Jeremiya 7:1-34
7 Jehovha wakabhuya na Jeremiya eciti:
2 “Imai pa musuvo wo nyumba ya Jehovha uzivise masoko aya: ‘Izwanyi soko ra Jehovha imwimwi mwese vandhu vo Judha, munonghwina ngo pamusuvo iji kuti munamate Jehovha.
3 Izvi ndizvona zvinonanga Jehovha wo hondo Mwari wo Vaiziraeri: “Cinjanyi makwanja enyu akashata no zviito zvenyu zvakashata, muite zviro zvakanaka. Mukadaro, inini ndinozomutendera kuti muenderere mberi mecigara mu nyika iyi.
4 Mucathemba masoko o kucengeja meciti: ‘Iyi ithemberi ya Jehovha, themberi ya Jehovha, themberi ya Jehovha!’
5 Kudari imwimwi mukacinja makwanja enyu akashata no zviito zvenyu zvakashata, kudari imwimwi mukatonga ndava jo vandhu mu njira yakarurama,
6 kudari mukatama kubzinyirira vandhu vo nyikanja, ndherera no noni, kudari mukatama kuuraya vandhu vacina ndava mu nyika iyi, kudari imwimwi mukatama kunamata zvimwari zvimweni mecijikhuvaza pacenyu,
7 inini ndinozotendera kuti imwimwi muenderere mberi mecigara mu nyika ino yandakapa majicekuru enyu mbhera narini.”’”
8 “Asi imwimwi muri kuthemba magama anocengeja. Izvi azvizomubeseri nee padoko.
9 Kureva kuti imwimwi mungaba, kuuraya, kuita upombo, kuita mbhiko yo kunyepa, kuita mupiro kuna Bhaari no kunamata zvimwari zvimweni zvamainga mucikazivi,
10 tevere moviya pamberi pangu, mu nyumba iyi inozivika ngo zina rangu monanga kudari: ‘Tinozoponeswa,’ pikija no zviro zvese izvi zvakashata zvamakaitari here?
11 Kureva kuti nyumba iyi inozivika ngo zina rangu, yaa nyumba yo mambavha mu mavonero enyu here? Zivanyi kuti inini kamare ndiri kuzvivona zviro zvese izvi,” izvi ndizvona zvinonanga Jehovha.
12 “‘Ngo kudaro, wari endanyi ku Shiro, ku ndau yangu yandakatanga kusana kuti izivike ngo zina rangu, muvone zvandakaiitira ngo ndava yo ushati wo vandhu vangu Vaiziraeri.
13 Asi imwimwi, makaenderera mberi meciita zviro zvese izvi,’ izvi ndizvona zvinonanga Jehovha, ‘pikija inini ndakabhuya nemwi kuphinda no kuphinda, imwimwi amuzivi kundizwa. Inini ndakaenderera mberi ndecimudaninja, asi imwimwi amucaindidavirepi.
14 Ngo kudaro, inini ndinozoita zviro zvimwezvo zvandakaita ku Shiro. Ndinozoita izvi pa nyumba inozivika ngo zina rangu, nyumba yamunothemba, nyika yandakapa imwimwi no majicekuru enyu.
15 Ndinozomugogomera pamberi pangu, inga kugogomera kwandakaita hama jenyu jese, mubarihwana wese wo Efraimi.’
16 “Asi iwewe ucaita mukumbiro ngo ndava yo vandhu ava. Ucacema, ucaita mukumbiro nee ucadeketera ngo ndava yavo, ngokuti inini andizokuzwi.
17 Iwewe auripi kuvona zvavari kuita mu madhorobha o Judha no mu makwanja o Jerusarema here?
18 Vana vari kuunganija huni, majibaba avo ari kubasira* muriro, vakaji vavo vari kukanya upfu kuti vaite mabhoro kuti vaite mupiro kuna Vahosi vo Kudenga.* Ivona vari kudurura mupiro yo doro ku zvimwari zvimweni kuti vandituke.
19 ‘Kureva kuti ivona vari kutambuja inini?’ izvi ndizvona zvinonanga Jehovha. ‘Avaripi kujitambuja vega, vecijinyoweja here?’
20 Ngo kudaro, Mambo Mukuru-kuru Jehovha anonanga kudari: ‘Vonanyi! Ndinozodurura ushungu wangu no kucamwa kwangu panyezuru po nyika iyi, panyezuru po vandhu, po zvinyama, po mamuti o mumunda no panyezuru po mucero jo panyika. Ushungu wangu unozobwaka, iwona auzojimwi.’
