Mabasa o Vapostori 25:1-27
25 Sure ko njiku ndhatu Festo naaguma mu porovhinsiya yake, wotanga kutonga, wakavha Sezareya woenda Jerusarema.
2 Vapiri vakuru no vandhu vanosisira vo Vajudha vakamuvhunja ndava javaipumbha Pauro. Ivona vakatanga kudeketerera Festo
3 kuti avaitire unyasha hwo kuviisa Pauro ku Jerusarema. Asi ivona vaironga kujiva Pauro mu gwanja kuti vamuuraye.
4 Asi Festo wakadavira kuti Pauro waidikana kugara akafungihwa mu Sezareya, iyena kamare waizohwirireyo ngo kukasika.
5 Iyena wakati: “Ngo kudaro, vaya vari kutungamirira pakati penyu, vanodikana kuenda na inini, kudari naakaitadi cakashata.”
6 Mukati mo njiku sere kana gumi vari vese, iyena wakaenda ku Sezareya. Pa njiku yakazotevera, iyena wakagara pa banje ro kutonga, wodanijisa Pauro.
7 Pauro paakanghwina, Vajudha vainga vakavha Jerusarema, vakamutendeneja vomupumbha zvakashata maningi, zvokuti iyena wakakonehwa kujiinikira.
8 Asi Pauro wakajiinikira eciti: “Andizivi kushaishira Mutemo wo Vajudha, andizivi kushaishira themberi kana kuti Sezari.”
9 Festo ecida kuvoniwa inga wakanaka ngo Vajudha, wakadavira Pauro kuti: “Iwewe unoda kwenda ku Jerusarema kuti utongwe ngo pamusoro po zviro izvi?”
10 Pauro wakati: “Inini ndiri pamberi po banje ro kutonga ra Sezari pandinofanera kutongwa. Andizivi kushaisha ciri cese ku Vajudha inga zvamuri kutonasari kuvona.
11 Kudari inini ndiri mushaishi kamare, nokutizve ndaita ciri cese candinofanera kufa ndicona, inini andirambi kuurawa. Kudari zvavari kundipumbhari zviciripi izvona, akuna mundhu anotendehwa kuvaitira unyasha ngo kundidira mu nyara javo. Ndinokumbira kuti ndava yangu iyende ka Sezari.”
12 Festo paakapera kubhuya no cikwata co vapangiri, wakati: “Iwewe wakumbira kuenda ka Sezari, waro unozoenda ka Sezari.”
13 Pasure po njiku nganani, mambo Agripa na Bherenise vakaguma Sezareya koitira makorokoto Festo.
14 Zvecivoneka kuti waida kuita njiku jakawanda ari kondhoyo, Festo wakaverengera mambo ndava ya Pauro, eciti:
“Kuno mwanarume umweni wakasiiwa akasungwa ndi Ferisi,
15 pandainga ku Jerusarema, vapiri vakuru no vakuru vo Vajudha vakaviya kuzondivhunja masoko ngo pamusoro po ndava yake, vecikumbira kuti iyena atongehwe kufa.
16 Asi inini ndakavadavira kuti, azvitendehwi ngo mutemo kuti Muroma aendeswe ku vandhu vari kumupumbharo, mundhuwo acito avonana meso ngo meso no vandhu vari kumupumbharo kuti iyena akwanise kubhuya mavonero ake.
17 Pavakaguma pano, andizivi kunonoka, pa njiku yakatevera, ndakagara pa cigaro co kutonga ndodanija mundhu wondhowo kuti anghwine.
18 Vandhu vaimupumbhaya pavakaima kuti vaverekete, ivona avazivi kunanga ciri cese cakashata candainga ndecivetera ngo pamusoro pake.
19 Ivona vainga vecinesana ngo pamusoro po zvokunamata kwavo no pamusoro po mwanarume anodanijwa kuti Jesu, wainga akafa, asi Pauro ari kuenderera mberi ecinanga kuti ari penye.
20 Ndecinesehwa ngo kutonga ndhango iyi, ndakamuvhunjisa kuti dangani anoda kwenda ku Jerusarema kuti atongehwe kondhoyo ngo pamusoro po shwiro iji.
21 Asi Pauro paakakumbira kuti agare mukadheya eciimira cisungo ca mambo wo Roma,* ndakananga kuti iyena waidikana kuva akasungwa mbhera ndimuendese ka Sezari.”
22 Agripa wakavhunja Festo kuti: “Inini ndinoda kumuzwavo ndega mundhu uwu.” Iyena wakadavira kuti: “Munozomuzwa mangwana.”
23 Co mangwana fumi, Agripa na Bherenise vakanghwina mu nyumba yokutongera ndava, vecizvikuja maningi pamwepo no vatungamiriri vo masoca no vanarume vaireremejwa mu dhorobha. Festo wakaita kuti Pauro adanijwe, perapo wonghwiniswa.
24 Festo wakati: “Mambo Agripa no mwese muri pano, mwanarume wamuri kuvonari, ndiyena wakakumbihwa ngo Vajudha vese vo Jerusarema no vakuno, vecikhuwa* kuti iyena aafaneri kupona.
25 Asi ndakazwisisa kuti apana caakaita cinofanera kuti aurawe. Ngo kudaro, paakakumbira kuenda kotongwa ndi mambo wo Roma,* ndakavona kuti ndinodikana kumuendesa.
26 Asi andina ciri cese candingatarira Mambo wangu ngo pamusoro pake. Ngo kudaro, ndamuviisa pamberi penyu imwimwi mwese, maningi-ningi imwimwi, Mambo Agripa. Mukapera kumuvhunjisa, kangaije ndingawana zvo kutara.
27 Ngokuti azvina shwiro kondiri, kutumira musungwi ndotamazve kunanga ndava jaari kupumbhwa.”
