Mabasa o Vapostori 15:1-41
15 Vandhu vamweni vakavha Judheya, vakatanga kujijisa hama kuti: “Kudari mukatama kusokwa mukuzwirana no mutemo wa Mosi, amuzoponeswi.”
2 Pauro na Bharnabha vakapopana kukuru na ivona. Ngo kudaro, Pauro na Bharnabha no vamweni, vakasanwa kuti vaende ku Jerusarema kotonga ndava iyi no vapostori no vakuru.
3 Novaperekejwa padoko ngo ungano, vakapinda ngo mu Finisiya no Samariya, vecinasa kunanga kutendeuka ko vonyikanja. Hama jese jaidakara ngo kuzwa masoko aya.
4 Pauro na Bharnabha novaguma Jerusarema, vakaashihwa ngo ungano, ngo vapostori no vakuru, vonanga zviro zvizinji zvakaithwa ndi Mwari ecivashandisa.
5 Asi vamweni vaimbonga Vafarisi, vakazovaya no rutendo, vakamuka voima, veciti: “Zvinodikana kuti vatendi vokunja vasokwevo, ngokuteveja mupango wa Mosi.”
6 Ngo kudaro, vapostori no vakuru vakaungana kuti vapopore shwiro iyi.
7 Sure ko kuphikizana kukuru, Pedhru wakaima, woti kovari: “Hama, munozviziva kuti, kuvhira pa kutanga, Mwari wakandisana pakati penyu, kuti vandhu vo majinja vazwe no kutenda masoko akanaka andinovereketa ngo muromo wangu.
8 Mwari anozivaya mwoyo, wakaita ucapupu ngo kuvapa mujimu mucena, ngo maitiro aakatipa ndiwona.
9 Iyena aazivi kutisiyanisa na ivona, asi wakacenesa mwoyo yavo ngo rutendo.
10 Waro, ngenyi muri kueja Mwari, ngo kudira mu musipa mo vajiji kanga yokuti majicekuru edu pamwepo na itusu atizivi kuikwanisa kuithwara?
11 Mukusiyana, itusu tinotenda kuti tinoponeswa ngo unyasha hucikaezaniswi hwa Mambo Jesu, inga maponesehwe avanoithwa.”
12 Vandhu vese vakanyarara, votanga kuzwa Bharnabha na Pauro veciverenga zvitatijo zvizinji no mushamaiso zvainga zvaithwa ndi Mwari ecishandisa ivona pakati po majinja.
13 Pavakapera kuvereketa, Jakobo wakadavira kuti: “Hama, ndizwenyi.
14 Simiyoni, wakapera kutivhunja kuti wari, Mwari wakatendera vandhu vomajinja zvokuti angatokheta vandhu vanotora zina rake kuvha pakati pavo.
15 Izvi zvinozwirana no masoko o vaporofeti anoti:
16 ‘Pasure pa izvi, ndinozohwirirazve koimisa tende* ya Dhavhidhi yainga yakawa. Inini ndinozovakisazve matongo* ayo no kuimusijirazve,
17 kuti vandhu vakasara vandipsake inini, Jehovha, ngo mwoyo wese, pamwepo no vandhu vo majinja ese, vandhu vanodaninjwa ngo zina rangu, ndini Jehovha* ndinonangari izvi, ndini ndiri kuitari zviro izvi,
18 ndainga ndakasunga kuzviita kuvhira kare.’
19 Ngo kudaro, zvandinosunga asipi zviro zvinodikana kuviisa zvineso pakati po vandhu vomajinja ava. Ivona wari vari kutenda Mwari,
20 asi kuti ndivatarire kuti vatame kushandisa zviro zvakasvipiswa ngo zvithombi, zvo uhure,* zviro zvakafa ngo kutikinywa* no ngazi.
21 Kuvhira kare, zvakatahwa ndi Mosi zviri kucumaehwa mu dhorobha ngo dhorobha ngo kuti zviri kuverengwa ngo izwi rinozika mu masinagoga ngo mu Masabudu ese.”
22 Tevere, vapostori no vakuru, pamwepo no ungano yese vakasunga kutuma vanarume vakasanwa pakati pavo kuti vaende ku Antiyokiya. Pakati po vandhu vainga vakasanwa, painga na Pauro na Bharnabha. Vakatumazve Judha, waidanijwa kuti Bharsabha na Sira, vanarume vaitungamirira hama.
