Mabasa o Vapostori 20:1-38
20 Joweyowe parainga rapera, Pauro wakadanija vajiji, wovavangisa, perepo, wakavaeneka wobata gwanja kwenda Masedhoniya.
2 Iyena wakafambira ndharaundha jese ecibhuya no vajiji ngo masoko akawanda anovangisa, tevere woguma Gresiya.
3 Iyena wakagareyo mweji mutatu, asi zvecivoneka kuti Vajudha vainga varonga zano rakashata paainga ecida kupakira piketi kuti aende Siriya, iyena wakarangarira kuhwirira ngo ku Masedhoniya.
4 Pauro waiperekejwa ndi Sopatro mwana wa Piro wo Bhereya, Aristarko na Sekundu vo Tesaronika, Gayo wo Dherbhe, Timoti no vamweni vo porovhinsiya yo Aziya, Tikiko na Trofimo.
5 Vandhu ava vakatungamira, voenda kotiimira mu Trowadhe;
6 Asi itusu takapakira piketi kuvha Firipi pasure po njiku yo Pau Jicina Mbijo, mukati mo njiku shanu, takaguma Trowadhe kwavainga vari, togareyo njiku nomwe.
7 Pa njiku yokutanga yo sumana, patainga takaungana kuti tirarire, Pauro wakatanga kubhuya no vainga pondhopo, ngokuti waida kuzopinda pa njiku yaizotevera; iyena wakaenderera mberi eciita hurukuro mbhera pakati po usiku.
8 Mu nyumba yataingaro takaungana, mainga muno zvibani* zvakawanda pa berere ro mudenga.
9 Mujaha umweni waidanijwa kuti Eutiko, wainga akagara ngo pa jhanera, pondhopo wakabathwa ngo hope Pauro paaienderera mberi ecibhuya. Iyena wakanyiswa ngo hope, wowa pasi ecivha ngo mu nyumba yo citatu. Pavakazomubata, wainga afa.
10 Pauro wakaderuka,* womucamira, perepo wakati: “Mucaita mbhere-mbhere, iyena ari penye.”
11 Pauro wakahwirirazve, perapo wakatanga kugura pau no kuha. Wakaenderera mberi ecibhuya ko nguva yakareba, mbhera kueja ko kunja, sure kwazvo wakapinda.
12 Ngo kudaro, vakaenda no mujaha wiya ari penye, ivona vakatondhojwa kamare.
13 Itusu takatungamira ku piketi, topakira kuenda ku Aso, kwataida kopakija Pauro. Ngokuti paakapera kutivhunja kudaro, iyena waida kuenda ku Aso ngo soka.
14 Patakasongana naye ku Aso, takamupakija toenda naye Mitirene.
15 Patakavheyo pa njiku yakatevera, takaguma ku Kiyo. Pa njiku yocipiri takaguma ngo kukasika ku Samo, pa njiku yocitatu takaguma Mireto.
16 Pauro wainga akasunga kutama kuima mu Efeso, kuti atame kupeja mukuvo wakareba mu porovhinsiya yo Aziya, ngokuti waikasikira koguma Jerusarema pa njiku yo Mutambo wo Pentekoste kudari zvikakwanisika.
17 Asi, paainga Mireto, wakatumira masoko ku Efeso okoodanija vakuru vo ungano.
18 Pavakaguma kwaari, iyena wakavavhunja kuti: “Imwimwi munonasa kuziva mugariro wandakava nawo pakati penyu kuvhira pa njiku yokutanga, yandakaguma mu porovhinsiya yo Aziya,
19 ndecishandira Mambo inga muranda ngo kujidodokesa kwese, ndino musoji no muejo, jakandigumira ngo ndava yo mazano o Vajudha.
20 Asi inini andizivi kuregera kumuvhunja ciri cese caizomubesera, kumujijisa pambhene no munyumba ngo nyumba.
21 Asi ndakaita ucapupu hwakaperera ku Vajudha no Vagiriki hwokuti vanodikana kukhauya, vohwirira kuna Mwari no kutenda Jesu Mambo wedu.
22 Wari ndiri kuenda Jerusarema ndecitungamirihwa ngo mujimu mucena, pikija ndicikazivi zvinozondiitikireyo,
23 asi mu dhorobha ngo dhorobha, mujimu mucena uri kundondingwaja mukuvo wese kuti ndinozodihwa mu kadheya no kuwanana no matambujiko.
24 Ngo kudaro, andivoni kuti upenyu hwangu hunosisira kondiri, asi candinoda kuita ngo cokukwanirisa zvandinodikana kuita no basa randakapuwa ndi Mambo Jesu, rokuita ucapupu wakaperera hwo masoko akanaka o unyasha hucikaezaniswi hwa Mwari.
25 “Ndinoziva kuti apana naumwe wenyu wakacumaehwa ndini ngo pamusoro po Umambo hwa Mwari, anozondivonazve.
26 Ngo kudaro, imwimwi muri zvapupu pa njiku ya nyamasi kuti inini andina ndava yo ngazi yo mundhu ari wese,
27 ngokuti andizivi kuregera kumuvhunja zviro zvese zvinoda Mwari.
28 Jingwarirenyi. Ngwariranyivo mushambi wese wamakagajwa ngo mujimu mucena kuti muite vavonereri vawo, kuti mungwarire ungano ya Mwari inga zvinoita muhavisi. Ungano iyi wakaitenga ngo ngazi yo Mwana wake.
29 Ndinozviziva kuti ndikapinda, pakati penyu panozonghwina mapumbhi anokhuvaza, acikazotaji ushoni mushambi.
30 Pakati penyu panozobuda vandhu vanozovereketa zviro zvakashata zvinozopausa vajiji kuti vavatevere.
31 “Asi garanyi makamuka, mucikakanganwi kuti pa makore matatu ese, usiku no masikati, andizivi kuregera kumungwaja ndino musoji.
32 Jivirihwanyi ndi Mwari no soko ro unyasha hwake hucikaezaniswi. Soko iri rinokwanisa kumuvangisa no kumupa utaka pakati po vakasanwa vese.
33 Inini andizivi kuemura sirivha, goridhi no nguvo yo mundhu.
34 Imwimwi munozviziva kuti ndakashanda ngo nyara jangu iji kuti ndiwane zvinodiwa zvangu no zvovadoni vangu.
35 Ndakamutatija pa zviro zvese mabesere amunodikana kuita vakaremba, mucikakanganwi masoko a Mambo Jesu, paakati: ‘Kupekeja kunoviisa mudakaro mukuru kupinda kuashira.’”
36 Paakapera kunanga masoko aya, wakagwadama navo vese, woita mukumbiro.
37 Vese vakacema* maningi, vokumbatira Pauro no kumubhejhari,
38 ngokuti vakahwajihwa maningi ngo masoko aakananga okuti avacaizomuvonepizve. Perapo vakamuperekeja kuenda ku piketi.
