Jeremiya 49:1-39
49 Ngo pamusoro pa Vaamoni, Jehovha anonanga kudari:
“Kureva kuti Vaiziraeri avana vana here?
Kureva kuti ivona avana mundhu anozogara utaka?
Waro ngenyi Marikamu watora nyika yo Gadhi?
Ngenyi vandhu vake vari kugara mumadhorobha o Vaiziraeri?”
2 “‘Waro izwanyi! Jiri kuguma njiku,’ izvi ndizvona zvinonanga Jehovha,‘Jandinozoita kuti kuzike citatijo co hondo co kuhwisa Rabha wo Vaamoni.
Iyena anozoita mututu wo mapuwe,Madhorobha ake madoko anozopiswa ngo muriro.’
‘Vaiziraeri vanozotora nyika yovakatorehwa,’ izvi ndizvona zvinonanga Jehovha.
3 ‘Cumbanyi imwimwi vagari vo Heshibhoni, ngokuti nyika yo Ai yakaparajwa!
Cemanyi imwimwi vagari vo zvimadhorobha zvidoko zvo Rabha.
Simiranyi mapendera o saku.
Cemanyi mecifamba-famba mu mativi ese pakati po zvibaya* zvo mapuwe,Ngokuti Marikamu anozoendeswa kuuranda,Pamwepo no vapiri vake no vatungamiriri vake.
4 Iwewe mwana wokaji acizivi kugondeka,Ngenyi unodada ngo ndava yo mapani ako?
Ngenyi unodada ngo ndava yo mapani ako akapfara?
Iwewe unothemba upfumi hwako weciti:
“Ndiyani anozoviya koondihwisa?”’”
5 “‘Ndiri kukuviisira ciro cinothyisa,’ izvi ndizvona zvinonanga Jehovha wo hondo, Mambo Mukuru-kuru,‘Cecivha ku vandhu vese vakakutendeneja.
Iwewe unozondhandhanisihwa ku mativi ese,Apana mundhu ari wese anozounganija vandhu vanozotiza.’”
6 “‘Asi pasure po zviro izvi, ndinozounganija vandhu vo Amoni vakaendeswa kuuranda,’ izvi ndizvona zvinonanga Jehovha.”
7 Ngokuti izvi ndizvona zvinonanga Jehovha wo hondo ngo pamusoro po Edhomi:
“Kureva kuti amucinazve uzivi mu Temani?
Kureva kuti mbhangiro jaushoni jo vandhu vanozwisisa japera here?
Kureva kuti uzivi hwavo hwavora?
8 Hwiriranyi sure mutize!
Imwimwi vagari vo Dhedhani, endanyi koofindara mu ndau jakajika!
Ngokuti ndiri kuviisira Izau dambujikoPa mukuvo wandinozorangarira ngo pamusoro pake.
9 Kudari vakotori vo uvha no vaiiviya kwauri,Avacaizosiyepi uvha nganani kuti vamweni vabojere?
Kudari mbavha no jaiviya cousiku,Ajicaizophwanyepi basi zviro zvajinoda?
10 Asi inini ndinozosiya Izau acina ciro.
Ndinozoita kuti ndau jake jokufindarira jive pambhene,Kuti iyena atame po kufindarira.
Vana vake, hama jeke no vocigarisano vake vanozoparajwa,Iyena aazowanikizve.
11 Siyai ndherera* jako,Inini ndinozojingwarira kuti jipone,Noni javo jinothemba inini.”
12 Ngokuti Jehovha anoti: “Vonanyi! Vandhu vaya vacizivi kutongwa kuti vamwe kopo yo ushungu hwangu, vanodikana kuimwa. Waro iwewe ungagara kamare ucizivi kupanicwa? Iwewe auzogari ucizivi kupanicwa.”
13 “Ngokuti ndakapika pacangu kamare,” izvi ndizvona zvinonanga Jehovha, “ kuti Bhozira inozoita ciro cinothyisa, ciro cinoshohwa, ndau icikagahwi ngo vandhu no muezaniso wo ciro catukwa. Madhorobha ese ayo anozoparajwa mukuperera.”
14 Ndazwa masoko aivha kuna Jehovha,Iyena wakatumira ndhumwa yake ku majinja kuti imavhunje kudari:
“Ungananyi muviye kuzohwisana naye,Nasiriranyi kuitira hondo.”
15 “Vonai! Inini ndakakuita kuti udodokeswe pamberi po majinja,Ndakakuita kuti ushohwe ngo vandhu vese.
16 Kuthyisa vandhu kwawaiita,No kuzvikuja ko mwoyo wako zvakakucengeja,Iwewe unogararo mu mapako o mapuwe,Iwewe unogararo pa dundhu rakareba.
Pikija iwewe ukavaka saki yako panyezuru po dundhu inga hokotora,Inini ndinozokubzusa kuvha kondhoyo,” izvi ndizvona zvinonanga Jehovha.
17 “Edhomi rinozova ciro cinothyisa. Vandhu vese vanozopinda phedo naro vanozorisota vecithya no kurija mundozva ngo ndava yo matambujiko aro ese.
18 Inga zvakaitika pakaparajwa Sodhoma, Gomora no madhorobha ese ainga phedo,” izvi ndizvona zvinonanga Jehovha,” apana mundhu anozogara mondhomo, apana mwanarume anozogaremo.
19 “Vonanyi! Pano mundhu ari kuviya koohwisa mushambi wakangwaririka inga mbhondoro iri kuvha mu gwasha riri phedo no Jordhani, asi ngo civhumbu ndinozoita kuti iyena atize aende ndhambo. Inini ndinozomugajira mundhu wandakasana. Ngokuti ndiyani wakaezana neni? Ndiyani angaphikizana neni? Muhavisi wapi angaima pamberi pangu?
