Johani 7:1-52
7 Sure kwazvo, Jesu wakaenderera mberi ecifamba ngo mu Garireya, ngokuti iyena aacaidepi kupinda ngo ku Judheya, ngokuti Vajudha vaipsanga kumuuraya.
2 Mutambo wo Vajudha wo tabherinake,* wainga wecikhwedera.
3 Vanukuna vake vakamuvhunja kuti: “Budanyi muno muende ku Judheya kuti vajiji venyu vavonevo mabasa amuri kuita.
4 Ngokuti akuna mundhu anoita zviro mucifise-fise kuveni anoda kuzivika pambhene. Kudari meciita zviro izvi, jitatijenyi ku vandhu vese.”
5 Zvokadi, hama jake ajicaimutendepivo.
6 Jesu wakavavhunja kuti: “Nguva yangu aito yakwana, asi kwamuri, nguva iriyese yakanaka.
7 Nyika aina thangwe rokumuzonda, asi inondizonda, ngokuti ndinoiitira ucapupu hwokuti mabasa ayo akashata.
8 Imwimwi endanyi kumutambo; inini andiyendi ku mutambo uwu, ngokuti nguva yangu aito yakwana.”
9 Asi, paakapera kuvavhunja izvi, wakasara ku Garireya.
10 Asi, vanukuna vake pavakapera kupinda kumutambo, iyena wakatevera ngo cifise-fise.
11 Vajudha vakatanga kumupsaka pa mutambo, veciti: “Mundhu wiya arikwapi?”
12 Vandhu vazinji vaiita ciweye-weye* ngo pamusoro pake. Vamweni vainanga kuti: “Iyena i mundhu wakanaka.” Vamweni vainanga kuti: “Iyena asipi mundhu wakanaka. Anopausa vandhu.”
13 Ngo kudaro, apana mundhu waibhuya pambhene ngo pamusoro pake, ngo kuthya Vajudha.
14 Mutambo pawainga waapakati no pakati, Jesu wakaenda ku themberi wotanga kujijisa.
15 Vajudha vakakahamara veciti: “Mundhu uwu wakahuwanirepi uzivi hwakadari hwo matahwa,* kuveni aazivi kuenda kucikora”?*
16 Jesu wakavadavira kuti: “Zvandinojijisa asipi zvangu, asi ngo zvawiya wakandituma.
17 Wiya anoda kuita kuda Kwake, anozoziva kuti zvandiri kujijisari zvinovha ka Mwari, kana kuti ndiri kubhuya zvo mumusoro mangu.
18 Mundhu wese anobhuya zvinovha mu musoro make, anopsaka kukujwa. Asi wiya anopsaka rukujo hwa wiya wakamutuma, ngowokadi. Kwaari akuna ushati.
19 Mosi wakamupekeja Mutemo, andizvopi? Asi apana na umwe wenyu anouzwira. Ngenyi muri kuda kundiuraya?”
20 Vandhu vakadavira kuti: “Iwewe uno dhimoni. Ndiyani anoda kukuuraya?”
21 Jesu wakavapingura kuti: “Ndakaita ciro cimwe basi, asi imwimwi mwese makahamara ndicona.
22 Ndizvona zvakaitisa kuti Mosi amupe mutemo wo kusoka. (Mutemo uwu aucaivhepi ka Mosi, asi waivha kumajicekuru.) Imwimwi munosoka mundhu ngo Musabudu.
23 Kudari imwimwi mecisoka mundhu ngo Musabudu kuti mutame kuphwanya Mutemo wa Mosi, waro ngenyi muri kunyangajwa ndini ngo pamusoro po kurapa mundhu ngo Musabudu?
24 Regeranyi kutonga ngo mavonekero okunja ko mundhu, asi tonganyi ngo njira yakarurama.”
25 Vagari vamweni vo Jerusarema, vakatanga kunanga kuti: “Andiyepi mundhu uwu wavaipsakaya kuuraya?
26 Asi vonanyi! Iyena ari kutovereketa hake pambhene acingathyi ciricese. Kureva kuti vatungamiriri vedu vanorangarira kuti uwu ndiyena Kristu kamare?
27 Itusu tinokuziva kwaanovha mundhu uwu; asi Kristu akazoviya, apana mundhu anozokuziva kwaanovha.”
28 Jesu paainga ecijijisa mu themberi, wakati ngo izwi guru: “Imwimwi munondiziva, munokuzivazve kwandinovha. Inini andizivi kuviya ngo kuda kwangu, asi Wiya wakandituma ngo wokadi. Imwimwi amumuzivi.
