Jeremiya 51:1-64
51 Jehovha anonanga kudari:
“Ndiri kuviisira BhabhironiNo vagari vo Rebhi-kamai* mbhepo inoparaja.
2 Ndinozotumira Bhabhironi vandhu vanozovandhandhanisa,Ivona vanozovandhandhanisa vozosiya Bhabhironi ricina vandhu;Ivona vanozoritendeneja mu mativi ese pa njiku yo dambujiko.
3 Mundhu anofura ngo mupasha ngaaregere kukwanya uta wake.
Ngapatame kuwanika mundhu anomuka akasimira nguvo yake yo simbi.
Mucaitira pena majaha aro.
Pejanyi masoca aro ese.
4 Ivona vanozourawa mu nyika yo Vakaradhiya,Vozobaiwa mu makwanja aro.
5 Iziraeri no Judha asipi noni ja Jehovha wo hondo Mwari wavo.
Nyika yavo* yakazara ngo ndava, mu mavonero o Mucena wo Iziraeri.
6 Budani mu Bhabhironi,Ponesanyi upenyu hwenyu.
Mucaurawa ngo ndava yo kuposa kwaro.
Ngokuti uwu imukuwo wo kuhwirijira ka Jehovha.
Iyena anozohwirijira zvarakaita.
7 Bhabhironi raita inga kopo yo goridhi mu nyara ya Jehovha;Irona rakarejeresa nyika yese.
Majinja akamwa vhinyu yaro;Ndizvona zvinoitisa kuti majinja ave mapenji.
8 Ngo civhumbu Bhabhironi rawa rophwanyika.
Cumbanyi ngo pamusoro paro!
Toranyi bharsamo kuti mutove kuhwajihwa kwaro, kangaije rinozorapika.”
9 “Takaeja kurapa Bhabhironi, asi irona arirapiki.
Ngatirisiye tipinde, umwe na umwe wedu ngaahwirire ku nyika yake.
Ngokuti rutongeso hwaro hwaguma mbhera kumatenga;Hwakhwira mbhera mu makore.
10 Jehovha wakativiisira ururami.
Viyanyi, ngatizivise mu Ziyoni zviito zva Jehovha Mwari wedu.”
11 “Rojeranyi mupasha, nasiriranyi muvhiko* yenyu.
Jehovha wamusa mwoyo yo majimambo o Medhiya,Ngokuti cido cake ngo cokuphwanya Bhabhironi.
Ngokuti uku ikuhwirijira kwa Jehovha, kuhwirijira ngo pamusoro po themberi yake.
12 Musiranyi muru* jo Bhabhironi citatijo.
Engejeranyi vangwariri, diranyi varindiri.
Itanyi kuti vandhu vakafindara, vanasirire.
Ngokuti Jehovha ndiyena wakaronga mazano ondhowo,Iyena anozokwanirisa zvaakagondesa ngo pamusoro po vagari vo Bhabhironi.”
13 “Maiwee! Mwanakaji anogara panyezuru po kumwa yakawanda,Anoupfumi wakawanda,Mukuwo wo kuwana mupocero wako waguma.
14 Jehovha wo hondo wapika ngo upenyu hwake eciti:
‘Ndinozokuzaja ngo vanarume, vanarume vakawanda maningi inga ndere,Ivona vanozokhuwa ngo kudakara ngokuti vanonga vakunyisa.’
15 Ndiyena wakasika nyika ngo simba rake,Wiya wakavangisa nyika ngo uzivi hwakeNo kuwaja matenga ngo kuzwisisa kwake.
16 Paanoita kuti izwi rake rizike,Kumwa yo kumatenga inotindhira,Iyena anoita kuti makore akhwire kudenga ecivha kumagumo o nyika.
Iyena anoita kuti nvura inona, ine no mbheni,Iyena anobudisa mbhepo mu ndau jaanoiviga.
17 Vandhu vese vanoita zviro vacikarangariri. Ivona avana zivo.
Vapfuri vese vanozonyowejeka ngo ndava yo zvithombe zvavo zvakavezwa;Ngokuti zvithombe zvavo zvo utare* ngo zvokunyepa,Izvona azvifemi.
