Johani 13:1-38
13 Mutambo wo Phasika ucito waguma, Jesu wakaziva kuti nguva yake yakwana yo kuti asiye nyika ino, aende ka Baba. Zvecivoneka kuti Jesu waida vateveri vake, iyena wakavada mbhera kumagumo.
2 Pavainga vecirarira, Dhiyabhu wainga adira kuda kwake mu mwoyo mwa Judha Iskariyote, mwana wa Simoni, kuti atengese Jesu.
3 Ngo kudaro, Jesu waiziva kuti Baba vainga vamupa zviro zvese mu nyara jake, iyena wakavha ka Mwari, wainga woda kuhwirira ka Mwari.
4 Jesu wakamuka pa meza wodira pa mutivi nguvo jake. Iyena wakatora thaura* woripombera mu cihunu make.
5 Perepo wakadira kumwa mu cibasiya wotanga kusuka soka jo vajiji vake, wotora thaura* raasungiraya mu cihunu wopukuta ndirona soka javo.
6 Iyena wakaguma painga na Simoni Pedhru. Simoni Pedhru wakamuvhunjisa kuti: “Mambo, imwimwi muri kuda kusuka soka jangu?”
7 Jesu wakamudavira kuti: “Zvandiri kuitari amuzvizwisisi wari uno, asi munozozvizwisisa pasure po zviro izvi.”
8 Pedhru wakamuvhunja kuti: “Andizotenderi kuti musuke soka jangu.” Jesu wakamuvhunja kuti: “Ndikatama kusuka soka jako auzovi na inini.”
9 Simoni Pedhru wakamuvhunja kuti: “Mambo, sukanyi henyu zvese; makumbo angu, nyara jangu no musoro wangu.”
10 Jesu wakamuvhunja kuti: “Mundhu anonga asamba, anodikana kusuka soka basi, ngokuti muviri wakacena. Imwimwi makacena, asi asipi mwese makacena.”
11 Ngokuti waimuziva mundhu waizomutengesa. Ndizvona zvakaitisa kuti anange kuti: “Asipi mwese makacena.”
12 Pasure po kusuka soka javo no kusimira nguvo jake, iyena wakagarazve pa meza, wovavhunja kuti: “Mazwisisa zvandamuitirari?
13 Imwimwi munondidanija kuti, ‘Mujijisi’ kana kuti, ‘Mambo,’ muri kunanga izvona, ngokuti ndini.
14 Waro kudari inini, Mambo no Mujijisi, ndamusuka soka, imwimwivo munodikana kusukanavo soka.
15 Ndagaja muezaniso kwamuri. Zvandamuitari, munodikana kuitavo zvondhozvo.
16 Ndinomuvhunja zvokadi kuti, muranda asipi mukuru kupinda patarau wake. Anotumwa asipizve mukuru kupinda wamutumaro.
17 Kudari meciziva zviro izvi, muno mudakaro kudari mukazviita.
18 Andiripi kubhuya ngo pamusoro penyu mwese; ndinovaziva vandakakheta. Asi izvi zvaitika kuti matahwa akwanirisike: ‘Wiya waiha pau yangu ndiyena wandipandukira.’*
19 Kuvhira wari, ndiri kumuvhunja zvicito zvaitika, kuti pazvinozoitika, imwimwi mutende kuti inini ndini iyena.
20 Ndinomuvhunja zvokadi kuti, wiya anoashira mundhu wandinotuma, anondiashiravo, wiya anondiashira, anoashiravo Wiya wakandituma.”
21 Paakapera kunanga zviro izvi, Jesu wakatanga kuhwajihwa maningi, wonanga kuti: “Ndinomuvhunja zvokadi kuti, umwe wenyu anozonditengesa.”
22 Vajiji vakatanga kusotana, vacikamuzivi wainangwaro.
23 Umwe wo vajiji vake, waidiwa maningi ndi Jesu, waigara phedo na* Jesu.
24 Ngo kudaro, Simoni Pedhru wakadaninja mujiji uwu ngo musoro wake womuvhunja kuti: “Tivhunjei, ndiyani waari kunangari.”
25 Mujiji uwu, wakacamira pa cifuva ca Jesu, wovhunjisa kuti: “Mambo, ndiyani hake?”
26 Jesu wakadavira kuti: “Ndi wiya wandinozopa dimbu ro pau yandinonga ndaseva.” Ngo kudaro, paakapera kuseva ngo dimbu ro pau iya, iyena wakaripekeja Judha, mwana wa Simoni Iskariyote.
27 Judha paakapera kutora dimbu ro pau riya, wakanghwinwa ndi Sathana. Ngo kudaro, Jesu wakati kwaari: “Zvauri kuitari, zviitei ngo kukasika.”
28 Apana na umwe wainga pameza wakakwanisa kuziva zvakamuitisaro kuti amuvhunje zvondhozvo.
29 Vamweni, vairangarira kuti, zvecivoneka kuti Judha ndiyena waiviga bhokiso ro mare, Jesu waimuvhunja kuti: “Tengai zvinodiwa pa mutambo,” kana kuti waidikana kupekeja ciri cese varombo.
30 Paakapera kuashira dimbu ro pau, iyena wakabuda ngo kukasika. Hwainga usiku.
31 Paakapinda, Jesu wakati: “Wari Mwana wo mundhu wakujwa, Mwari wakujwavo ngo pamusoro pake.
32 Mwari anozomukuja, anozomukuja ngo kukasika.
33 Vana vangu, ndasara no mukuvo mushomani na imwimwi. Imwimwi munozondipsaka; asi inga zvakavhunjwa Vajudha kuti, ‘Kwandinoenda, imwimwi amukwanisi kugumeyo,’ inini ndiri kumuvhunjavo zvondhozvo.
34 Ndiri kumupa mupango mupsa, kuti mudisane ngocenyu; inga zvandakamuda, imwimwivo disananyi ngocenyu.
35 Mukaita kudaro, vese vanozoziva kuti imwimwi muri vajiji vangu: Kudari mukadisana ngo cenyu.”
36 Simoni Pedhru wakamuvhunjisa kuti: “Mambo, muri kwenda kwapi?”Jesu wakadavira kuti: “Kwandiri kwendari aukwanisi kunditevera wari uno, asi unozonditevera kumbejiyo.”
37 Pedhru wakamuvhunjisa kuti: “Mambo, andingakwanisi ngenyi kumutevera wari uno? Ndinozopira upenyu hwangu ngo ndava yenyu.”
38 Jesu wakapingura kuti: “Unocokwadi here kuti unozopira upenyu hwako ngo ndava yangu?” Ndinokuvhunja zvokadi kuti jongwe ricito rarira, unozondiramba katatu.”
Masoko o Pasi
^ tuwaya.
^ tuwaya.
^ Gama ngo Gama: “wandimusira cisisinindho cake.”
^ Gama ngo Gama: “waigara pacifuva ca.”
