Jona 4:1-11
4 Asi izvo azvizivi kudakajisa Jona, iyena wakanyangajwa maningi.
2 Iyena wakaita mukumbiro wakadari kuna Jehovha: “Jehovha, izvi ndizvona zvaindithimwathimwisaya pandainga ku nyika yangu. Izvi ndizvona zvakandiitisa kuti ndieje kutiza kwenda Tarishishi pa vhaza yokutanga. Ngokuti inini ndaizviziva kuti imwimwi muri Mwari ano unyasha no usizi, anosengerera, wakazara ngo rudo hucikacinji. Imwimwi munonyangajwa maningi ngo dambujiko.
3 Wari Jehovha, ndapota, ndiurayenyi. Ngokuti kwandiri zviri nane kufa, kuciripi kurarama.”*
4 Jehovha wakamuvhunjisa kudari: “Zvakanaka here kuti iwewe unyangajwe kudaro?”
5 Jona wakabuda mu dhorobha, woenda kogara ngo kumavhazuva ko dhorobha. Kondhoyo, iyena wakaita dumba, ogara pa munvuriri paro eciimira kuvona zvaizoitika no dhorobha.
6 Ngo kudaro, Jehovha Mwari wakaita kuti pamere mupuji kuti Jona awane munvuriri no kunyaraja ushungu hwake. Jona wakadakara maningi ngo mupuji wiya.
7 Asi comangwana fumi kunja nokwaeja, Mwari wokadi wakatumira gonye rogeda* mupuji, iwona wakaoma.
8 Zuva poraitanga kubuda, Mwari wakatumirazve mbhepo inopisa yaivha ngo kumavhazuva. Zuva rakatanga kupisa musoro wa Jona zvokuti iyena wakaguma pakupera simba. Ngo kudaro, iyena wakakumbira kufa ecinanga kudari: “Kwandiri zviri nane kufa kuciripi kurarama.”*
9 Mwari wakavhunjisa Jona kudari: “Zvakanaka here kuti iwewe unyangajwe kudaro ngo ndava yo mupuji uwu?”
Iyena wakadavira kudari: “Inini ndino razau yokunyangajwa, kunyangajwa kamare zvokuti ndiri kuda kufa.”
10 Asi Jehovha wakamuvhunja kudari: “Iwewe uno pena no mupuji uwu, waucikazivi kusima nee kuurebesa. Iwona wakakura ngo usiku humwe, wofa ngo usiku humwe.
11 Kureva kuti inini andifanerivo kuitira pena Ninivhe, dhorobha guru, rino vanarume vanopindirija 120.000, vacikakwanisi kusiyanisa zvakanaka no zvakashata,* kusiyapo zvinyama zvavo zvizinji?”
Masoko o Pasi
^ Kana: “kupona.”
^ Kana: “ron’gen’ga.”
^ Kana: “kupona.”
^ Kana: “vacikazivi mukono wavo muho no mukono wavo boshwe.”