18 Izvona azvina zvazvinobesera. Imabasa anofanera kushohwa.
Ikazoguma njiku yo kutongwa kwavo, izvona zvinozopejwa.
19 Ndhaka ya Jakobe asipi yo zviro izvi,Ngokuti Ndiyena wakaita zviro zvese,Hina, ndiyena ndonga yo ndhaka yake.
Jehovha wo hondo ndirona zina rake.”
20 “Iwewe uri cijito cangu co hondo, nvuti yangu kuitira kohwa,Ndecishandisa iwewe, ndinozophwanya-phwanya majinja.
Ndecishandisa iwewe, ndinozophwanya umambo.
21 Ndecishandisa iwewe, ndinozouraya haci no mupakiri wayo.
Ndecishandisa iwewe, ndinozophwanya ngoro* yo hondo no mupakiri wayo.
22 Ndecishandisa iwewe, ndinozotema-tema mwanarume no mwanakaji.
Ndecishandisa iwewe, ndinozotema-tema musharuka no mwana mudoko.
Ndecishandisa iwewe, ndinozotema-tema mujaha no musikane.
23 Ndecishandisa iwewe, ndinozotema-tema muhavisi no mushambi wakeNdecishandisa iwewe, ndinozotema-tema murimi no zvinyama zvake zvinorima.
Ndecishandisa iwewe, ndinozotema-tema magovhernadhori no vatongi.
24 Ndinozohwirijira Bhabhironi no vagari vese vo MukaradhiyaNgo ndava yo zvishaishi zvese zvavakaitira Ziyoni pamberi po majiso enyu,” izvi ndizvona zvinonanga Jehovha.
25 “Inini ndinozokuhwisa iwewe dundhu rinoparaja,” izvi ndizvona zvinonanga Jehovha,“Iwewe muparaji wo nyika yese.
Ndinozotambanuja nyara yangu kuti ndikuhwise. Ndinozokuhwisa pasi po buwe,Ndozokuita kuti uve dundhu rakapsa.”
26 “Vandhu avazotori kouri, buwe ro pacikina no buwe ro maambo,Ngokuti iwewe unozoita mathere kwenda no kwenda,” izvi ndizvona zvinonanga Jehovha.
27 “Diranyi citatijo mu nyika yaro.
Rijanyi mbhayapaya pakati po majinja.
Gajanyi majinja kuti arihwise.
Daninjanyi majimambo o Ararati, Mini no Ashikenazi kuti arihwise.
Gajanyi mutungamiriri wo masoca kuti arihwise.
Itanyi kuti haci jakawanda jiviye inga ndere doko.
28 Gajanyi majinja kuti arihwise,Gajanyi majimambo o Medhiya, magovhernadhori avo no vatongi vavo vese,Kubatanijavo no nyika javo jese javanotonga.
29 Nyika inozozungunyika yozotetemera,Ngokuti zvakarangarihwa ndi Jehovha ngo pamusoro po Bhabhironi zvinozokwanirisika,Kuti nyika yo Bhabhironi ive ciro cinothyisa, yotama mundhu anogaremo.
30 Masoca akawanda o Bhabhironi aima kuita hondo.
Iwona akagara mu ndau jawo jakavangiswa.
Simba rawo, rapera.
Iwona aita inga vanakaji.
Nyumba javo japera kupiswa.
Mugogo javo jaguhwa.
31 Ndhumwa iri kugogoma kuti iyena koosongana no ndhumwa imweni,Mundhu watumwa ari kugogoma kuti aende koosongana no mundhu umweni watumwa,Kuti vaenda koozivisa mambo wo Bhabhironi kuti dhorobha rake ratohwa mu mativi ese,
32 Ndau jo murambo jinoambukihwa jatohwa,Ngarava jo ndhokwe* japiswa ngo muriro,Masoca ari kuthya.”
33 Jehovha wo hondo Mwari wo Iziraeri anonanga kudari:
“Mwana wokaji wo Bhabhironi anozoita inga cimbuwa.*
Nguva yokucikwa-cikwa kwake ngo simba iri kuguma.
Mukuvo wo kukotora unozomugumira ngo kukasika.”