20 Ngo kudaro, imwimwi vanarume izwanyi zvasungwa ndi Jehovha ngo pamusoro po Edhomi no zvaanoda kuita kuti ahwise vagari vo Temani:
Kunasa kunanga, mavhuta anozokhwekhwerejwa odihwa ndhambo kamare.
Iyena anozopeja ndau javanohavisira zvinyama ngo ndava yavo.
21 Musindo* wo kuwa kwake unozotetemeresa nyika.
Kuno vandhu vari kucema.
Izwi riri kuzika mbhera ku Jombe ro Kupsuka.
22 Vonanyi! Iyena anozokhwira mudenga no kubzuka pasi ngo kukasika inga zvinoizwa ngo hokotora,Iyena anozotambanujira mapapiro ake ku Bhozira.
Pa njiku yondhoyo, mwoyo yo masoca akavanga o EdhomiInozoita inga mwoyo yo mwanakaji ari kuhwajihwa ngo kuda kubara.”
23 Masoko ngo pamusoro po Dhamasko:
“Hamati no Aripadhi vakapserujwa,Ngo ndava yo masoko akashata avakazwa.
Ivona vari kunyunguruka ngo kuthya.
Jombe ranyanduka, arizivi kugajana.
24 Dhamasko aicina cicunge.
Iyona yafuratira yotiza, asi yabathwa ngo kutya.
Kuhwajihwa no kutambujika kwaibata,Inga zvinoitika no mwanakaji ari kubara.
25 Ngenyi dhorobha rinosimbhwa arizivi kusiiwa,Dhorobha rinotamba ngo kudakara?
26 Ngokuti majaha aro anozowira mu mabazari,Masoca aro ese anozofa pa njiku yondhoyo,” izvi ndizvona zvinonanga Jehovha wo hondo.
27 “ Ndinozopisa muru* jo Dhamasko ngo muriro,Muriro unozopisa rusingo jakavanga ja Bhenihadhadhi.”
28 Ngo pamusoro po Kadhari no umambo hwo Hazori hwakanyiswa ndi Nebhukadhinezari* mambo wo Bhabhironi, Jehovha anonanga kudari:
“Endanyi, khwiranyi ku Kadhari,Urayanyi vana vese vo Kumavhazuva.
29 Toranyi tende javo no mushambi javo,Toranyi nguvo jo tende javo no zviro zvavo zvese.
Toranyi kamera javo,Vandhu vanozovakhuwira veciti: ‘Ku mativi ese kuri kuthyisa!’”
30 “Tizanyi, endanyi ndhambo!
Endanyi, findaranyi mu ndau jakajika, imwimwi vagari vo Hazori,” izvi ndizvona zvinonanga Jehovha.
“Ngokuti Nebhukadhinezari* mambo wo Bhabhironi, wamurongera mazano,Iyena ari kuda kumuhwisa.”
31 “Mukanyi, endanyi koowhwisa jinja rinogara mu runyararo,Irona rinogara rakangwaririka!” izvi ndizvona zvinonanga Jehovha.
“Irona arina musuvo nee mugogo; ivona vanogara vega.
32 Kamera javo jinozotohwa ngo hasha,Mushambi yavo yakawanda inozotohwa.
Inini ndinozovandhandhanisa ku mativi ese,Vese vaya vanogundha mashasha* avo.
Ndinozovaviisira matambujiko avo ku mativi ese,” izvi ndizvona zvinonanga Jehovha.
33 “Hazori inozoita ndau yokutizira imbhwa jo musora,Inozova mathere o kwenda no kwenda.
Apana mundhu anozogara mondhomo,Apana mwanarume anozogara mondhomo.”
34 Zedhekiya mambo wo Judha paakatanga kutonga, muporofeti Jeremiya wakaashira soko ra Jehovha ngo pamusoro pa Erami reciti:
35 “Jehovha wo hondo anoti: ‘Ndiri kugura uta wo Erami, kunovha simba ravo.
36 Ndinozoviisira Erami mbhepo murongomuna jo mativi marongomuna o kumatenga, ndinozondhandhanisa vagari vake vese ku mativi ese o mbhepo iji. Vandhu vo Erami vanozondhandhanisihwa ku majinja ese.’”
37 “Ndinozoita kuti vandhu vo Erami vathye pamberi po vavengi vavo no pamberi po vandhu vaya vari kupsaka kuvauraya. Ndinozovaviisira dambujiko, ushungu hwangu hunobwaka,” izvi ndizvona zvinonanga Jehovha. “Ndinozovatumira banga rinozovatevera mbhera ropera kuvauraya vese.”
38 “Ndinozodira cigaro cangu co umambo mu Erami, ndinozouraya mambo wavo no vatungamiriri vavo,” izvi ndizvona zvinonanga Jehovha.
39 “Asi kumbhiri ko njiku jo kupejisira, ndinozounganija vandhu vo Erami vakaendeswa kuuranda,” izvi ndizvona zvinonanga Jehovha.
Masoko o Pasi
^ Kana: “maphandu o.”
^ Kana: “Mwana wakafihwa ndi baba.”
^ Kana: “bharuriyo ro.”
^ Kana: “mupfimbiji.”
^ Gama ngo Gama: “Nebhukadhirezari.” Aya ndiwona matarihwe amweni.
^ Gama ngo Gama: “Nebhukadhirezari.” Aya ndiwona matarihwe amweni.
^ Mashasha ivhuji rinomera kuvha mumusoro robatana no ndevhu.