21 “Jehovha wo hondo, Mwari wo Vaiziraeri anonanga kudari: ‘Endereranyi mberi, batanijanyi zvipo zvo kupiswa no mupiro jenyu jimweni. Imwimwi ihanyi nyamejo.
22 Ngokuti mu njiku yandakavhisa majicekuru enyu mu nyika yo Ejipita, inini andizivi kunanga nee kuvavhunja zviri zvese ngo pamusoro po zvipo zvo kupiswa no mupiro.
23 Asi zvandakavavhunja nga izvi: “Zwiranyi izwi rangu, inini ndinozova Mwari wenyu, imwimwi munozova vandhu vangu. Nguva jese munodikana kufamba mugwanja randinomuvhunja, kuti zviro zvese zvimufambire ushoni.”’
24 Asi ivona avazivi kuzwira nee kuzwisisa; kunja kwa izvi, vakatevera mazano avo, vakavomesa musoro votevera mwoyo yavo yakashata, ivona vaifamba vecihwirira sure, avacaiendepi kumbeji,
25 kuvhira pa njiku yandakavhisa majicekuru enyu mu Ejipita mbhera nyamasi. Ngo kudaro, ndakaenderera mberi ndecitumira kwamuri njiku jese vashandiri vangu vese vaporofeti, kuphinda no kuphinda.
26 Asi vandhu ava vakaramba kundizwira, nee kuzwisisa. Kusiyapo izvi, ivona vakavomesa musoro javo, voita zviro zvakashata kupinda majicekuru avo!
27 “Iwewe unozovavhunja masoko ese aya, asi ivona avazokuzwiri. Iwewe unozovadaninja, asi ivona avazokudaviri.
28 Iwewe unozovavhunja kudari: ‘Iri ijinja ricizivi kuzwira izwi ra Jehovha Mwari waro, roramba kupangihwa. Irona arizivizve kugondeka, pakati paro apana anobhuya ngo pamusoro po ugondeki.’
29 “Gundai vhuji rako urisveje, imbai ndumbo yo ciriro mu zvimatundhu zvicina sora, ngokuti Jehovha waramba mubarihwana uwu wakamunyangajisa. Iyena anozousiya.
30 ‘Ngokuti vandhu vo Judha vakaita zviro zvakashata pamberi pangu,’ izvi ndizvona zvinonanga Jehovha. ‘Ivona vakadira zvithombe zvavo zvinonyangajisa mu nyumba inozivika ngo zina rangu, kuti vaisvipise.
31 Ivona vakavaka ndau jakakhwirira jo Tofeti, iri mu Bani ro mwana wa Hinomi,* kuti vapise vana vavo vorume no vokaji, zviro zvandicizivi kumbovavhunja nee kurangarira mu mwoyo mwangu.’
32 “‘Ngo kudaro, jiri kuguma njiku,’ izvi ndizvona zvinonanga Jehovha, ‘njiku jokuti ndau iyi, aizodaninjwizve kuti Tofeti kana Bani ro mwana wa Hinomi,* asi inozodaninjwa Bani Rinouraihwa vandhu. Ivona vanozoviga vandhu vakafa mu Tofeti, mbhera motama kuwanikazve ndau yo kuviga vandhu vakafa.
33 Mutembo jo vandhu ava, jinozova zvokuha kuitira shiri jo kumatenga no zvinyama zvo panyika, apana mundhu anozozvigogomera.
34 Inini ndinozopeja vaya vanokhuwa ngo kutamba no vaya vanokhuwa ngo kudakara; izwi ro murovori no izwi ro murovohwi mu madhorobha o Judha no mu makwanja o Jerusarema, ngokuti nyika iyi inozoita mathere.’”
Masoko o Pasi
^ Kana: “kubwakija.”
^ Iri izina ro kureremeja ra mwari wokaji wainamatwa ngo Vaiziraeri vakapanduka. Zvinovoneka kuti ivona vainanga kuti mwari uu ndiyena waiita kuti vanakaji vabare.
^ Vonanyi Kudurujihwa ko Magama pa gama rokuti “Gehena.”
^ Vonanyi Kudurujihwa ko Magama pa gama rokuti “Gehena.”
