Mabasa o Vapostori 24:1-27
24 Sure ko njiku shanu, mupiri mukuru anodanijwa kuti Ananiya wakaenda no vakuru vanganani no muinikiri waidanijwa kuti Teturo, ivona vakasumurira govhernadhori ndhango javainga najo ngo pamusoro pa Pauro.
2 Paakadaninjwa, Teturo wakatanga kupumbha Pauro eciti:
“Tiri kuvona kuti itusu tino runyararo ngo ndava yenyu no kutizve, kungwara kwenyu kuri kuitisa kuti zviro zvizinji zvicinje mu nyika ino,
3 mu mukuvo wese mu ndau jese, itusu tinoziva kuti: Tinomubonga maningi imwimwi Amambo Ferisi.
4 Asi kuti nditame kumutorera maningi nguva, ndiri kukumbira kuti mutipurutane ngo unyasha hwenyu.
5 Itusu tavona kuti mundhu uwu, ari kunesa maningi. Ari kukukumijirazve Vajudha pasi pese. Iyena ari kutungamirira cikwata co Vanazareta.
6 Pauro wakaeja kusvipisa themberi, ngo kudaro takamubata.
7 *——
8 Imwimwi mukamupopora ushoni munozozvivona zvese zvatiri kumupumbhari.”
9 Ngo kudaro, Vajudha vakabeseravo kupumbha uku, vecinanga kuti zviri kunangwari ndizvona.
10 Govhernadhori paakatendera Pauro ngo musoro kuti averekete, Pauro wakadavira kuti:
“Ndinonasa kuzviziva kuti jinja iri riri kutongwa ndimwi kuvhira kare. Wari ndinovereketa ngo pamusoro pangu.
11 Inga zvamunoziva imwimwi mwega, ajiiti gumi ro njiku no njiku mbiri kuvhira pandakaendaya ku Jerusarema koonamata.
12 Ivona avazivi kundikhanda* ndecivereketesana no mundhu ari wese mu themberi kana kumusa joweyowe mu masinagoga kana mu dhorobha.
13 Ivona avakwanisi kupa ucapupu wo zviro zvavari kundipumbhari wari.
14 Asi inini candinomuvhunja ngo cokuti, ndiri kunamata Mwari wo majicekuru angu, mukuzwirana no ciara cavanodanijaya kuti ciara cipsa. Inini ndinotenda zvese zviri mu Mutemo, zvakatahwa ngo Vaporofeti.
15 Inini ndino vetero kuna Mwari, vetero iyi vandhu ava vanayovo, yokuti kunozowanika kumuka ko vakafa ko vandhu vakarurama no vandhu vacizivi kururama.
16 Ngo ndava yazvo, mukuvo wese ndinovangisira kuti ndive no hana yakacena pamberi pa Mwari no po vandhu.
17 Pasure po makore akawanda, ndakaviya mu Jerusarema no zvipo zvo kubesera varombo ku vandhu vo jinja rangu no kuita zvipo.
18 Pandainga ndeciita zviro izvi, ivona vakandikhanda* ndakacena mukuzwirana no Mutemo mu themberi, asi ndainga ndicina mbungano, ndicikaitizve bope. Mondhomo mainga muno Vajudha vamweni vakavha mu porovhinsiya yo Aziya,
19 vandhu ava ndivona vaidikana kuva pamberi penyu kuti vandipumbhe, kudari no ndainga no ndava naivona.
20 Kana kuti, vandhu vari pano wari, ngavanange cakashata cavakavona pandainga na ivona pamberi po Sinedhriyo,
21 kunja ko ciro cimwe basi candakananga pandainga pakati pavo, ndeciti: ‘Ndiri kutongwa nyamasi pamberi penyu ngo ndava yo kumuswa ko vakafa!’”
22 Asi Ferisi ecinasa kuziva shwiro iyi ngo pamusoro po Gwanja iri, iyena wakavapindisa eciti: “Riziya mutungamiriri wo masoca akambhera ngo kuviya, ndinozotonga shwiro yenyu iyi.”
23 Iyena wakavhunja mukuru wo masoca kuti Pauro angwaririhwe akasungwa, asi waidikana kuva wakasununguka kuti akwanise kusapothwa ngo vandhu vo jinja rake.
24 Pasure po njiku nganani, Ferisi wakaviya no mukaji wake anodanijwa kuti Dhrusira, mukajiwo wainga Mujudha, Ferisi wakadanija Pauro kuti azwe masoko ngo pamusoro po kutenda Kristu Jesu.
25 Pauro paainga ecibhuya ngo pamusoro po urungami, kujibata no kutongwa kwaiviya, Ferisi wakathya, wonanga kuti: “Wari ambopindai hako, ndinozokudanijazve ndikawana mukana umweni.”
26 Pa mukuvo wondhowo, iyena waiimira kupuwa mare ndi Pauro. Ngo kudaro, iyena waindogara ecimudanija kazinji ecibhuya naye.
27 Asi pasure po makore maviri, Ferisi wakacinjwa ndi Porsiyo Festo. Zvecivoneka kuti Ferisi waida kusimbhwa ngo Vajudha, wakaregera Pauro mukadheya.
Masoko o Pasi
^ Vonanyi masoko o pasi ari pana Mateu 17:21.
^ Kana: “kundiwana.”
^ Kana: “vakandiwana.”
