Jobe 11:1-20
11 Zofari Munaamati, wakapingura eciti:
2 “Iwewe wavereketa zvizinji maningi, unorangarira kuti taizogara takanyararisa here?Unorangarira kuti ungawana razau ngo kuvereketa zvizinji?
3 Unorangarira kuti masoko acina shwiro awaperari kuvereketa angaitisa kuti vandhu vanyarare?
Apana angakupangira ngo kushora kwako here?
4 Iwewe unoti: ‘Zvandinojijisari ndizvona,Ndakacena pamberi pake.’
5 Zvaizodini kudari Mwari akavereketaWoshamisa muromo wake kuti averekete na iwewe!
6 Ngo kudaro iyena waizokuvhunja zvinoita kuti mundhu ave no uzivi,Ngokuti pano zviro zvakawanda maningi zvinodikana kujijwa ngo pamusoro po uzivi hwokadi.
Waizozwisisa kuti Mwari anokanganwa zvaunoposa.
7 Unokwanisa kuziva zviro zva Mwari zvinonesa kuzwisisa here?Kana kuziva zvese ngo pamusoro pa Mwari Womasimba Ese?
8 Uzivi, hwakakura maningi kupinda gore. Iwewe ungaitenyi?
Ihwona hwakakura maningi kupinda Guva.* Iwewe ungazivenyi?
9 Ihwona hwakakura maningi kupinda nyikaHwoshama maningi kupinda jombe.
10 Kudari iyena akaviya kuzosunga mundhu wopsaka mutongi,Ndiyani angamurambisa?
11 Ngokuti anonasa kuziva vandhu pavanonga vecicengejera.
Kudari akavona mundhu eciita zvakashata, kureva kuti angazvisiya zvakadaro here?
12 Nee benji raizozwisisaKudari rikavona mbongoyo yo musora yecibara mundhu.
13 Zvaizodini kudari nowainasirira mwoyo wakoWotambanuja nyara jako kwaari?
14 Kudari nyara jako jeciita zvakashata jidirei ndhambo,Ucatendera zvakashata kuti zvigare mutende yako.
15 Ngo kudaro, unozomusa musoro ucikapseruki;Unozoenderera mberi wakavanga ucikathyi.
16 Unozokanganwa matambujiko ako;Iwewe unozomarangarira inga kumwa yaipopoma yecipinda ngo pauriwaro.
17 Upenyu hwako hunozojeka inga comasikati;Cidima caho cinozova inga mangwanani.
18 Unozogonda ngokuti kunovetero,Unozoringisa kwese kwese, perapo wovata ucikathyi
19 Iwewe unozovata pacina mundhu anokuthyisa,Vandhu vazinji vanozoda kudakarihwa ndiwe.
20 Majiso o vakashata aazovoni ushoni;Ivona avazowani ndau yo kutizira,
Vetero yavanozova nayo basi i rufu.”
Masoko o Pasi
^ Kana: “Sheori.” Kana kuti, kufa kunoita vandhu vese. Vonanyi Kudurujihwa ko Magama.
