Jona 1:1-17
1 Jehovha, wakavhunja Jona* mwana wa Amitai kudari:
2 “Mukai uende Ninivhe dhorobha guru, uzivise rutongeso kwariri, ngokuti zvishaishi zvaro zvaguma kondiri.”
3 Asi Jona wakatiza Jehovha, woenda Tarishishi. Iyena wakaterera kwenda Jope, owana piketi yaienda Tarishishi. Ngo kudaro, iyena wakapagari, wopakira no vandhu vaya vaiendaya Tarishishi, ecitiza Jehovha kuti aende ndhambo.
4 Jehovha wakazisa mbhepo yakakura maningi mujombe. Mujombe makava no zibepo rakakura maningi zvoita kuti piketi ide kumweka.*
5 Vavhuthi vakathya maningi, umwe na umwe wavo wakatanga kudaninja mwari wake kuti amubesere. Ivona vakasveja* zviro mu jombe zvainga mu piketi, kuti piketi irerukihwe. Asi Jona wainga waderera, woenda pasi po piketi, wokwatama,* wovata maningi.
6 Kapitau wo piketi wakamukhwederera, womuvhunjisa kudari: “Ngenyi uri kuvata? Mukai, daninjirai mwari wako! Kangaije Mwari wokadi, angatiitira usizi, kuti itusu titame kufa.”
7 Ngo kudaro, vakavhunjana ngocavo veciti: “Viyanyi, ngatikhandire sorti tivone kuti ndiyani waviisari dambujiko iri.” Ivona vakakhandira sorti, iyona yakabata Jona.
8 Ivona vakamuvhunjisa kudari: “Tabata murenje, tivhunjei, ngenyi tasongana no dambujiko iri? Unoita basa renyi? Unovha kwapi? Nyika yako ngoyapi? Vandhu vako ngovokwapi?”
9 Iyena wakavadavira kudari: “Inini ndiri Muhebheru, ndinonamata Jehovha, Mwari wokumatenga, Wiya wakaita jombe no pasi.”
10 Vanarume vaya vakathya maningi, vomuvhunjisa kudari: “Wakaitenyi?” (Ngokuti vanarume vaya vainga vecizviziva kuti iyena waitiza Jehovha, ngokuti iyena wainga avavhunja.)
11 Zibepo, raivhunguza maningi mujombe. Ngo kudaro, ivona vakamuvhunjisa kudari: “Tokuitenyi kuti zibepo iri rinyarare?”
12 Iyena wakavadavira kudari: “Ndibatenyi, mundikhandire mu jombe, jombe rinozonyarara. Ngokuti inini ndinozviziva kuti zibepo iri ramuwira ngo ndava yangu.”
13 Ngo kudaro, vanarume vaya, vakavhutha ngo simba rese piketi kuti vaende koicevesa, asi avazivi kukwanisa, ngokuti zibepo rainga recivhunguza maningi mujombe.
14 Ngo kudaro, vanarume vayani vakadanija Jehovha ngo izwi guru veciti: “Jehovha, tabata murenje, mucatiregera tecifa ngo ndava yo mundhu uwu, mucatipa ndava ngo kuuraya mundhu uwu, ngokuti maita mukuzwirana no kuda kwenyu Jehovha.”
15 Tevere ivona vakabata Jona vomukhandira mujombe, jombe rakanyarara.
16 Ngo kudaro, vanarume vaya vakathya maningi Jehovha, ivona vakaita mupiro kuna Jehovha, voitazve mbhiko.
17 Jehovha wakatuma zihove ziguru romija Jona. Jona wakagara mu ndani mo hove mazuva matatu no usiku utatu.
Masoko o Pasi
^ Zvinoreva: “Njiva.”
^ Kana: “kuphwanyika.”
^ Kana: “vakakhandira.”
^ Kana: “wokosvama.”
