Mabasa o Vapostori 6:1-15
6 Mu njiku jondhojo, vajiji pavaiengejeka, Vajudha vaivereketa Cigiriki vakatanga kun’gun’gutira Vajudha vaivereketa Cihebheru, ngokuti noni javo ajicainasepi kupuwa zvokuha zvaikovaniswa vandhu njiku jese.
2 Ngo kudaro, vajiji Gumi na Vaviri vakaunganija vajiji vese, vovavhunja kuti: “Azvizivi kunaka kwatiri kusiya soko ra Mwari kuti tiyende kookovanisa zvokuha pa meza.
3 Waro hama, sananyi vanarume vanomwe pakati penyu vanomugariro wakanaka* no uzivi, kuti itusu tivagaje basa iri;*
4 asi itusu tinozobatikana pa basa rokuita mukumbiro no kucumaira soko.”
5 Zvavakanangari zvakadakajisa vandhu vese, ivona vakasana Estefano mwanarume wakazara ngo rutendo no mujimu mucena pamwepo na Firipi, Prokoro, Nikanori, Timoni, Parmena, Nikorau waivha ku Antiyokiya, wotendeuka kuti ave Mujudha.
6 Ivona vakaenda navo ku vapostori. Pavakapera kuita mukumbiro, vakavacanjikira nyara.
7 Ngo kudaro, soko ra Mwari raienderera mberi reciparajika, vajiji mukuvo wese vaindoengejeka maningi mu Jerusarema; vapiri vakawanda vakava vatendi.
8 Estefano paainga akazara ngo unyasha no simba ra Mwari, waiita mushamaiso jakakura no zvitatijo pakati po vandhu.
9 Vanarume vamweni vo mu Sinagoga yo Vasununguki vakaviya pamwepo no vandhu vo Sirene no Areshandriya, no vamweni vaivha Sirisiya no Aziya kuti vaphikizane na Estefano.
10 Asi ivona avacaikwanisa kucijikira uzivi no mujimu mucena waaibhuya ndiwona.
11 Ivona vaicengeja vandhu ngo cifise-fise kuti vanange kudari: “Takamuzwa ecibhuya zvinotuka Mosi na Mwari.”
12 Ivona vakakukumijira vandhu, vakuru no vatari kuti vaende kwaari ngo civhumbu, vomubata kuti vaende naye ku Sinedhriyo.
13 Ivona vakaviya no zvapupu zvokunyepa zveciti: “Mwanarume uwu, aaripi kuregera kubhuya zvakashata ngo pamusoro po ndau iyi yakacena no kubhuya zvakashata ngo pamusoro po Mutemo.
14 Inga muezaniso, tamuzwa ecibhuya ngo pamusoro pa Jesu wo Nazareta, kuti acazophwanya ndau ino no kucinja zvirovejeso zvatakapuwa ndi Mosi.”
15 Vese vaya vainga vakagara mu Sinedhriyo, vecimusotesesa, vakavona mumeso make, makatojana no mumeso mo ngirozi.
