Jeremiya 50:1-46
50 Aya ndiwona masoko a Jehovha ngo pamusoro po Bhabhironi, ngo pamusoro po Vakaradhiya aakabhuya ecishandisa muporofeti Jeremiya:
2 “Zvizivisenyi no kuzvitokotesa pakati po majinja.
Musanyi citatijo mutokotese.
Mucaviga ciri cese!
Nanganyi kudari: ‘Bhabhironi ratohwa.
Bheri wadodokeswa.
Merodhaki wathyisijihwa.
Zvithombe zvake zvadodokeswa.
Zvitombe zvake zvinosembhusa* zvathyisijihwa.’
3 Ngokuti kuno jinja raviya koorihwisa recivha kanjikazi.
Irona rakaita kuti nyika yavo ive ciro cinothyisa;Akucinazve mundhu anogaremo.
Vandhu pamwepo no zvinyama vatiza;Ivona vapinda.”
4 “Pa njiku jondhojo no pamukuvo uwu,” izvi ndizvona zvinonanga Jehovha, “Vandhu vo Iziraeri no vandhu vo Judha vanozoviya pamwepo. Vanozoviya vecifamba vecicema. Vese vanozopsaka Jehovha Mwari wavo.
5 Ivona vanozovhunjisa gwanja rinoeda ku Ziyoni, huma javo pajinonga jakasota kondhoyo vecinanga kudari: ‘Viyanyi, ngantende kuna Jehovha tiite citenderano cinogara kwenda no kwenda, cicikakanganiki.’
6 Vandhu vangu vaita inga mushambi wo mavhuta akasvejeka. Vahavisi vawo vakaita kuti iwona usvejeke. Vahavisi vakautora vouendesa kumatundhu, vouita kuti uherereke mumatundhu no muzvimatundhu. Iwona wakanganwa ndau yawo yokuzororera.
7 Vese vaya vari kuuwana vari kuuparaja, vavengi vawo vari kunanga kudari: ‘Atina ndava, ngokuti ivona vakashaishira Jehovha, vakashaishira ndau yo ururami no vetero yo majicekuru avo, Jehovha.’”
8 “Tizanyi mu Bhabhironi,Budanyi mu nyika yo Vakaradhiya,Itanyi inga zvinyama zvinobuda pamberi po mushambi.
9 Ngokuti ndiri kuviisira BhabhironiCikwata cikuru co majinja cinovha kanjikazi.
Icona cinozoviya inga masoca ari kwenda koohwisa;Kunyisa kwaco kunozoviya ngo divi rondhoro.
Mupasha jaco jakaezana no mupasha jo musoca ano simbaIcona cinosiya majibaba acina vana vavo;Acihwiriri cicikazivi kuita zvacaida.
10 Karadhiya inozotohwa ngo hasha.
Vese vanoitora vanozowana zviro zvizinji,” izvi ndizvona zvinonanga Jehovha.
11 “Ngokuti imwimwi maienderera mberi mecidakara no kutambaPamaitorera zviro ndhaka yangu.
Imwimwi maiphuka-phuka inga cimwana co n’gombe cokaji ciri pa maushwa mavishi,Imwimwi mainderera mberi mecicema inga haci jorume.
12 Mai wenyu vakapserujwa.
Vaya vakamubara vakanyangajiswa.
Vonanyi! Iyena mudoko pakati po majinja,Ivona vakaita inga bani rakavoma, inga cipare cicina kumwa.
13 Ngo ndava yo kunyangajwa kwa Jehovha nyika yo Bhabhironi aizogahwizve ngo vandhu;Iyona inozoita mathere.
Vese vanozodarika ngo mu nyika yo Bhabhironi, vanozoisota vothyaVanozorija mundozva ngo ndava yo matambujiko aro ese.
14 Viyanyi kohwisa Bhabhironi mu mativi ese inga cikwata co masoca,Imwimwi mwese muri kukwanyaro uta.
Rifurenyi ngo mupasha jese,Ngokuti rakashaishira Jehovha.
15 Khuwanyi mu mativi ese murihwise.
Irona ratendera kunyiswa.
Njiki jaro jawa, muru* jaro japhwanywa,Ngokuti kuhwirijira ngo kwa Jehovha.
Rihwirijirenyi.
Riitirenyi zvarakaita.
