Marko 7:1-37
7 Vafarisi no vatari vamweni vakavha ku Jerusarema, vakamutendeneja.
2 Ivona vakavona vajiji vake vamweni veciha ngo nyara jicizivi kucena, zvinoti, jicizivi kusambwa.*
3 (Ngokuti Vafarisi no Vajudha vese avahi vacizivi kusamba nyara mbhera ku zvikokora, ngo kutevejera zvirovejeso zvo vandhu vokare.
4 Vakambhera ngo kuvha kubazari, avahi vacizivi kusamba. Kuno zvirovejeso zvizinji zvavakapuwa, zvavari kuita, zvakadari inga kubija mukumwa* kopo, mabanamba no mujiyo jo utare.)
5 Vafarisi no vatari ava, vakamuvhunjisa kuti: “Vajiji vako avateveji ngenyi zvirovejeso zvo vandhu vokare? Ngokuti vanoha ngo nyara jicizivi kucena.”
6 Iyena wakavavhunja kuti: “Isaya wakanasa kuporofeta ngo pamusoro penyu imwimwi vacengejeri, inga zvakatahwa kuti: ‘Vandhu ava vanondikuja ngo muromo yavo, asi mwoyo yavo iri ndhambo na inini.
7 Vanoenderera mberi vecindinamata biresi, ngokuti vanojijisa mutemo jo vandhu basi.’
8 Imwimwi munosiya mupango wa Mwari, mecibatisisa zvirovejeso zvo vandhu.”
9 Iyena wakavavhunjazve kuti: “Imwimwi munokwanisa ushoni kurerusa mupango wa Mwari kuti mubatisise zvirovejeso zvenyu.
10 Inga muezaniso, Mosi wakati: ‘Kujai baba na mai wako.’ Iyena wakatizve: ‘Wiya anotuka baba kana mai wake ngaaurawe.’
11 Asi imwimwi munoti: ‘Kudari mundhu akavhunja baba wake na mai wake kuti: “Ciri cese candinaco caizobesera imwimwi, cava korbhani (zvinoreva kuti cipo cakapuwa Mwari),”’
12 Imwimwi amumutenderizve kuti aitire baba na mai wake ciricese.
13 Ngo kudaro, imwimwi munoita kuti soko ra Mwari ritame kushanda ngo ndava yo zvirovejeso zvenyu zvamunojijisa vamweni. Imwimwi munoita zvizinji zvakadaro.”
14 Paakadanijazve mbungano kuti iyende kwaari wakaivhunja kuti: “Ndipurukirenyi mwese munase kuzwisisa.
15 Akuna ciri kunja ko mundhu cinomusvipisa, cikanghwina mukati make; asi zviro zvinovha mukati mo mundhu ngo zvinomusvipisa.”
16 *——
17 Paakanghwina mu nyumba, ndhambo no mbungano, vajiji vake vakatanga kumuvhunjisa ngo pamusoro po muezaniso wiya.
18 Iyena wakavavhunjisa kuti: “Imwimwi amuzwisisivo inga ndivona kani? Amuzvizivi here kuti apana cinonghwina mu ndani mo mundhu comusvipisa?
19 Ngokuti acinghwini mu mwoyo, asi cinonghwina mu ndani* perepo cosvejwa mu ratirina. Ngo kudaro, Jesu wainga ecinanga kuti zvokuha zvese zvakacena.
20 Iyena wakanangazve kuti: “Cinobuda mu mwoyo wo mundhu ndicona cinomusvipisa.
21 Ngokuti ngo mukati mo mwoyo wo mundhu, munovha murangariro wakashata, uhure,* umbavha, kuuraya,
22 upombo, kudisisa zviro zvakawanda, zviito zvakashata, kunyepejera, mufambiro unopseruja, thima, kutuka, kujikuja no upenji.
23 Zviro zvese zvakashata izvi zvinovha mukati. Izvona zvinosvipija mundhu.”
24 Paakavha pondhopo, Jesu wakaenda ku mutundhu wo Tiro no Sidhoni. Kondhoyo wakanghwina mu nyumba imweni, aacaida kuti ariwese azvizive, asi zvakandozivika basi.
25 Ngo kukasika, mwanakaji umweni wainga no mwana wokaji ano mujimu wakashata, wakazwa ngo pamusoro pa Jesu. Ngo kudaro, wakamukhwederera wogwadama pa soka jake.
26 Mwanakajiwo wainga Mugiriki, wo jinja ro Sirofenisiya, iyena waindomukumbira kuti agogomere dhimoni rainga no mwana wake wokaji.
27 Iyena wakamuvhunja kuti: “Regerai kuti vana vatange kuguta, ngokuti azvizivi kunaka kutora pau yo vana vadoko kakuikhandirira zviimbhwa.”
28 Mwanakajiwo wakamudavira kuti: “Ndizvona, Mambo, asi zviimbwa zviri pasi po meza zvinobojeravo mbhakata jinombhwejwa ngo vana vadoko.”
29 Jesu wakamudavira kuti: “Ngokuti wananga kudaro, endai hako; dhimoni rabuda pa mwana wako.”
30 Ngo kudaro, iyena wakahwirira kanyi, wokhanda mwana akavata pa mubhedhu. Dhimoni riya rainga rabuda.
31 Jesu paakavha ku mutundhu wo Tiro wakapinda ngo Sidhoni ecienda ku Jombe ro Garireya, ngo pakati po Dhekapori.*
32 Vakamuviisira mundhu wainga no mandondo. Iyena aacaikwanisepi kuvereketa ushoni. Ngo kudaro, vandhu vakadeketerera Jesu kuti amucanjikire nyara.
33 Iyena wakamutora woenda naye pamutivi pacina vandhu, ndhambo no mbungano. Jesu wakanghwinisa zvikunwe zvake mu njeve jake, pasure po kupfira mata, wakapsasa rurumi hwake.
34 Ecisota mudenga, wakafemeruka, womuvhunja kuti: “Efataa,” zvinoreva kuti, “Funungukai.”
35 Ngo kudaro, njeve jake jakafununguka, cineso cake cokutama kuvereketa cakapera, wotanga kunasa kuvereketa ushoni.
36 Iyena waivarambisa kuti vatame kuzvivhunja ariwese, asi paaivarambisa, ivona vainyanya kuzvitokotesa.
37 Ivona vaikahamara maningi ndizvona veciti: “Iyena anoita ushoni zviro zvese. Iyena anoita kuti vanomandondo vazwe, mbeveve jecivereketa.”
Masoko o Pasi
^ Kusamba nyara ko mutango-mutango.
^ Gama ngo Gama: “inga kubhabhatija.”
^ Vonanyi masoko o pasi ari pana Mateu 17:21.
^ Gama ngo Gama: “mu susu.”
^ Apa mu Cigiriki, por·nei′a zviri kunangira uhure unobatanija zvakawanda. Vonanyi Kudurujihwa ko Magama.
^ Kana: “Mutundhu wo Gumi ro Madhorobha.”
