Mabasa o Vapostori 19:1-41
19 Aporo paainga ari ku Korinte, Pauro wakapinda ngo mu ndharaundha jainga ngo mukati perapo woenda ku Efeso. Kondhono kwainga kuno vajiji vanganani.
2 Iyena wakavavhunja kuti: “Makaashira mujimu mucena pamakava vatendi?” Ivona vakamudavira kuti: “Atizivi kumbozwa kuti kuno mujimu mucena.”
3 Iyena wakati: “Waro makabhabhatijwa ngo rubhabhatijo hwaani?” Ivona vakadavira kuti: “Ngo rubhabhatijo hwa Johani.”
4 Pauro wakati: “Rubhabhatijo hwa Johani, hwaiimirira kukhauya. Iyena waivavhunja kuti vatende Jesu waizoviya sure kwake.”
5 Ivona pavakazvizwa, vakazobhabhatijwa ngo zina ra Mambo Jesu.
6 Pauro paakavacanjikira nyara, mujimu mucena wakaviya panyezuru pavo, votanga kuvereketa ndumi jo nyikanja no kuporofeta.
7 Vese vaikwana gumi ro vanarume no vanarume vaviri.
8 Iyena wakanghwina mu sinagoga, wobhuya na ivona ngo cicunge mukati mo mweji mutatu, eciita hurukuro no kurangarijisisa mu njira inokhohwesa ngo pamusoro po Umambo hwa Mwari.
9 Asi vaya vainga vakaoma musoro pavakaramba kutenda, vecivereketa zvakashata ngo pamusoro po Gwanja ro Cokwadi pamberi po vandhu vese, iyena wakavasiya woparajanisa vajiji pakati po vandhu ava. Iyena waiita hurukuro njiku jese mu nyumba yo shikora ya Tirano.
10 Izvi zvakaitika ko makore maviri, mbhera vese vaigara mu porovhinsiya yo Aziya, Vajudha no Vagiriki, vese vakazwa soko ra Mambo.
11 Mwari wakaenderera mberi eciita mabasa makuru anoshamaisa ecishandisa Pauro,
12 zvokuti nguvo jo kupukuta ndijona no ma avhentari* ainga akapsasa muviri wake, paaiendeswa ku vandhu vaihwaja, ndhendha jiya jaipera, mujimu yakashata yaibuda.
13 Asi kwainga kuno Vajudha vamweni vaifamba vecigogomeravo madhimoni no kueja kushandisa zina ra Mambo Jesu kuna vayani vainga no mujimu jakashata veciti: “Ndinomuvhunja ngo zina ra Jesu kuti, budanyi. Jesu uwu ndiyena anocumaehwaya ndi Pauro.”
14 Kwainga no vana vanomwe vo mutungamiriri wo vapiri wo Cijudha waidanijwa kuti Sikevha, vana ava, ndivona vaiita izvi.
15 Mujimu wakashata wakavadavira kuti: “Inini ndinomuziva Jesu. Pauro ndinomuzivazve. Waro imwimwi ndimwi ani?”
16 Ngo kudaro, mundhu wainga no mujimu wakashata wakavanyandukira, wakahwisana na ivona, wonyisa vese. Ivona vakatiza kuvha mumba vari mitu.
17 Izvi zvakazivika ngo vandhu vese vaigara mu Efeso, Vajudha no Vagiriki. Vandhu vese vakathya, zina ra Mambo Jesu rakaenderera mberi recikujwa.
18 Vandhu vazinji vakava vatendi, vaiza kuzodekeca no kunanga pambhene zviito zvavo.
19 Zvokadi, vandhu vazinji vaiita mabasa avo o masaramuso, vakaviisa vese mabhuku avo, vomapisa pambeji po vese. Mutengo wo mare yo mabhuku avo, yakaita makumashanu o zviuru* zvo mangwenjere o sirivha.
20 Ngo kudaro, soko ra Jehovha* raindokura ngo simba no kunyisa.
21 Zviro izvi pazvakapera kuitika, Pauro wakasunga kuti pasure po kupinda ngo Masedhoniya no Akaya, waizoenda Jerusarema. Iyena wakati: “Ndikavha kondhono, ndinodikanazve kwenda Roma.”
22 Ngo kudaro, wakatumira vandhu vaviri vaimubesera kwenda Masedhoniya, Timoti na Erasto, asi iyena wakasara mu porovhinsiya yo Aziya pa nguva nganani.
