Johani 9:1-41
9 Jesu paaikhirira, wakavona mundhu wakabahwa ari bofu.
2 Vajiji vake vakamuvhunjisa kuti: “Rabhi, ndiyani wakashaisha kuti abahwe ari bofu, ndiyena kana kuti ndi babake na make?”
3 Jesu wakadavira kuti: “Mundhu uwu no vabari vake avazivi kushaisha, asi izvi zvakaitika kuti mabasa a Mwari akhombijwe pambhene ngo pamusoro pake.
4 Itusu tinodikana kuita mabasa a Wiya wakandituma kucakaeja. Usiku huri kuguma, ngo kudaro, akuna mundhu anozokwanisa kushanda.
5 Pandinonga ndiciri pa nyika pano, ndiri ruvheneko hwo nyika.”
6 Paakapera kunanga masoko aya, wakapfirira mata pasi, wokanya mavhu ngo mata ake, wozoja mu majiso o bofu riyana, worivhunja kuti:
7 “Endai wosamba mu meso mu gandhwa ro Sirowe” (zvinoreva kuti “Mutumwi”). Iyena wakaenda, wosamba mu meso, woviya ecivona.
8 Perapo, vopacigarisano na vaya vaimuvona ecipembha, vakatanga kuvhunjisa kuti: “Andiyepi mundhu wiya waigaraya pasi ecipembha uwu?”
9 Vamweni vainanga kuti: “Ndiyena.” Vamwenizve vaiti: “Andiyepi, asi wakadotojana naye.” Iyena wainanga kuti: “Ndini kamare.”
10 Ivona vakamuvhunjisa kuti: “Majiso ako akafununguriswa kudini?”
11 Wakadavira kuti: “Mwanarume anodanijwa Jesu wakakanya mavhu wozoja majiso angu, wondivhunja kuti: ‘Endai kosamba mu meso mu Sirowe.’ Ndakaenda, ndosamba mu meso, perapo ndakatanga kuvona.”
12 Ivona vakamuvhunjisa kuti: “Mundhu wondhowo ari kwapi?” Iyena wakadavira kuti: “Andikuzivi kwaari.”
13 Ivona vakaenda no mundhu waingaya bofu ku Vafarisi.
14 Njiku yaakakanya mavhu Jesu wofunungura meso ake, yainga Sabudu.
15 Pa nguva yondhoyo, Vafarisi vakatangavo kumuvhunjisa kuti wakavonesa kudini. Iyena wakavapingura kuti: “Iyena wakazoja mavhu mu meso mangu, ndosamba mu meso, wari ndiri kuvona.”
16 Vafarisi vamweni vakatanga kunanga kuti: “Mundhu uwu aavhi ka Mwari, ngokuti aareremeji Sabudu.” Vamweni vainanga kuti: “Zvingaitisa kudini kuti mushaishi aite mushamaiso wo mushovo uwu?” Ngo kudaro, pakati pavo painga no kuparajana.
17 Vakavhunjisazve bofu riya kuti: “Iwewe unonangavo kudini ngo pamusoro po mundhu uwu, zvecivoneka kuti majiso ako ndiwona afununguhwa?” Iyena wakadavira kuti: “Iyena muporofeti.”
18 Vajudha avazivi kutenda kuti iyena waingadi bofu, nokuti wainga arapwa. Ivona vakadanija vabari vake.
19 Vakavavhunjisa kuti: “Ndiyena uwu mwana wenyu wamunonangaya kuti wakabahwa ari bofu? Wari, wovonesa kudini?”
20 Vabari vake vakadavira kuti: “Itusu tinozviziva kuti uwu mwana wedu, nokuti iyena wakabahwa ari bofu.
21 Asi, kuti wovonesa kudini, atizvizivi; kana kuti ndiyani wakafunungura majiso ake, atizvizivi. Muvhunjisenyi. Iyena waa dombo.* Anonanga ega.”
22 Vabari vake vakadavira kudaro ngokuti vaithya Vajudha. Vajudha vainga vakazwirana kuti mundhu ari wese anotenda kuti ndi Kristu, anodikana kugogomehwa mu sinagoga.
23 Ndizvona zvakaitisa kuti vabari vake vadavire kuti: “Iyena waa dombo. Muvhunjisenyi.”
24 Vakadanijazve hwocipiri mundhu waingaya bofu, vomuvhunja kuti: “Kujai Mwari; ngokuti tinoziva kuti mundhu uwu mushaishi.”
25 Iyena wakadavira kudari: “Kudari iyena ari mushaishi, andizvizivi. Candinoziva ngo cokuti, ndainga bofu, asi wari ndokwanisa kuvona.”
26 Ivona vakamuvhunjisa kuti: “Iyena wakakuitirenyi? Wakafunungurisa kudini majiso ako?”
27 Iyena wakavadavira kuti: “Ndapera kumuvhunja kare, asi imwimwi amuzivi kundipurukira. Ngenyi munoda kuzvizwazve nga papsa? Munoda kuvavo vajiji vake here?”
28 Ngo kudaro, ivona vakamushora veciti: “Iwewe uri mujiji wake, asi itusu tiri vajiji va Mosi.
29 Tinoziva kuti Mwari wakabhuya na Mosi, asi mundhu uwu atimuzivi kuti wakavha kwapi.”
30 Iyena wakavadavira kuti: “Izvi zvinoshamaisa. Imwimwi amumuzivi kuti wakavha kwapi, asi iyena wakafunungura majiso angu.
31 Tinoziva kuti Mwari aapurukiri vashaishi, asi mundhu wese anothya Mwari no kuita zvaanoda, iyena anomupurukira.
32 Kuvhira kareko, apana mundhu wakazwa kuti ariwese wakafunungura majiso o mundhu wakabahwa ari bofu.
33 Kudari mundhu uwu naacaivhepi kuna Mwari, apana caaizoita.”
34 Ivona vakamudavira kuti: “Iwewe wakabarihwa kamare mu ushaishi, unoda kuita mujijisi wedu?” Ivona vakamugogomera!
35 Jesu wakazvizwa kuti wagogomehwa. Paakamuwana, wakamuvhunja kuti: “Iwewe unotenda Mwana wo mundhu?”
36 Mwanarume wiya wakati: “ Ndiyani iyena, mambo, kuti ndimutende?”
37 Jesu wakamuvhunja kuti: “Uri kutomuvona, zvokadi, ndiyena wauri kutobhuyari naye.”
38 Iyena wakati: “Inini ndinomutenda, Mambo.” Bofu riya rakamugwadamira.*
39 Jesu wakati: “Ndakaviya mu nyika kuti itongwe. Vacikavoni vakwanise kuvona, vanovona vaite mapofu.”
40 Vafarisi vamweni vaizvizwa, vakati: “Itusu tiri mapofuvo here?”
41 Jesu wakavavhunja kuti: “Kudari nomainga mapofu, amucaizova no cishaishi. Asi ngokuti imwimwi munonanga kuti: ‘Itusu tinovona.’ Munogara no cishaishi cenyu.”
