Johani 15:1-27
15 “Inini ndiri muuvha wo cokwadi, Babangu ndivona murimi.
2 Ivona vanotema matavi ese akabatana na inini acikabari mucero no kuphazira* matavi ese anobara mucero, kuti abare mucero jakawanda.
3 Imwimwi makacena kare ngo pamusoro po masoko andakamuvhunja.
4 Garanyi pamwepo na inini, inini ndinozogaravo pamwepo na imwimwi. Zvecivoneka kuti davi aribari mucero riri rega riciripi pa muuvha, imwimwi amubarivo mucero mukatama kuva pamwepo na inini.
5 Inini ndiri muuvha, imwimwi muri matavi. Mundhu wese anogara akabatana na inini, inini ndobatanavo naye, ndiyena anobara mucero jakawanda; ngokuti mukatama kubatana na inini apana camunoita.
6 Kudari mundhu akatama kugara akabatana na inini, anozokhandihwa kunja inga davi, wooma. Vandhu vanozobojera matavi aya vomakhandira pa muriro, opsa.
7 Kudari mukagara makabatana pamwepo na inini, masoko angu ogara mukati mwenyu, kumbiranyi ciri cese camunoda, icona cinozomuitikira.
8 Izvo zvinokuja Babangu, kuti mubare mucero mukuvo wese, motatija kuti muri vajiji vangu.
9 Inini ndinomuda inga zvandakadiwa ndi Baba; garanyi mu rudo hwangu.
10 Kudari mukazwira mupango yangu, munozogara mu rudo hwangu, inga zvandinozwira mupango ya Baba, ndogara mu rudo hwavo.
11 “Ndamuvhunja zviro izvi kuti mudakaro wangu uve mukati mwenyu, mozara ngo kudakara kondhoko.
12 Mupango wangu nga uwu: Disananyi ngocenyu inga zvandakamuda.
13 Apana mundhu ano rudo hukuru kupinda uhu, kuti apire upenyu hwake ngo ndava yo shamwari jake.
14 Imwimwi muri shamwari jangu, kudari mukaita zvandinomuvhunjari.
15 Andimudanijizve varanda, ngokuti muranda aazivi zvinoita patarau wake. Inini ndinomudanija shamwari, ngokuti ndakamuzivisa zviro zvese zvandakazwa ndi Babangu.
16 Andimwipi makandisana, asi ndini ndakamusana, ndomugaja kuti muende, mogara mecibara mucero, kuti mucero jenyu jitame kupera. Kuti ciri cese camunokumbira Baba ngo zina rangu, ivona vamupe.
17 “Ndinomuvhunja zviro izvi, kuti mudisane ngocenyu.
18 Kudari nyika ikamunyenya, zivanyi kuti yakandinyenya icito yamunyenya.
19 Nomaiita divi ro nyika, nyika yaizomuda ngokuti muri vayo. Zvecivoneka kuti amuiti divi ro nyika, asi inini ndakamusana mu nyika, nyika inomunyenya ngo ndava yondhoyi.
20 Mucakanganwa masoko andakamuvhunja okuti: Muranda asipi mukuru kupinda patarau wake. Zvecivoneka kuti vakanditeverera, ivona vanozomutevereravo, kudari vakazwira masoko angu, vanozozwiravo masoko enyu.
21 Asi ivona vanozomuitira zviro zvese izvi ngo ndava yo zina rangu, ngokuti avamuzivi Wakandituma.
22 Nokwainga kuti andizivi kuviya, ndobhuya navo, avacaizova no cishaishi. Asi wari avana marambire avangaita cishaishi cavo.
23 Wiya anondinyenya, anonyenyavo Babangu.
24 Nokwainga kuti andizivi kuita mabasa acizivi kuithwa ngo ari wese pakati pavo, avacaizova no cishaishi; asi ivona vakavona inini na Babangu, votiramba.
25 Izvi zvakaitika kuti akwanirisike masoko akatahwa mu Mutemo wavo okuti: ‘Ivona vakandiramba pacina ndava.’
26 Paanozoguma mubeseri wandinozomutumira kuvha kuna Baba, mujimu wo cokwadi unovha ka Baba, unozoita ucapupu ngo pamusoro pangu;
27 imwimwi munozoitavo ucapupu ngokuti mainga na inini kuvhira pa kutanga.
Masoko o Pasi
^ Kana: “kutemerera.”