23 Pa mukuvo wondhowo, kwakaita bope guru ngo pamusoro po Gwanja ro Cokwadi.
24 Mwanarume umweni anodanijwa kuti Dhimetriyo, muumbi wo sirivha, wakaita pokugajika cithombi cinodanijwa Artemisi ngo sirivha. Basa iri raipfumisa maningi vandhu vaizviitaro.
25 Iyena wakavaunganija, pamwepo no vamweni vaiita basa rondhoro, wovavhunja kuti: “Shamwari jangu, munozviziva kuti basa iri ndirona rinotikhupusa.
26 Wari imwimwi, muri kovona no kuzwa kuti, asipi mu Efeso basi asi mu porovhinsiya yese yo Aziya, kuti Pauro wakakhohwesa vandhu vakawanda ngo kuvaita kuti vacinje murangariro yavo, ecivavhunja kuti zvimwari zvakaitwa ngo nyara jo vandhu, asipi zvimwari zvokadi-kadi.
27 Kusiyapo izvo, kuno ngozi yokuti basa redu ritame kubudirira ushoni nokuti themberi ya mwarikaji mukuru Artemisi itame kureremejwa. Ngo kudaro, wiya anonamathwa mu porovhinsiya yese yo Aziya no pasi pese anozovhisihwa kukujwa kwake.”
28 Vanarume vaya, pavakazwa masoko aya, vakanyangajwa maningi, votanga kukhuwa ngo izwi guru, veciti: “Artemisi wo Vaefeso, Ndiyena Mukuru!”
29 Ngo kudaro, dhorobha rese rakaita joweyowe, vese vakagogoma kwenda ku ndau yo mutambo, vecikhwekhwereja Gayo na Aristarko vagari vo Masedhoniya, ngokuti vaifamba na Pauro.
30 Pauro waida kwenda mukati mainga no vandhu, asi vajiji vakamurambija.
31 Pikija shamwari jake jimweni jainga varongi vo mutambo no muphikizano, jakamutumira masoko jecideketerera Pauro kuti atame kudira upenyu hwake pa ngozi ngo kwenda ku ndau yo mutambo.
32 Vamweni vaikhuwa* vecinanga zvimweni, vamweni vaikhuwa* vecinanga zvimwenivo; ngokuti mbungano yese yainga iciita joweyowe. Vandhu vazinji avacaiziva cavainga vaunganira pondhopo.
33 Ivona vakabudisa kunja Areshandre pakati po vandhu vese, Vajudha vakamundundira kumbeji ko vese. Areshandre wakaita citatijo ngo nyara, ecida kujijivirira pamberi po vandhu vese.
34 Asi pavakaziva kuti iyena wainga Mujudha, vese vakatanga kukhuwa ngo izwi rimwe ko nguva mbiri, veciti: “Artemisi wo Vaefeso, Ndiyena Mukuru!”
35 Mutari wo dhorobha, paakapera kunyaraja vandhu, wakati: “Vandhu vo Efeso, ndiyani acikazivi pakati penyu kuti dhorobha iri ro Efeso ndirona rinongwarira themberi ya Artemisi mukuru no cithombi cakavha kudenga?
36 Zvecivoneka kuti zviro izvi azviphikiziki, imwimwi munodikana kugajana motama kuita ciro mucito marangarira.
37 Imwimwi maviisa vandhu ava kuno, vandhu ava asipi mbavha jo temberi kana vatuki va mwarikaji wedu.
38 Ngo kudaro, Dhimetriyo no vaumbi vaanavo, kudari vano ndava no mundhu ariwese, pano mazuva akagajwa ngo mapanje kuti vaite musongano no magovhernadhori o porovhinsiya;* ngavaende kookeshari kondhoyo.
39 Asi kudari mecida zviro zvimweni zvinopinda izvi, zvisungenyi no vandhu vese mukuzwirana no mutemo.
40 Ngokuti itusu tinozopuwa ndaya yokuva vapandukiri ngo pamusoro po zviro zvaitikari nyamasi. Atina masoko okuzonanga ngo ndava yo joweyowe iri.”
41 Paakapeja kunanga masoko aya, iyena wakaita kuti vandhu vapinde.
Masoko o Pasi
^ Avhentari inguvo jinoshandiwa najo kuti jijivirire nguvo jimweni kuti jitame kupsipa.
^ 50.000.
^ Vonanyi Kudurujihwa ko Magama.
^ Kana: “vaimima.”
^ Kana: “vaimima.”
^ Govhernadhori uwu wainga wo Ciroma.