34 “Nebhukadhinezari* mambo wo Bhabhironi wandiha;Iyena wandivhiringija.
Wondikhandira pasi inga mujiyo ucina ciro.
Iyena wandimija inga zvinoithwa ngo nyoka yakakura;Wozaja ndani yake ngo zviro zvangu zvakanaka.
Iyena wandikhandira kunja.
35 ‘Mugari wo Ziyoni anonanga kudari: ‘Kukhuvaza kwavakaita no zvavakaita no muviri wangu, ngakuwire Bhabhironi!’
‘Mugari wo Jerusarema anonanga kudari: ‘Sangi yangu ngaiwire panyezuru po vagari vo Karadhiya!”
36 Ngo kudaro, Jehovha anonanga kudari:
“Ndiri kuimirira ndava yako,Ndinozohwirijira kuti ndikubese.
Ndinozoomesa jombe raro no mwimbo* jaro.
37 Bhabhironi rinozoita mututu wo mapuwe,Rinozoita ndau yokutizira imbhwa jo musora,Ciro cinothyisa no ciro cinorijisa mundozva,Ndau icikazogahwi ngo mundhu ari wese.
38 Vese vanozobhonga inga zvimbhondoro.
Vozocema inga zvivana zvo mbhondoro.”
39 “Pavanonga vakadakara maningi, ndinozovanasiririra mabuso ndozovarejeresa,Ivona vanozodakara;Tevere vanozovata hope jicikaperi,Vozokonehwa no kumuka,” izvi ndizvona zvinonanga Jehovha.
40 “Inini ndinozovauraya inga mavhuta ari kwenda kourawa,Inga mavhuta orume no mbuji.”
41 “Inga Sheshaki* wakanyiswa,Inga mundhu wiya waisimbwa ngo mundhu wese wakatohwa!
Inga Bhabhironi rakava ciro cinothyisa pakati po majinja!
42 Jombe rawira Bhabhironi.
Mavimbi aro afukija Bhabhironi.
43 Madhorobha aro aita ciro cinothyisa, nyika icina nvura no cipare.
Nyika icikagahwi ngo mundhu ari wese, no nyika icikapindi mundhu ari wese.
44 Ndinozorangarira ngo pamusoro po Bheri mu Bhabhironi,Ndinozovhisa mukanwa make zviro zvaamija.
Majinja aazoendi kwaari,Muru* wo Bhabhironi unozowa.
45 Budanyi pakati paro vandhu vangu!
Tizanyi muponese upenyu hwenyu ku ushungu unobwaka wa Jehovha!
46 Mucapera simba nee kuthya ngo ndava yo masoko amunozozwa mu nyika.
Pa gore kunozoguma masoko,Pa gore rimweni kunozoguma masoko amweni,Ngo pamusoro po ugevenga mu nyika no kuhwisana ko utongi no utongi.
47 Ngo kudaro, jiri kuguma njikuNjiku jokuti ndinozorangarira ngo pamusoro po zvithombe zvakavezwa zvo Bhabhironi.
Nyika yaro yese inozopserujwa,Vandhu varo vese vanozourawa no kuzowa pakati paro.
48 Matenga, nyika no zviro zvese zvirimo,Zvinozotamba ngo kudakara ngo ndava yo BhabhironiNgokuti vaparaji vanozovha ngo kanjikazi kuti varihwise,” izvi ndizvona zvinonanga Jehovha.
49 “Bhabhironi arizivi kuuraya vandhu vo Iziraeri basi,Asi Bhabhironi rakaurayavo vandhu vo nyika yese.
50 Imwimwi makaponaro pa kuurawa ngo banga, endereranyi mberi mecifamba, mucaima!
Ceukijanyi Jehovha, muri ndhambo,Jerusarema ngarive mu mwoyo menyu.”
51 “Takapserujwa ngokuti takazwa masoko aituka.
Kudodokeswa kwakafukija kumeso kwedu,Ngokuti vandhu vonyikanja vakaviya kuzohwisa ndau jakacena jo nyumba ya Jehovha.”
