Marakiya 3:1-18
3 “Vonanyi! Ndiri kumutumira ndhumwa yangu, iyona inozondinasirira gwanja. Ngo civhumbu, mambo wo cokwadi wamuri kupsakaro, anozoviya mu themberi yake. Ndhumwa yo citenderano yamunodakarira, inozoviyavo. Iyona inozoviyadi kamare.” Izvi ngo zvinonanga Jehovha wo hondo.
2 “Asi ndiyani anozocijikira pa njiku yaanozoviya? Ndiyani anozokwanisa kuenderera mberi akaima akazoviya? Ngokuti iyena anozoezana no muriro wo munyungurusi no sabau yo vapaji.
3 Iyena anozogara inga munyungurusi no mucenesi wo sirivha, wozocenesa vana va Revhi. Anozovacenesa inga goridhi no sirivha. Ivona vanozoita vandhu vanopa mupiro yakarurama kuna Jehovha.
4 Mupiro wa Judha no wo Jerusarema jinozodakajisa Jehovha inga mu njiku jo kare mu mukuwo wo kare.
5 Jehovha wo hondo anoti: “Inini ndinozoviya phedo newe kuti ndikutonge. Ndinozotonga ngo kukasika varoi, vanoita upombo, vanoita mbhiko jo kunyepa, vanobira vandhu vanoita* muphakamiso, noni, ndherera* na vaya vanoramba kubesa vonyikanja, ngokuti vandhu ava avandithyi.”
6 “Ngokuti inini ndini Jehovha, andicinji.* Imwimwi muri vana va Jakobe; amuto maguma kumagumo.
7 Kuvhira mu njiku jo majibaba enyu, imwimwi amuripi kuzwira mupango yangu, mucikaivigi. Hwiriranyi kondiri, inini ndinozohwiriravo kwamuri.” Izvi ngo zvinonanga Jehovha wo hondo.
Asi imwimwi munoti: “Tingahwiririsa kudini kwamuri?”
8 “Mundhu angabira Mwari here? Asi imwimwi muri kundibira.”
Imwimwi munoti: “Takamubirisa kudini?”
“Ngo pamusoro po cogumi no mupiro.”
9 Zvokadi, imwimwi makatukwa, ngokuti muri kundibira. Jinja rese riri kuitavo zvondhozvo.
10 Viisanyi cogumi cese mu nyumbu, kuti mu nyumba yangu muve no zvokuha. Ndapota, ndiyejenyi ngo pamusoro po shwiro iyi,” izvi ngo zvinonanga Jehovha wo hondo. “Muvone dangani andizomufununguriri musuvo jo kumatenga, ndomudururira makomborero mbhera mutame cinomucotera.”
11 “Jehovha wo hondo anoti: “Inini ndinozopangira muparaji, iyena aazourai zvirimwa zvenyu. Muuvha yo mu munda menyu jinozobara.”
12 “Jehovha wo hondo anoti: “Majinja ese anozonanga kuti imwimwi muri vandhu vakadakara, ngokuti nyika yenyu inozova nyika inodakajisa.”
13 Jehovha anoti: “Masoko amuri kubhuya ngo pamusoro pangu, ari kundihwaja.”
Asi imwimwi munoti: “Ngo zvapi zvatiri kubhuya zviri kumuhwaja?”
14 “Asi imwimwi munonanga kudari: ‘Kushandira Mwari akubeseri. Takaita zvaanotivhunja, tofamba takacamwa pambeji pa Jehovha Mwari wo hondo. Waro zvakatibeserenyi?
15 Kuvhira wari, tinozonanga kuti vandhu vanozvikuja ndivona vakadakara. Kunja kwa izvi, vaya vanoita zvakashata, ndivona vanobudirira. Ivona avathyi kueja Mwari, vecidada ndizvona.’”
16 Pa nguva yondhoyo, vaya vaithya Jehovha vakavhunjana. Umwe na umwe waivhunja shamwari yake. Jehovha wakaenderera mberi wakateya njeve ecizwa. Pamberi pake, pakatahwa bhuku ro zviceukijo kuitira vaya vanothya Jehovha na vaya vanorangarijisisa ngo pamusoro po zina rake.
17 “Ivona vanozova vangu,” izvi ngo zvinonanga Jehovha wo hondo, “pa njiku yandinozovaita vandhu* vanosisira. Ndinozovaitira pena inga zvinoitwa ngo mundhu anoitira pena mwana wake anomuzwira.
18 Imwimwi munozovonazve kusiyana ko mundhu wakarurama no mundhu wakashata, mundhu anoshandira Mwari no mundhu acikamushandiri.”
Masoko o Pasi
^ Kana: “vano bata basa.”
^ Wakafihwa ndi baba.
^ Kana: “andizivi kucinja.”
^ Kana: “upfumi unosisira.”
