Johani 14:1-31
14 Mucaregera mwoyo yenyu yecitambujika. Tendanyi Mwari; nditendenyivo.
2 Ku nyumba ya Baba wangu kuno ndau zinji jo kugara. Nokwainga kucina, ndaizomuvhunja, ngokuti ndiri kwenda konasirira ndau jenyu.
3 Cimwenizve, ndikaenda konasirira ndau jenyu, ndinozoviyazve, topinda tese, kuti pandinonga ndiri muvepovo.
4 Imwimwi munoriziva gwanja ro kwandiri kwenda.”
5 Tomasi wakavhunjisa kuti: “Mambo, atikuzivi kwamunoenda. Waro tingarizivisa kudini gwanja rakona?”
6 Jesu wakati kwaari: “Ndini gwanja, cokwadi no upenyu. Akuna mundhu anoenda kuna Baba acikapindi ndini.”
7 Kudari nomaindiziva, maizozivavo Babangu; kuvhira wari, imwimwi mavaziva no kuvavona.”
8 Firipi wakati kwaari: “Mambo, titatijenyi Baba, kuti tikhohwe.”
9 Jesu wakamuvhunja kuti: “Ndagara na imwimwi mukuvo wese uwu. Firipi! Nawari auto wandiziva? Mundhu wese anondivona, watovonavo Baba. Waro ngenyi unondikumbirazve kuti: ‘Titatijenyi Baba’?
10 Autendi kuti inini ndiri pamwepo na Baba, Baba vari pamwepo na inini? Zvandiri kumuvhunjari azvivhi kwandiri. Asi Baba vari pamwepo na inini, ndivona vari kuita mabasa avo.
11 Nditendei kuti inini ndiri pamwepo na Baba. Baba vari pamwepo na inini; kudari ucikatendi izvi, tendai ngo pamusoro po mabasewo basi.
12 Ndinomuvhunja zvokadi kuti mundhu wese anonditenda anotendavo mabasa andinoita; iyena anozoita mabasa makuru kupinda aya, ngokuti ndiri kwenda kuna Baba.
13 Cimwenizve, ciri cese camunokumbira ngo zina rangu, ndinozociita, kuti Baba vakujwe ngo ndava yo Mwana.
14 Kudari mukakumbira ciri cese ngo zina rangu, ndinozociita.
15 “Kudari mukandida, munozozwira mupango yangu.
16 Inini ndinozokumbira Baba, ivona vanozomupa mubeseri* umweni anozova na imwimwi mbhera narini.
17 Mubeseri uwu, ndiwona mujimu wo cokwadi, iwona auashihwi ngo nyika, ngokuti iyona aiuvoni nee kuuziva. Imwimwi munouziva, ngokuti unogara na imwimwi. Iwona uri mukati mwenyu.
18 Inini andizomusiyi muri mega. Ndinozoviya kwamuri.
19 Sambiri pano nyika aizondivonizve, asi imwimwi munozondivona, ngokuti inini ndino upenyu, imwimwi muno upenyuvo.
20 Mu njiku yondhoyo, imwimwi munozoziva kuti inini ndiri pamwepo na Babangu. Imwimwi muri pamwepo na inini. Inini ndiri pamwepo na imwimwi.
21 Mundhu ano mupango yangu no kuizwira, mundhu wondhowo anondida. Mundhu anondida anozodiwa ndi Babangu. Inini ndinozomudavo ndozojivonesa pambhene kwaari.”
22 Judha, aciripi Iskariyote, wakati kwaari: “Mambo, kwaitikenyi kuti mude kujitatija pambhene kwatiri, kuciripi kujitatija ku nyika?”
23 Jesu wakamudavira kuti: “Kudari mundhu ecindida, anozozwira masoko angu, Babangu vanozomuda, itusu tinozoviya kwaari, togara na iyena.
24 Wiya acikandidi, aazwiri masoko angu. Masoko amunozwari asipi angu, asi ngo a Baba vakandituma.
25 “Ndinomuvhunja zviro izvi pandiciri na imwimwi.
26 Asi mubeseri, mujimu mucena, unozotumwa ndi Baba ngo zina rangu, ndiwona unozomujijisa zviro zvese no kumuitisa kuti muceuje zviro zvese zvandakamuvhunja.
27 Ndinomusiira runyararo; ndinomupekeja runyararo hwangu. Andimupi ngo mapire ainoita nyika. Mucaregera mwoyo yenyu yecitambujika. Mucairegera yecithya.
28 Mazvizwa zvandamuvhunja kuti: ‘Ndiri kupinda, ndinozoviyazve kwamuri.’ Kudari nomaindida, maizodakara ngo ndava yokuti ndiri kuenda kuna Baba, ngokuti Baba vakuru kupinda inini.
29 Ngo kudaro, ndamuvhunja zviro izvi zvicito zvaitika, kuti muzotende pazvinozoitika.
30 Andicabhuizve maningi na imwimwi ngokuti mutongi wo nyika ari kuviya, iyena aana simba na inini.
31 Asi kuti nyika izive kuti ndino rudo na Baba, ndiri kuita inga zvandakavhunjwa ndi Baba kuti ndiite. Mukanyi, tibude pano.
Masoko o Pasi
^ Kana: “muembejeri.”
