Jeremiya 8:1-22
8 “Pa mukuwo wondhowo,” izvi ndizvona zvinonanga Jehovha, “maphondo* o majimambo o Judha, maphondo o vatungamiriri, maphondo o vapiri, maphondo o vaporofeti no maphondo o vagari vo Jerusarema, anozovhiswa mu makuva avo.
2 Maphondo avo ese anozondhandhaniswa pasi po zuva, pasi po mweji no pasi po zviro zvese zviri kumatenga,* zviro zvavaida, zvavaishandira, zvavaiteverera no kupsanga pamberi po zviro zvavainamata. Maphondo avo aazobojehwi nee aazovigwi. Iwona anozoita ndimo pa nyika.”
3 “Pa ndau jese jandinozomandhandhanisira, vandhu vanozopona pakati po jinja iri rakashata vanozosana kufa kusiyapo kusana kupona”, izvi ndizvona zvinonanga Jehovha wo hondo.
4 “Vavhunjei kudari, ‘izvi ndizvona zvinonanga Jehovha:
“Kureva kuti ivona vakazowa, avazokwanisizve kumuka here?
Kudari mundhu akahwirira sure, kureva kuti mundhu umweni aazohwiririvo sure?
5 Ngenyi vandhu ava vo Jerusarema vanoenderera mberi vacizivi kugondeka?
Ivona vanobatisisa manyepo;Voramba kuhwirira sure.
6 Inini ndakateya njeve, ndoenderera mberi ndecipurutana asi mavereketerero avo acaingepi akarungama.
Apana umwe wavo wakakhauya ku zvishaishi zvake nee apana wakajivhunjisa kudari: ‘Ndaitenyi?’
Vese vanoenderera mberi veciita zviro zvinoitwa ngo vazinji inga haci jiri kugogoma kwenda ku hondo.
7 Pikija thupu riri kumatenga, rinoziva mukuwo waro;Njiva, cinyengwa-nyengwa no mutitiyori* zvinobatisisa mukuwo wazvo wokuhwirira.
Asi vandhu vangu kamare, avazwisisi matongero a Jehovha.”’
8 ‘Ngenyi mungananga kudari: “Itusu tino uzivi, tinothya mutemo wa Jehovha?”
Zvokadi ngo zvokuti vatari vari kushandisa rapi javo kuti vatare manyepo basi.
9 Vazivi vakapserujwa.
Ivona vakathya maningi, ngo kudaro, vanozobatwa ngo murau.
Ivona vakaramba soko ra Jehovha;Uzivi wavo uri kwapi?
10 Ngo kudaro, vakaji vavo ndinozovapa vanarume vamweni,Munda javo ndinozojipa vandhu vamweni;Ngokuti kuvhira ku vana vadoko mbhera ku madhodha avo, vese vanowana ciro ngo njira icizivi kururama;Kuvhira kumuporofeti mbhera ku mupiri, vese vanoita zviro zvinocengeja.
11 Vanoeja kurapa zvivonje zvo mwana wokaji wo vandhu vangu vecinanga kudari:
“Kuno runyararo! Kuno runyararo!”
Kuveni akuna runyararo.
12 Kureva kuti ivona avapseruki ngo zviro zvakashata zvavakaita?
Ivona avapseruki!
Nee avazvizivi zvinoreva kupseruka!
Ngo kudaro, vanozowira pa vaya vakawa.
Vanozokhugunyika pandinozovapanica,’ izvi ndizvona zvinonanga Jehovha.
13 ‘Pandinozovaunganija, ndinozoita kuti vapere,’ izvi ndizvona zvinonanga Jehovha.
‘Apazosari uvha pa muuvha, nee apazosari mafigu pa mufigu, masakani anozofota.
Ivona vanozoruza zviro zvandakavapa.’”
14 “Tiri kugarirenyi pano?
Ngatibatane tinghwine mu madhorobha akavangiswa kuti tifiremo.
Ngokuti Jehovha Mwari wedu anoda kutipeja,Jehovha ari kutipa kumwa ino nvenene kuti tiimwe.
Ngokuti takamushaishira.
15 Taiimira runyararo, asi akuna cakanaka cakaviya,Taiimira mukuvo wo kuraphwa, asi kuno ciro cinothyisa basi!
16 Ku Dhani kuri kuzika kurira ko haci jo muvengi.
Kurira ko haci javo jorume,Kuri kuzungunyisa nyika yese.
Vavengi vanonghwina, vophwanya nyika iyi no zviro zvese zvirimo.
Vanophwanyavo dhorobha vopeja vagari vomudhorobhemo.”
17 “Ngokuti ndiri kutumira nyoka komuri,Nyoka jino nvenene, jicikathyiswi ngo masaramuso.
Ijona jinozomuruma,” izvi ndizvona zvinonanga Jehovha.
18 Ushungu wangu aurapiki;Mwoyo wangu uri kuhwaja.
19 Kuri kuzika izwi riri kukumbira besero riri ku nyika yo ndhambo,Izwi ro vandhu vangu, reciti:
“Kureva kuti Jehovha aaripi mu Ziyoni here?
Mambo wake aaripi mondhomo?”
“Ngenyi ivona vari kundituka vecishandisa zvithombe zvavo zvakavezwa,Ngo zvimwari zvavo zvo nyikanja zvicina zvazvinobesera?”
20 “Mukuwo wo kukotora wapera, cirimo capera,Asi itusu atito taponeswa!”
21 Ndiri kuhwajihwa maningi ngo ndava yo zvivonje zvo vandhu vangu;*Ndakanyangajwa maningi.
Inini ndabatwa ngo kuthya.
22 Kureva kuti mu Giriyadhi amuna bharsamo?*
Kureva kuti mondhomo amuna murapi?*
Waro ngenyi vandhu vangu avazivi kurapika?
Masoko o Pasi
^ Vonanyi Kudurujihwa ko Magama.
^ Gama ngo Gama: “masoca ese o kumatenga.”
^ Iri izina ro shiri.
^ Kana: “kukhuvazwa ko vandhu vangu.”
^ Kana: “mafuta anotova panohwaja.”
^ Kana: “medhiko.”
