Jeremiya 52:1-34
52 Zedhekiya wainga no makore anokwana kuita 21 paakava mambo. Iyena wakatonga mu Jerusarema ko makore anokwana kuita gumi na rimwe. Mai wake vaidaninjwa kuti Amutari mwana wa Jeremiya wo ku Ribhina.
2 Iyena wakaenderera mberi eciita zvakashata pamberi pa Jehovha, ecitevejera zvainga zvakaizwa ndi Jehoyakimi.
3 Zviro izvi zvakaitika mu Jerusarema no mu Judha ngokuti Jehovha wainga akacamwa, woguma pakuvagogomera pamberi pake. Zedhekiya wakapandukira mambo wo Bhabhironi.
4 Pa njiku yocigumi yo mweji wo cigumi wo gore ro cipfumbamwe ro kutonga ka Zedhekiya, Nebhukadhinezari mambo wo Bhabhironi no masoca ake ese vakaviya koohwisa Jerusarema. Ivona vakaritendeneja kuti varihwise vovaka muru* waitendeneja dhorobhero rese.
5 Dhorobha iri rakaenderera mberi rakatendenejwa mbhera mu gore ro cigumi na rimwe ro kutonga ka mambo Zedhekiya.
6 Pa njiku yo cipfumbamwe yo mweji wo cirongomuna, njara yainga yanyanya mu dhorobha. Vandhu vainga vacina zvokuha munyikemo.
7 Pejisire pakafununguhwa gwanja pa muru* wo dhorobha, masoca ese akatiza obuda mu dhorobha co usiku vofamba ngo gwanja riri pakati po muru muviri riri phedo no munda wa mambo. Pa mukuvo uwu Vakaradhiya vainga vakatendeneja dhorobha. Masoca aya akaenda ngo gwanja ro ku Arabha.
8 Asi masoca o Vakaradhiya akateverera mambo Zedhekiya vomubata mu mapani o zvipare zvo Jeriko. Masoca ake ese akapera kundhandhanika.
9 Ngo kudaro, vakabata mambo vomutora voenda naye kuna mambo wo Bhabhironi ku Ribhira mu nyika yo Hamati. Kondhoyo ndikona kaakatongehwa zviro zvaaidikana kuithwa.
10 Mambo wo Bhabhironi wakauraya vana va Zedhekiya pamberi pake. Wakaurayavo vatungamiriri vese vo Judha ku Ribhira.
11 Ngo kudaro, mambo wo Bhabhironi wakapofumaja majiso a Zedhekiya. Tevere wakamusunga ngo magaragajero o utare womutora kwenda naye ku Bhabhironi. Iyena wakaenderera mberi akafungihwa kondhoyo mbhera pa njiku yaakafa.
12 Mu njiku yocigumi yo mweji wo cishanu, zvinoreva, mu gore ro cigumi na pfumbamwe ro kutonga ka Nebhukadhinezari* mambo wo Bhabhironi, Nebhuzaradhani mutungamiriri wo varindiri, uwo wainga mushandiri wa mambo wo Bhabhironi wakanghwina mu Jerusarema.
13 Iyena wakapisa nyumba ya Jehovha, nyumba ya mambo no nyumba jese jo mu Jerusarema. Wakapisavo nyumba jese jakakura.
14 Muru* jese jaitendeneja Jerusarema jakaphwanyiwa ngo masoca ese o Vakaradhiya ainga no mutungamiriri wo varindiri.
15 Nebhuzaradhani mutungamiriri wo varindiri, wakaendesa kuuranda vandhu vanganani vainga varombo kubatanijavo no vandhu vainga vakasiiwa mu dhorobha. Iyena wakatorazve vandhu vainga vakatizira ku divi ra mambo wo Bhabhironi kubatanijavo no vavezi vese vaikwanisa ushoni kuita basa vainga vakasiiwa.
16 Asi Nebhuzaradhani mutungamiriri wo varindiri wakasiya mu nyikeyo vandhu vanganani vainga vecitambujika maningi, vaya vainga vacina no ciro kuti vashande mu munda yo muuvha no kuita basa ro kuvangirijwa.
17 Vakaradhiya vakaphwanya njiki jo mapuwe jo utare jo nyumba ya Jehovha kubatanijavo no zvikarinya. Vakaphwanyazve Tanki yo kumwa yainga pa nyumba ya Jehovha yaidanijwa kuti Jombe ro utare. Ivona vakatora utare hwese voenda nawo ku Bhabhironi.
18 Ivona vakatorazve mujiyo, foshoro, zviro zvokujima nazvo muriro, tijhera, kopo no mujiyo jese jo utare jaishandiswa mu themberi.