16 Urayanyi mundhu anosima mbeu mu BhabhironiNa wiya anoshandisa sikeyo pa mukuvo wo kukotora.
Mundhu umwe na umwe anozotizira ku jinja rake,Umwe na umwe anozotizira ku nyika yake, ngo ndava yo banga rinouraya.
17 “Vandhu vo Iziraeri vakaita inga mavhuta akasvejeka. Vakandhandhaniswa ngo mbhondoro. Pakutanga mambo wo Asiriya wakavavhavhura; perepo Nebhukadhinezari* mambo wo Bhabhironi wakacenga maphondo* avo.
18 Ngo kudaro, Jehovha wo hondo, Mwari wo Vaiziraeri anoti: ‘Ndinozotonga Bhabhironi no nyika yako ngo njira yondhoyo yandakatonga mambo wo Asiriya.
19 Ndinozoviisa Vaiziraeri pa ndau yavo yavanohavira, ivona vanozohira pa dundhu Kameri ro ku Bhashani. Ivona vanozoguta mu matundhu o Efraimi no o Giriyadhi.’”
20 “Mu njiku jondhojo no pamukuvo wondhowo,” izvi ndizvona zvinonanga Jehovha,“Kuposa ko Vaiziraeri kunozopsakwa,Asi akuzowaniki,Nee zvishaishi zvo Judha azvizowaniki,Ngokuti ndinozoregerera vaya vandinozoponesa.”
21 “Endanyi koohwisa nyika yo va Merataimi no vagari vo Pekodhi.
Ivona ngavauraiwe no kuparajwa mukuperera,” izvi ndizvona zvinonanga Jehovha.
“Itanyi zvese zvandakananga.
22 Kuri kuzika kukhuwa ko vandhu vanoita hondo,Kuno nyathwa huru.
23 Martera waihwisa nyika yese waguhwa wophwanywa!
Bhabhironi rava ciro cinothyisa co majinja ese!
24 Iwewe Bhabhironi, ndakuteera murau,Iwewe wabathwa ucikazvizivi.
Iwewe wawanika wotohwa,Ngokuti wakaphikiza Jehovha.
25 Jehovha wafunungura ndau yake yaanovigira zviro zvo hondo,Iyena wabudisa kunja zvijito zvake zvo hondo akacamwa.
Ngokuti Jehovha wo hondo, Mambo Mukuru-kuru ano basa raarikuda kuitaMu nyika yo Vakaradhiya.
26 Viyanyi muzorihwise kuvha ku ndau jiri ndhambo.
Fununguranyi zvitumba zvaro.
Unganijanyi zviro zvaro zvakatohwa inga mututu wo mucece.
Riparajenyi mukuperera.
Ngarisare ricina mundhu.
27 Urayanyi zvin’gombe zvavo zvese zvorume;Izvona ngazviende koouraiwa.
Nyathwa kwavari, ngokuti yaguma njiku yavo,Mukuvo wavo wokutongwa!
28 Kuri kuzika izwi ro vandhu vari kutiza,Izwi ro vandhu vese vari kupokonyoka mu Bhabhironi,Kuti vazivise mu Ziyoni kuhwirijira ka Jehovha Mwari wedu,Kuhwirijira ngo ndava yo themberi yake.
29 Daninjanyi vandhu vanofura ngo uta kuti vaviye koohwisa Bhabhironi,Vese vanokwanya uta.
Tendenejanyi mumbhiripiri maro kuti patame mundhu anotiza.
Rihwirijirenyi mukuzwirana no zviito zvaro.
Riitirenyi zvarakaita.
Ngokuti rakazvikuja pamberi pa Jehovha,Pamberi po Mucena wo Vaiziraeri.
30 Ngo kudaro, majaha aro anozowa mu mabazari.
Masoca aro ese anozourawa pa njiku yo hondo,” izvi ndizvona zvinonanga Jehovha.
31 Jehovha Mwari wo hondo Mambo Mukuru-kuru anoti: “Izwanyi! Ndiri kuviya kookuhwisa iwewe mundhu acina hwiru,”“Ngokuti njiku yako iri kuguma, mukuvo wandinozokutonga.
32 Iwewe mundhu acina hwiru, unozokhugunyika wowa,Akuzovi no mundhu anozokumusa.
Inini ndinozopisa madhorobha ako ngo muriro,Muriro unozopisa zvese zvakakutendeneja.”
