Marakiya 1:1-14
1 Masoko anosisira:
Masoko a Jehovha aakavhunja Iziraeri ecishandisa Marakiya* nga aya:
2 Jehovha anoti: “Inini ndakamukhombijira rudo.”
Asi imwimwi munonanga kudari: “Makatikhombijirisa kudini rudo hwondhohwo?”
Jehovha wakati: “Izau, aacaingepi hama ya Jakobe? Asi inini ndakada Jakobe,”
3 Ndakanyenya Izau; ndoita kuti matundhu ake asare acina ciro. Ndakaita kuti ndhaka yake igahwe ngo imbhwa jo musora.
4 “Pikija Edhomi ecinanga kudari: ‘Takaparajwa, asi tinozohwirira tovakisazve ndau jedu jakaphwanyika.’ Jehovha wo hondo anonanga kudari: ‘Ivona vanozovaka, asi inini ndinozophwanya. Vanozodanijwa kuti “ndharaundha yo vakashata” yo “vandhu vakatukwa ndi Jehovha mbhera na rini.”
5 Majiso enyu anozovona zviro izvi mozonanga kudari: “Jehovha ngaakujwe mu ndharaundha yese yo Iziraeri.”’”
6 “‘Mwana anoreremeja baba, muranda anoreremeja mambo wake. Asi kudari ndiri baba ngenyi amundireremeji? Kudari ndiri mambo* ngenyi amundithyi?’ Ndini Jehovha wo hondo ari kunangari izvi kwamuri vapiri vanoshora zina rangu. “‘Asi imwimwi munoti: “Takashoresa kudini zina renyu?”’
7 “‘Munopira zviro zvakasvipiswa pa artari yangu.’
“‘Mecinanga kudari: “Takamusvipisisa kudini?”’
“‘Mecitizve: “Meza ya Jehovha, ciro cicikareremejwi.”
8 Jehovha wo hondo anonanga kuti, pamunopira cinyama ciri bofu inga mupiro munonanga kudari: “Apana zvakashata.” Pamunopira cinyama cinothobinya kana cinohwaja munonanga kudari: “Apana cakashata.”’”
“Amboejanyi kutora cinyameco, moenda kocipekeja govhernadhori wenyu. Kureva kuti iyena anozomudakarira kana kuti anozomuashira?”
9 “Asi ndapota, kumbiranyi Mwari kuti atiitire unyasha. Imwimwi mecipira mupiro yakadari, kureva kuti iyena anozomukhombijira unyasha here?” Izvi ngo zvinonanga Jehovha wo hondo.
10 “Ndiyani pakati penyu anoda kufunga musuvo? Ngokuti imwimwi munoda kupagahwi kuti mubasire muriro pa artari yangu.” “Andidakari ndimwi, nee andidakariri mupiro jamunopira.” Izvi ngo zvinonanga Jehovha wo hondo.
11 Jehovha wo hondo anoti: “Ngokuti zina rangu, rinozova guru pakati po majinja. Kutangira kumavhazuva mbhera kumavirira. Usi wo mupiro unozophunga mu ndau yese, zina rangu rinozoitihwa mupiro inga cipo cakacena ngokuti zina rangu rinozova guru pakati po majinja.”
12 “Asi imwimwi muri kurisvipisa meciti: ‘Meza ya Jehovha yakasvipa, mupiro inoizihwepo kubatanijavo no zvokuha zvakasvipavo.’
13 Asi imwimwi munonangazve kudari: ‘Taremba! Mecitama kujireremeja!’ Izvi ngo zvinonangwa ndi Jehovha wo hondo. “Munoviisa zvinyama zvakabiwa, zvinothobinya no zvinohwaja. Munoviisa zviro izvi inga cipo, kureva kuti ndinodikana kuzviashira here?” Izvi ngo zvinonangwa ndi Jehovha.
14 “Ngaatukwe wiya anocengeja ngokuti iyena ano mushambi uno cinyama corume cakapunda. Asi iyena anoita mbhiko wopira kuna Jehovha cinyama cakaremara. Inini ndiri Mambo mukuru.” Jehovha wo hondo anoti: “Zina rangu rinozothyiwa pakati po majinja.”