19 Mutungamiriri wo varindiri wakatoravo zvibasiya, mujiyo jo kudirira muriro, tijhera, mujiyo, zvigajikiro zvo zvibani, kopo no tijhera jakaizwa ngo goridhi rakaperera no jakaizwa ngo sirivha yakaperera.
20 Asi ngo pamusoro po njiki mbiri jo mapuwe, Tanki yo kumwa, n’gombe jorume jo utare jinokwana kuita 12 jaigara pasi po Tanki yo kumwa no zvikarinya, izvo zvainga zvakaizwa ndi Mambo Soromona kuitira nyumba ya Jehovha. Ivona avazivi kukwanisa kupima utare wo zviro zvese izvi.
21 Asi ngo pamusoro po njiki jo mapuwe, njiki imwe na imwe yo mapuwe yainga no makovhadho anokwana kuita 18 okureba, bote rokupima ndirona rainga no makovhadho anokwana kuita 12, raikwanisa kutendeneja njiki iji; utindi hwo njiki yokutanga hwainga hwo zvikunwe zvirongomuna, mukati mwayo mainga mucina ciro.
22 Cinemeso caidihwa panyezuru po njiki cainga co utare; cinemeso ici cainga no makovhadho mashanu o urebu; zvimaricera no mucero jo maromaa zvainga zvakatendeneja cinemeso ici, zvainga zvo utare. Njiki yocipiri yainga yakaezana no njiki yokutanga kubatanijavo no maromaa.
23 Mumbhiripiri mo njiki mainga no zviro zvakatojana no mucero yo maromaa zvinokwana kuita 96; zviro zvese zvakatojana no mucero yo maromaa zvainga mumbhiripiri no zvimaricera zvaikwana kuita 100.
24 Mutungamiriri wo varindiri wakatoravo Seraya mupiri mukuru, Sofoniya mupiri wo cipiri no vangwariri vatatu vo musuvo.
25 Iyena wakatora mudhorobha, mutongi umwe wainga mutungamiriri wo masoca, vapangiri vanomwe va mambo vainga mudhorobha, mutari wo mutungamiriri wo masoca uwo waitarira vandhu vo munyikeyo kuti vave masoca no vanarume vanokwana kuita 60 vo nyika yondhoyo vainga vaciri mudhorobha.
26 Nebhuzaradhani mutungamiriri wo varindiri wakavatora wovaendesa ku Ribhira kuna mambo wo Bhabhironi.
27 Mambo wo Bhabhironi wakavabaya wovauraya mu Ribhira mu nyika yo Hamati. Ngo kudaro, vandhu vo Judha vakavhiswa mu nyika yavo voendeswa kuuranda.
28 Uwu ngo mutengo wo vandhu vakaendeswa kuuranda ndi Nebhukadhinezari mambo wo Bhabhironi mu gore rocinomwe, Vajudha vanokwana kuita 3.023.
29 Mugore ro 18 ro kutonga ka mambo Nebhukadhinezari,* vandhu vanokwana kuita 832 vakatohwa mu Jerusarema.
30 Mugore ro 23 ro kutonga ka mambo Nebhukadhinezari,* Nebhuzaradhani mutungamiriri o varindiri wakatora Vajudha vanokwana kuita 745 wovaendesa kuuranda.
Vandhu vese vakaendeswa kuuranda vanokwana kuita 4.600.
31 Mu gore ro 37 ro uranda hwa Jehoyakimi Mambo wo Judha, mu njiku 25 yo mweji wo cigumi napiri, mugore rokuti Evhirimerodhaki wakava Mambo wo Bhabhironi, iyena wakasujunura Jehoyakimi Mambo wo Judha, omubudisa mukadheya.
32 Iyena wakabhuya naye mu njira yakapfava, womudira pacigaro co umambo kupinda majimambo amweni ese aainga nawo mu Bhabhironi.
33 Ngo kudaro, Jehoyakimi wakavhisa nguvo jake jaaisimira paainga mukadheya, kuvhira pondhopo iyena waiha pameza ya mambo njiku jese, mbhera njiku yaakafa.
34 Njiku jese iyena waipuwa zvokuha ndi mambo wo Bhabhironi, njiku jese jo upenyu hwake, mbhera pa njiku yaakafa.
Masoko o Pasi
^ Kana: “mupfimbiji.”
^ Kana: “mupfimbiji.”
^ Gama ngo Gama: “Nhebhukadhirezari.” Aya ndiwona matarihwe amweni.
^ Kana: “Mupfimbiji.”
^ Gama ngo Gama: “Nhebhukadhirezari.” Aya ndiwona matarihwe amweni.
^ Gama ngo Gama: “Nhebhukadhirezari.” Aya ndiwona matarihwe amweni.
