;
24 Keriyoti no Bhozira, kubatanijavo no madhorobha ese o nyika yo Mowabhi, ari ndhambo no ari phedo.
25 ‘Simba* ro Mowabhi rapera;Mukono wayo waguhwa’, izvi ndizvona zvinonanga Jehovha.
26 ‘Mudhakwisenyi, ngokuti iyena wakazvikuja pamberi pa Jehovha.
Mowabhi ari kufamba panyezuru po maruco ake,Iyena ari kushohwa.
27 Iziraeri aicaengepi ciro cawaishora iwewe here?
Kureva kuti iyona yakawanika pakati po mambavha?
Kuti iwewe ujunguje musoro no kubhuya zviro zvakashata ngo pamusoro payo?
28 Vagari vo Mowabhi, budanyi mu madhorobha muende kogara mu mapuwe.
Itanyi inga njiva, inoita saki yayo pakati po mapuwe.’”
29 “Takazwa ngo pamusoro po kuzvikuja ka Mowabhi, iyena anozvikuja maningi.
Takazwa ngo pamusoro po kuzvikukumuja kwake, kuzvikuja kwake, kudada kwake no kuzvikhwijirija ko mwoyo wake.”
30 “‘Inini ndinoziva ushungu hwake,’ izvi ndizvona zvinonanga Jehovha,‘Mabhuyo ake acikabeseri, aana shwiro;Ivona apana cavanozoita.
31 Ndizvona zvinondiitisa kuti ndizocumbe ngo pamusoro pa Mowabhi,Ndinozocema ngo ndava yo vagari vese vo MowabhiNdozocumba ngo pamusoro po vanarume vese vo Kiri-heresi
32 Inini ndinozokucemazve maningi kupinda Jazeri,Ndinozocemazve iwewe muuvha wo Sibhima.
Matavi ako akapfara aambuka jombe,Areba mbhera mu jombe ogumira Jazer.
Ngo pamusoro po mucero wo mukuwo wo cirimo no kukutora uvha,Muparaji wapera kuzviparaja.
33 Mudakaro no kutamba ngo kudakara, zvinozongarangaka mu munda wo muceroNo mu nyika yo Mowabhi.
Ndakaomesa vhinyu mu ndau mainosvinihwa.
Apana mundhu anozocikacikazve uvha ecikhuwa ngo kudakara.
Kunozova no kukhuwa, kuciripi kukhuwa ko kudakara.’”
34 “‘Muri kuzika kucema mu Heshibhoni mbhera Ereyare.
Ivona vari kucema ngo izwi guru rinoguma Jahazi,Kutangira Zowari mbhera Horonaimi roendazve koguma Egirati-sherishiya.
Pikija no kumwa yo Nimirimi inozooma.
35 Ndinozopeja mu Mowabhi,’ izvi ndizvona zvinonanga Jehovha,‘Mundhu wese anoita cipo mu ndau jakakhwiriraNo mundhu wese anoita mupiro ku cimwari cake.
36 Ngo kudaro, mwoyo wangu unozocema Mowabhi inga mutoriro,Mwoyo wangu unozocema vanarume vo Kiri-heresi inga mutoriro.
Ngokuti upfumi hwovakawana hunozopera.
37 Musoro yavo yese yakapahwa.
Mupungu javo jese jakagundhwa.
Mu nyara javo jese jakacekwa-cekwa,Mucihunu* mwavo muno mapendera o saku.’”
38 “‘Mu nyumba jese jo mudenga jo MowabhiNo mu mabazari avo eseMuno kucumba basi,Ndakagura-gura MowabhiInga juvi* raphwanyiwa,’ izvi ndizvona zvinonanga Jehovha.
39 ‘Iyena wathyiswa maningi! Cumbanyi!
Mowabhi wafuratira akapserukaMowabhi wava ciro cinoshohwa,Ciro cinothyisa vandhu vese vakamutendeneja.’”
40 “Jehovha anonanga kudari:
‘Vonanyi! Inga zvinoita hokotora painobzuka kuvha mudenga ngo kukasika,Muvengi anozotambanuja mapapiro ake kuti ahwise Mowabhi.
41 Madhorobha anozotohwa,Ndau jakavanga jinozotohwa.
Pa njiku yondhoyo, mwoyo jo masoca akavanga o MowabhiJinozoita inga mwoyo wo mwanakaji ari kuhwajihwa ngo kuda kubara.’”
42 “‘Mowabhi inozoparajwa yozotama kuwanikazve,Ngokuti yakazvikuja pamberi pa Jehovha.
43 Kuthya, rindi no murau zvakamuimira imwimwi,Vagari vo Mowabhi,’ izvi ndizvona zvinonanga Jehovha.
44 ‘Wiya anozotiza kuthya, anozowira mu rindi,Wiya anozobuda murindi, anozobatwa ngo murau.’
‘Ngokuti inini ndinozopanica Mowabhi pa gore randinozosana,’ izvi ndizvona zvinonanga Jehovha.
45 ‘Vaya vari kutiza, vanozoima mu munvuriri wo Heshibhoni vacina simba.
Ngokuti mu Heshibhoni munozobuda muriro,Pakati po Sihoni panozobuda murazvuUnozopisa huma yo MowabhiNo ndekede* jo vandhu vese vanoita uphanga.’
46 ‘Unonyathwa iwewe Mowabhi!
Vandhu vo Kemoshi vapejwa.
Vana vako vatohwa voendeswa kuuranda,Vana vako vokaji vaendeswa kuuranda.
47 Asi pa njiku jokupejisira, ndinozounganija vandhu vakaendeswa kuuranda vo Mowabhi,’ izvi ndizvona zvinonanga Jehovha.
‘Apa ndipona panoperera rutongeso hwo Mowabhi.’”
Masoko o Pasi
^ Kana: “jharo javo jakakura.”
^ Gama ngo Gama: “nyanga yo.”
^ Vonanyi Kudurujihwa ko Magama.
^ Kana: “jharo yaphwanyiwa.”
^ Kana: “dendhenywa.”