Johani 3:1-36
3 Kwainga no Mufarisi umweni waidanijwa Nikodhemo, mutungamiriri wo Vajudha.
2 Iyena wakaenda kuna Jesu co usiku, womuvhunja kuti: “Rabhi, tinozviziva kuti muri mujijisi wakavha kuna Mwari, ngokuti akuna anoita zvitatijo zvamunoitari acina Mwari.”
3 Jesu wakamudavira kuti: “Ndinokuvhunja zvokadi kuti, kudari mundhu akatama kubahwa nga papsa aakwanisi kuvona Umambo hwa Mwari.”
4 Nikodhemo wakamuvhunjisa kuti: “Mundhu waamusharuka angaitisa kudini kuti abahwezve nga papsa? Anganghwinazve mundani ya mai wake kuti abahwezve hwocipiri?”
5 Jesu wakamudavira kuti: “Ndinokuvhunja zvokadi kuti, kudari mundhu akatama kubahwa ngo kumwa no mujimu, aanganghwini mu Umambo hwa Mwari.
6 Wiya wakabahwa ngo mundhu, i mundhu, asi wiya wakabahwa ngo mujimu mucena, ngo wokumujimu.
7 Ucakahamara ngokuti ndakuvhunja kuti: Imwimwi munodikana kubahwa nga papsa.
8 Mbhepo inovhunguza kwainoda, imwimwi munozwa caungu cayo,* asi amukuzivi kwainovha no kwainoenda. Ngo zvinoitika ku mundhu wese wakabahwa ngo mujimu mucena.”
9 Nikodhemo wakamudavira kuti: “Zviro izvi zvinozoitikisa kudini?”
10 Jesu wakamudavira kuti: “Iwewe uri mujijisi mu Iziraeri, waro ngenyi zviro izvi auzvizivi?
11 Ndinokuvhunja zvokadi kuti, tinovereketa zvatinoziva no kuitira ucapupu zviro zvotakavona, asi imwimwi amuashiri ucapupu hwatinopa.
12 Kudari ndikamuvhunja zviro zvo pasi pano, motama kuzvitenda, munozotendesa kudini kudari ndikamuvhunja zviro zvokudenga?
13 Kusiyapo izvo, akuna mundhu wakaenda kudenga, kuciripi wiya wakabzuka kudenga, Mwana wo mundhu.
14 Inga zvakaithwa ndi Mosi paakakhwija nyoka mu zvipare, ndizvona zvondhozvo zvinozoitika no Mwana wo mundhu paanozokhwijwa,
15 kuti mundhu wese anomutenda, anozowana upenyu hucikaperi.
16 “Mwari wakadisa vandhu vo nyika ino, ngo kudaro, wakavapa Mwana wake, wakabahwa ari ega, kuti vese vanomutenda vatame kuparajwa, asi vawane upenyu hucikaperi.
17 Mwari aazivi kutumira Mwana wake mu nyika kuti aitonge, asi kuti nyika iponeswe ngo pamusoro pake.
18 Wiya anomutenda, aazotongwi. Wiya acikamutendi, wapera kutongwa, ngokuti aazivi kutenda mu zina ro Mwana wa Mwari wakabahwa ari ega.
19 Kutongwa kunovha pa zviro izvi: Ruvheneko hwakaviya mu nyika, asi vandhu vaida cidima. Ivona avacaidepi ruvheneko ngokuti mabasa avo ainga akashata.
20 Wiya anoita zviro zvakashata anonyenya ruvheneko, iyena aaviyi ku ruvheneko kuti mabasa ake atame kuvoneka.
21 Asi wiya anoita zviro zvo cokwadi, anoviya ku ruvheneko, kuitira kuti mabasa ake avoneke kuti ari kuithwa mukuzwirana no kuda ka Mwari.”
22 Pasure pa izvi, Jesu no vajiji vake, vakaenda ku mutundhu wo Judheya. Iyena wakagara na ivona pa mukuvo wakati kuti, ecibhabhatija.
23 Asi Johani wainga ecibhabhatija ku Ainoni, phedo no Sarimi, ngokuti kwainga kuno kumwa yakawanda, ngo kudaro vandhu vazinji vaiyenda kwaari ecivabhabhatija;
24 pa mukuvo uwu, Johani wainga acito adihwa mukadheya.
25 Vajiji va Johani vakava no mapope no Mujudha umweni ngo pamusoro po ruceneso.
26 Ivona vakaenda ka Johani vomuvhunja kuti: “Munozviziva Rabhi? Mwanarume wamaingaya naye ku mwombera wo Jordhani, wamakaitiraya ucapupu, ari kubhabhatija. Ngo kudaro, vandhu vese vari kwenda kwaari.”
27 Johani wakapingura kuti: “Mundhu angava no ciro, kudari akacipuwa cecivha kudenga.
28 Imwimwi muri zvapupu zvo masoko andakananga kuti: ‘Inini andinipi Kristu, asi ndakatumwa kumbeji kwake.’
29 Wiya anocadha no mwanakaji, anoita mukwambo. Kudari shamwari yo mukwambo yakagara ngo phedo yecimuzwa, inodakara maningi ngo ndava yo kuzwa izwi ro mukwambo. Ngo kudaro, ndinodakara maningi.
30 Mabasa ake anodikana kuenderera mberi, asi angu anodikana kupunguka.”
31 Wiya anovha kudenga, ari panyezuru po vese. Wiya anovha pasi pano, ngo wopasi pano, anobhuya zviro zvo pasi pano. Wiya anovha kudenga ari panyezuru po vese.
32 Iyena anoita ucapupu hwo zviro zvaakavona no kuzwa, asi apana mundhu ari kutenda ucapupu hwake.
33 Wiya anoashira ucapupu hwake, anotenda kuti Mwari ngo wocokwadi.
34 Asi wiya wakatumwa ndi Mwari, anobhuya masoko a Mwari. Ngokuti Mwari aapunyi* mujimu, ku mundhu waanopa.
35 Baba vanoda Mwana. Ivona vakapa zviro zvese mu nyara jake.
36 Wiya anotenda Mwana anozowana upenyu hucikaperi; wiya acikazwiri Mwana aazowani upenyu, asi ushungu hwa Mwari hunozova panyezuru pake mukuvo wese.