29 Inini ndinomuziva, ngokuti ndiri muimiriri wake, Ndiyena wakandituma.”
30 Ngo kudaro, vakapsaka kumusunga, asi apana waikwanisa kumupsasa ngokuti nguva yake yainga icito yakwana.
31 Vandhu vazinji vakamutenda, veciti: “Kristu akambhera ngo kuviya, kureva kuti anozokwanisa kuita mushamiso jakawanda kupinda jiri kuithwa ngo mundhu uwu here?”
32 Vafarisi pavakazwa vandhu vecibhuya* masoko aya ngo pamusoro pake, ivona no vapiri vakuru, vakatuma varindiri kuti vaende komusunga.*
33 Jesu wakavavhunja kuti: “Ndinozova na imwimwi pa nguya doko, ndicito ndikapinda ka Wiya wakandituma.
34 Imwimwi munozondipsaka, asi amuzondiwani. Kwandinoenda, imwimwi amukwanisi kugumeyo.”
35 Vajudha vakatanga kuvhunjisana ngocavo veciti: “Mundhu uwu anoda kuenda kwapi, kwaticikakwanisi kuzomuwana? Kureva kuti arikuda kuenda ku Vajudha vakabararika pakati po Vagiriki ecijijisa Vagiriki?
36 Jesu anoda kurevenyi paanoti: ‘Imwimwi munozondipsaka, asi amuzondiwani. Kwandinoenda, imwimwi amukwanisi kugumeyo’?”
37 Pa njiku yokupejisira, njiku huru yo mutambo, Jesu wakamuka wodanijira ngo izwi guru, eciti: “Kudari pano mundhu anonyota, ngaaviye kuzomwa.
38 Wiya anonditenda, matahwa anonanga kuti: ‘Mukati make munozopopoma kumwa yo upenyu.’”
39 Ngo kudaro, iyena wakananga izvi ngo pamusoro po mujimu mucena. Kuti vese vanomutenda vanozoashira mujimu uwu. Ngokuti vainga vacito vauashira, ngo pamusoro pokuti Jesu wainga acito aenda kudenga.
40 Vandhu vamweni vainga vazwa masoko aya, vakatanga kunanga kuti: “Uwu ndiyena Muporofeti kamare.”
41 Vamweni vainanga kuti: “Uwu ndi Kristu.” Asi vamwenizve vainanga kuti: “Kristu anovha Garireya here?
42 Matahwa aanangi kuti Kristu anozovha ku mubarihwana wa Dhavhidhi, mu Bheterehema, mu mutundhu waigara Dhavhidhi?”
43 Ngo kudaro, vandhu vakakashana ngo pamusoro pake.
44 Asi vamweni vavo vaida kumusunga, asi apana wakakwanisa kumupsasa.
45 Varindiri vakahwirira ku vapiri vakuru no Vafarisi. Vapiri vakuru no Vafarisi ava vakavavhunjisa kuti: “Ngenyi amuzivi kuviya naye?”
46 Varindiri vakadavira kuti: “Cingozvo apana mundhu wakavereketa inga uwu.”
47 Vafarisi vakavadavira kuti: “Imwimwi macengejwavo ndiyena kani?
48 Kureva kuti pano umwe wo vatungamiriri vedu kana wo Vafarisi anomutenda?
49 Asi mbungano iyi icikazivi wari Mutemo, ivandhu vakatukwa.”
50 Nikodhemo wainga akamboendeyo wainga umwe wavo, wakananga kuti:
51 “Mutemo wedu unotonga mundhu acito abhuiwa naye, kakuzwa no kuziva zvaarikuita?”
52 Ivona vakamudavira kuti: “Iwewevo uri Mugarireya kani? Psakisisanyi, muvone kuti apana muporofeti anozovha Garireya.”*
Masoko o Pasi
^ Kana: “mucaca.”
^ Kana: “cikwete-kwete.”
^ Gama ngo Gama: “zvakatahwa.”
^ Kana kuti: “cikora covarabhi.”
^ Kana: “veciita ciweye-weye ngo.”
^ Kana: “koomubata.”
^ Matahwa akawanda okare anothembeka, aana masoko anotangira pa vhesi 53 mbhera pa cipauko co 8 vhesi 11.
