Marakiya 2:1-17
2 “Vapiri, mutemo uwu wari, kuitira imwimwi.
2 Jehovha wo hondo anonanga kudari: “Kudari mukaramba kuzwira, motama kukuja zina rangu, ndinozomutumira zvituko ndocinja makomborero enyu ova zvituko. Zvokadi ndacinja makomborero enyu kuva zvituko, ngokuti imwimwi amuzivi kudira zviro izvi mu mwoyo mwenyu.”
3 “Izwanyi! Ndinozouraya mbeu ngo ndava yenyu, ndozokhandira svina mu meso mwenyu, svina yo mutambo jenyu. Imwimwi munozoendeswa kwairi.*
4 Ngo kudaro, imwimwi munozoziva kuti inini ndakamupa mupango wangu uwu kuti citenderano cangu na Revhi cigare ciripo,” izvi ndizvona zvinonanga Jehovha wo hondo.
5 “Citenderano candakaita naye cainga co upenyu no rugarisiko, ndakaenderera mberi ndecimupa zviro izvi kuti athye. Iyena wakandithya, zvokadi iyena wakareremeja zina rangu.
6 Mutemo wo cokwadi wainga pamuromo pake, kutama kururama akuzivi kuwanika pamuromo pake. Waifamba na inini mu rugarisiko no urungami, wobesera vazinji kuti vasiye zvakashata.
7 Ngokuti muromo wo mupiri unodikana kungwarira zivo, vandhu vanodikana kupsanga mutemo* pamuromo pake, ngokuti iyena mutumwi wa Jehovha wo hondo.
8 “Asi imwimwi makabuda mugwanja. Makaita kuti vandhu vazinji vatame kuzwira mutemo. Makagura citenderano ca Revhi,” izvi ndizvona zvinonanga Jehovha wo hondo.
9 “Ngo kudaro, inini ndinozomushoresa no kumudodokesa pamberi po vandhu vese, ngokuti imwimwi amuzivi kungwarira makwanja angu. Amuzivizve kutaja vandhu vese ngo manera ondhowo pamaishandisa mutemo.”
10 “Tese atina baba umwewo basi? Asipi Mwari umwe basi wakatisika here? Waro ngenyi tinonyeperana umwe no umweni, kuri kusvipisa citenderano co majibaba edu?
11 Vandhu vo Judha avazivi kuva vakagondeka. Mu Iziraeri no mu Jerusarema makaithwa zviro zvakashata; ngokuti vandhu vo Judha vakasvipisa uceni wa Jehovha waanoda. Vanarume vavo vakarovora mwana wokaji anonamata cimwari co nyikanja.
12 Jehovha anozouraya mundhu wese ari mutende ya Jakobe anoita zviro izvi, azvinenyi kuti ndiyani, pikija ecipira zvipo Jehovha wo hondo.”
13 “Pano ciro cimweni camunoita cinosiya artari ya Jehovha yakafukijwa ngo musoji, ngo kucema* no kuhwajihwa. Izvi zvaita kuti iyena atame kutendera mupiro yenyu no kutama kudakarira zviro zvese zvamunomupa.
14 Imwimwi munonanga kudari: ‘Ngo ndava yenyi?’ Ngokuti Jehovha ndiyena capupu pakati pako no mukaji wowakarovora mu ujaha wako uwo wowakacengeja, pikija iyena wainga mudoni wako ari mukaji wako wo citenderano.*
15 Asi pano umwe acikazivi kuita zviro izvi, ngokuti iyena wainga ano mujimu mucena wa Mwari wainga wasara. Iyena wairangarira ngo pamusoro penyi? Ngo pamusoro po vana va Mwari. Ngo kudaro, ngwariranyi mwoyo* yenyu, umwe na umwe wenyu acadotama kuva wakagondeka ku mukaji waakarovora mu ujaha wake.
16 Inini ndinonyenya kurambana,” izvi ndizvona zvinonanga Jehovha, Mwari wo Iziraeri, “na wiya anofukija nguvo yake ngo kuita zviro zvakashata,” izvi ndizvona zvinonanga Jehovha wo hondo. “Ngwariranyi mwoyo* yenyu, regeranyi kucengeja.
17 Imwimwi munonesa Jehovha ngo masoko enyu. Asi munonanga kudari: ‘Tinomunesesa kudini?’ Mecitizve: ‘Mundhu wese anoita zvakashata wakanaka mu meso ma Jehovha, iyena anomudakarira,’ kana mecinanga kudari: ‘Mwari wo ururami ari kwapi?’”
Masoko o Pasi
^ Kana kuti, ku ndau yaidihwa manyongo o zvinyama zvaiithwa mupiro.
^ Kana: “kujijiswa.”
^ Kana: “kurira.”
^ Kana: “wowakabatanijwa naye ngo mutemo.”
^ Gama ngo Gama: “mujimu.”
^ Gama ngo Gama: “mujimu.”