52 “Ngo kudaro, jiri kuguma njiku,” izvi ndizvona zvinonanga Jehovha,“Njiku jokuti ndinozorangarira ngo pamusoro po zvithombe zvaro zvakavezwa,Mu nyika jaro jese vandhu vakakhuvazika vanozogomera.”
53 “Pikija Bhabhironi rikakhwira mbhera kumatenga,Pikija rikavangisa rusingo jaro,Vanozoguma mbhera kondhoyo vaparaji vandinozotuma,” izvi ndizvona zvinonanga Jehovha.
54 “Izwanyi! Kuri kuzika izwi ro vandhu vari kucema recivha ku Bhabhironi,Izwi ro dambujiko guru recivha ku nyika yo Vakaradhiya,
55 Ngokuti Jehovha ari kuphwanya Bhabhironi,Iyena anozonyaraja izwi raro guru,Vavengi vake vanozozika inga kutindhira ko mavimbi o mujombe.
Vandhu vanozozwa izwi ravo.
56 Ngokuti muparaji anozoviya kuzohwisa Bhabhironi;Masoca aro akavanga anozotohwa ngo hasha,Mupasha javo jinozoguhwa,Ngokuti Jehovha ndi Mwari anohwirijira.
Iyena anozohwirijira kamare.
57 Ndinozorejeresa vatungamiriri varo, vazivi varo,Magovhernadhori aro, vatongi varo no masoca aro akavanga,Ivona vanozovata hope jicikaperi,Hope jokuti avazomuki,” izvi ndizvona zvinonanga Mambo uwo ano zina rokuti Jehovha wo hondo.
58 Jehovha wo hondo anonanga kudari:
“Muru* wo Bhabhironi pikija wakakura, iwona unozophwanywa mukuperera,Musuwo jawo pikija jakareba, jinozopiswa ngo muriro.
Vandhu vanozoshanda ngo simba mahara;Majinja anozozvinesa ngo zviro zvinozodihwa pa muriro.”
59 Aya ndiwona masoko o muporofeti Jeremiya aakavhunja Seraya mwana wa Neriya paakaenda na Zedhekiya Mambo wo Judha ku Bhabhironi, mugore rocirongomuna ro kutonga kwake. Neriya wainga mwana wa Maseya, Seraya wainga umwe wo mutungamiriri mukuru wa mambo.
60 Jeremiya wakatara mubhuku matambujiko ese aizoviira Bhabhironi. Masoko ese akatahwari, aitarihwa kuitira kuhwisa Bhabhironi.
61 Ngo kudaro, Jeremiya wakavhunja Seraya kudari: “Paunonga weciguma ku Bhabhironi no kuvona dhorobha iri, verengai ngo izwi guru masoko ese aya.
62 Nangai kudari: ‘Imwimwi Jehovha, ndimwi makananga kuti ndau iyi inozophwanyiwa, yozotama no ari wese anozogaremo, vandhu nee zvinyama. Iyona inozoita mathere kwenda no kwenda.’
63 Ukapeja kuverenga bhuku iri, risungirei no buwe, urikhandire pakati po murambo Eufrate.
64 Tevere nangai kudari: ‘Bhabhironi rinozondondomera ngo njira yondhoi, irona arizomukizve nga papsa ngo ndava yo matambujiko andiri kuriviisira; ivona vanozoremba.’”
Apa ndipona panoperera masoko a Jeremiya.
Masoko o Pasi
^ Iri rinoita inga zina rainga no matarihwe aishandisihwa Vakaradhiya. Zvinoreva: “Mwoyo jo Vandhu Vanomuka kuti Vandihwise.”
^ Apa pari kunangira nyika yo Vakaradhiya.
^ Kangaije: “zajanyi mukhwama jese jokudirira mupasha.”
^ Kana: “mupfimbiji.”
^ Kana: “zvakanyunguruswa.”
^ Kana: “kareta.”
^ Kana: “mabungwa.”
^ Kana: “civanje.”
^ Gama ngo Gama: “Nebhukadhirezari.” Aya ndiwona matarihwe amweni.
^ Kana: “sime.”
^ Iri rinoita inga zina rinomatarihwe aishandisihwa Bhabheri (Bhabhironi).
^ Kana: “Mupfimbiji.”
^ Kana: “Mupfimbiji.”