33 Jehovha wo hondo anonanga kudari:
“Vandhu vo ku Iziraeri no vandhu vo Judha vari kubzinyirihwa,Vandhu vese vakavaendesa kuuranda, vakavafungira.
Ivona vanoramba kuvasujunura.
34 Muponesi wavo anosimba.
Jehovha wo hondo ndirona zina rake.
Kunasa kunanga, iyena anozojivirira ndava javo,Kuti azoroje nyika yavoNo kuviisa jowe-yowe ku vagari vo Bhabhironi.”
35 Jehovha anoti: “Banga rinozohwisa Vakaradhiya,”“Rinozohwisazve vagari vo Bhabhironi, vatungamiriri varo no vazivi vavo.
36 Kuno banga rinozohwisa vaporofeti vokunyepa, ivona vanozoita inga mapenji.
Kuno banga rinozohwisa masoca avo anosimba, iwona anozothya.
37 Kuno banga rinozohwisa haci javo no ngoro* javo jo hondo,Rinozohwisazve vandhu vese vo majinja akasiyana-siyana vari pakati paro,Ivona vanozoita inga vanakaji.
Kuno banga rinozohwisa upfumi hwavo, ivona vanozotohwa.
38 Kumwa yavo inozopejwa, iyona inozovoma.
Ngokuti iyona inyika ino zvithombe zvakavezwa,Ngo ndava yo zvivoniso zvavo zvinothyisa ivona vanoita inga mapenji.
39 Ngo kudaro, zvinyama zvo mucipare no zvinyama zvinoukura zvinozogara mondhomo,Ice* jinozogaravo mondhomo.
Irona arizogahwizve ngo mundhu,Ku mubarihwana no mubarihwana.”
40 “Kudari inga zvakaitika Mwari paakaparaja Sodhoma, Gomora no madhorobha aro ari phedo,” izvo ndizvona zvinonanga Jehovha, “apana mundhu anozogara mondhomo, apana mwanarume anozogaremo.
41 Vonanyi! Kuno vandhu vari kuviya vecivha kanjikazi;Vecivha ku mativi o ndhambo o nyikaKondhoyo kunozovha jinja guru no majimambo ano simba.
42 Ivona vanoshandisa uta pamwepo no mukhondo.*
Ivona vakashata maningi, nee usizi avana.
Kutindhira kwavo kwakaezana no kutindhira ko jombe,Pavanoviya vakapakira haci javo.
Ivona vanobatana inga masoca ari kuviya kookuhwisa, iwewe mwana wokaji wo Bhabhironi.
43 Mambo wo Bhabhironi wazwa masoko ngo pamusoro pavo,Nyara jake jopera simba.
Iyena ari kuhwajihwa,Inga kuhwajihwa kunoita mwanakaji ari kubara.
44 “Vonanyi! Pano mundhu ari kuviya koohwisa mushambi wakangwaririka inga mbhondoro iri kuvha mu gwasha riri phedo no Jordhani, asi ngo civhumbu ndinozoita kuti ivona vatize vaende ndhambo. Inini ndinozomugajira mundhu wandakasana. Ngokuti ndiyani wakaezana neni? Ndiyani angaphikizana neni? Muhavisi wapi angaima pamberi pangu?
45 Imwimwi vanarume, izwanyi zvasungwa ndi Jehovha ngo pamusoro po Bhabhironi no zvaanoda kuita kuti ahwise vagari vo nyika yo Vakaradhiya.
Kunasa kunanga, mavhuta anozokhwekhwerejwa odihwa ndhambo kamare.
Iyena anozopeja ndau javanohavisira zvinyama ngo ndava yavo.
46 Nyika inozotetemera ngo ndava yo musindo wo kutohwa ko Bhabhironi,Kucema kwaro kunozozika pakati po majinja.”
Masoko o Pasi
^ Mu Cihebheru, gama iri kangaije rainangira “manyongo kana marove”. Irona raishandiswa inga gama ro kurerusa.
^ Kana: “mupfimbiji.”
^ Gama ngo Gama: “Nebhukadhirezari.” Aya ndiwona matarihwe amweni.
^ Vonanyi Kudurujihwa ko Magama.
^ Kana: “kareta.”
^ Kana: “Gundhya.” Uwu imushovo wo shiri yakakura icikakoni kumburuka.
^ Thurusi rinoshandiswa ku hondo.