23 Ivona vakatara karata iyi voitumira navo yeciti:
“Vapostori no vakuru, hama jenyu, tiri kucungamija hama jo majinja jiri ku Antiyokiya, Siriya no Sirisiya.
24 Takazwa kuti varipo vamweni vedu vakavha kuno voviya kondhoyo, vakamucamwisa ngo pamusoro po zvavaibhuya, voeja kumupausa pa zviro zvamaitenda. Itusu atizivi kuvavhunja majijisiro akadaro.
25 Ngo kudaro, itusu kuno tazwirana tese kuti tisane vanarume, vaviye kondhoyo pamwepo no hama jedu jatinoda, Bharnabha na Pauro.
26 Vanarume ava, vakadira upenyu hwavo pa ngozi ngo ndava zina ra Mambo wedu Jesu Kristu.
27 Ngo kudaro, tatumavo Judha na Sira, kuti vamuvhunje ngo muromo yavo zviro zvondhozvo zvatakamutarira.
28 Mujimu mucena na itusu takabatana kuti titame kumuengejerera muthwaro umweni kusiyapo zviro izvi zvinodikana:
29 kuti muenderere mberi meciregera zviro zvakapihwa ku zvithombi, ngazi, zviro zvakafa ngo kutikinywa* no zvo uhure.* Kudari mukaregera zviro izvi mukuvo wese, zviro zvese zvinozomufambira ushoni. Saranyi zvakanaka.”
30 Pavakapera kuenekwa, vanarume ava vakaenda ku Antiyokiya, voungana no vandhu vese vo kondhoyo, vovapa karata iyi.
31 Pavakapera kuverenga karata iyi, vakadakara maningi ngo kuvangiswa kwavakaithwa.
32 Zvecivoneka kuti Judha na Sira vaingavo vaporofeti, vakavangisa hama ngo kuvavhunja zviro zvakawanda zvinovangisa.
33 Pavainga vapera kugara mukuvo wakati kuti vari kondhoyo, hama jakazoenekana navo zvakanaka. Ivona vakahwirira ngo runyararo kovainga vakatumwa ndivona.
34 *——
35 Asi Pauro na Bharnabha vakasara ku Antiyokiya vecijijisa no kutokotesa masoko akanaka o soko ra Jehovha* pamwepo no vamweni vazinji.
36 Pasure po njiku nganani, Pauro wakavhunja Bharnabha kuti: “Ngatihwirire tiyende kovona hama mu madhorobha ese atakazivisa soko ra Jehovha,* tivone kugara kwajakaita.”
37 Bharnabha waida kutora Johani anodanijwa kuti Marko.
38 Pauro wainga acikadi kuti vaende naye, zvecivoneka kuti wainga akambovasiya Pamfiriya, oramba kwenda navo ku basa.
39 Ngo kudaro, vakapopana maningi, zvoita kuti vaparajane ngocavo; Bharnabha wakatora Marko vopakira piketi kwenda ku Shipre.
40 Pauro wakasana Sira, pasure po mukumbiro jakaithwa ngo hama, vecikumbira Jehovha* kuti akhombijire Pauro unyasha hucikaezaniswi, perapo iyena wakapinda.
41 Iyena wakapinda ngo Siriya no Sirisiya ecivangisa ungano.
Masoko o Pasi
^ Kana: “dumba; nyumba.”
^ Kana: “nyumba yakawa.”
^ Vonanyi Kudurujihwa ko Magama.
^ Mu Cigiriki, por·nei′a. Vonanyi Kudurujihwa ko Magama.
^ Kana: “nyama yakaurawa yotama kubudiswa ngazi.”
^ Kana: “nyama yakaurawa yotama kubudiswa ngazi.”
^ Mu Cigiriki, por·nei′a. Vonanyi Kudurujihwa ko Magama.
^ Vonanyi masoko o pasi ari pana Mateu 17:21.
^ Vonanyi Kudurujihwa ko Magama.
^ Vonanyi Kudurujihwa ko Magama.
^ Vonanyi Kudurujihwa ko Magama.
