Mateu 10:1-42
10 Ngo kudaro, wakadanija vajiji vake gumi na vaviri, wovapa simba ro kugogomera mujimu yakashata no kurapa mushovo wese wo ndhendha.
2 Mazina o vapostori gumi na vaviri nga aya: Wokutanga ndi Simoni anodanijwa kuti Pedhru, no munukunake anozwi Andereya; Jakobo mwana wa Zebhedhi na Johani munukuna wa Jakobo;
3 Firipi na Bhatoromeu; Tomasi na Mateu mushabisi; Jakobo mwana wa Arifeu; Tadheu;
4 Simoni Mukhanani;* na Judha Iskariyote wakazotengesaya Jesu.
5 Jesu wakatuma gumi na vaviri ava, wovapa ndhungamiriro iji: “Mucaenda ku vandhu vo majinja, mucanghwina mu dhorobha ririrese ro Vasamariya;
6 Asi, endanyi ku mavhuta akasvejeka o nyumba ya Iziraeri.
7 Pamunoenda, cumaeranyi meciti: ‘Umambo hwo kudenga hwaaphedo.’
8 Rapanyi vanohwaja, musanyi vakafa, rapanyi vano mapere, gogomeranyi madhimoni. Makapuwa mahara, ipanyivo mahara.
9 Mucapsakazve kudira mu zvikhwama zvenyu goridhi, sirivha kana utare,*
10 kana cinyede co zvokuha, nguvo jimweni,* magwada kana ndonga kuti muite hwendo, ngokuti Mwari anozopa zvokuha zvinofanera vashandi.
11 “Mu madhorobha ese no ndharaundha jamunonghwina, psakanyi mundhu anofanera, mogaremo mbhera kubuda kwenyu.
12 Pamunonghwina mu nyumba jo vandhu, vacungamijenyi.
13 Kudari vakamuashira ushoni, runyararo hwenyu ngahuve na ivona; asi kudari vakatama kumuashira ushoni, runyararo hwenyu ngahugare huna imwimwi.
14 Kuri kwese kwamunotama kuashihwa ushoni ngo mundhu ariwese kana ariwese akatama kupurutana masoko enyu, pamunovha pa nyumba yondhoyo kana mudhorobha rondhoro, pumbhujanyi bukuta ro soka jenyu.
15 Zvokadi ndinomuvhunja kuti: Mu njiku yo Kutongwa, zvinozova zvakareruka maningi ku madhorobha o Sodhoma no Gomora kuti acungirire kupinda ku dhorobha iri.
16 “Ndiri kumutumira inga mavhuta pakati po mapumbhi, ngo kudaro ngwaranyi inga nyoka, asi mucina ndava inga njiva.
17 Bhasopanyi no vandhu vanomuzonda, ngokuti vanozomuendesa mu mapanje o pamutundhu no kumutaka mu masinagoga avo.
18 Munozoendeswa pamberi po magovhernadhori no majimambo ngo ndava yangu, kuti muite ucapupu pamberi pawo no pamberi po vomajinja.
19 Asi, vakamupa mu nyara jo vatongi, mucadothimwa-thimwa ngo zvamunozoda kuvereketa, kana manera amunoda kuzvivereketa, ngokuti munozopuwa zvokuvereketa pa nguva yondhoyo;
20 ngokuti andimwipi basi munozovereketa, asi mujimu wa Baba wenyu, ndiwona unozovereketa wecishandisa imwimwi.
21 Kusiyapo izvo, hama inozouraisa hama yayo, baba vanozouraisa mwana wavo, vana vanozomukira vabari vavo no kuvauraisa.
22 Munozonyenywa ngo vandhu vese ngo ndava yo zina rangu, asi wiya anocungirira mbhera kumagumo anozoponeswa.
23 Pavanomuteverera mu dhorobha rimwe, tiziranyi ku dhorobha rimweni; zvokadi ndinomuvhunja kuti: Amuzopeji kutenderera madhorobha ese o Iziraeri, Mwana wo mundhu acito aguma.
24 “Mujiji aaripi panyezuru po mujijisi wake, nee muranda aaripi panyezuru pa mambo wake.
25 Zvinokwana ku mujiji kuva inga mujijisi wake, muranda kuva inga mambo. Kudari vandhu vakadanija mune wo nyumba kuti ndi Bherizebhu, vo pamuzi pake vanozoviya ngo kwapi?
26 Ngo kudaro, mucavathya, ngokuti apana cakafukijirika cicikazophetuhwi, akuna cakafisika cicikazoziviki.
27 Zvandinomuvhunja mu cidima, zvinangenyi pa ruvheneko, zvamunozwa ngo ciweye-weye, zvicumaerenyi pamberi po vese.
28 Mucathya vaya vanouraya muviri, vacikakwanisi kuuraya upenyu;* kusiyapo izvo, ithyanyi wiya anoparaja upenyu no muviri mu Gehena.*
29 Ndaka* mbiri ajitengeswi ngo cereni ro mutengo mushoma? Apana na imwe yajo inowa pasi, Baba wenyu vacikaizivi.
30 Asi vhuji rese ro mu musoro menyu rakaverengwa.
31 Ngo kudaro, mucathya, imwimwi muno mutengo mukuru maningi kupinda ndaka.
32 “Ariwese anondizivisa pamberi po vandhu, inini ndinozomuzivisavo pamberi pa Baba wangu vo kumatenga.
33 Asi, wiya anodiramba pamberi po vandhu, inini ndinozomurambavo pamberi pa Baba wangu vo kumatenga.
34 Mucarangarira kuti ndaviya no runyararo pasi pano, andizivi kuviisa runyararo, asi ndakaviya kuzoparajanisa.*
35 Ngokuti ndakaviya kuzoparajanisa mwana na baba wake, mwana wokaji na mai wake, nyamwana na nezvara wayo.
36 Ngo ndava yazvo, vavengi vo mundhu vanozova vo pamuzi pake.
37 Wiya anoda maningi baba wake na mai wake kupinda inini, aasisiri kwandiri, ndiyani anoda maningi mwana wake worume kana wokaji kupinda inini, aasisiri kwandiri.
38 Wiya acikaashiri mutanda wake wokutambujikira* wotama kunditevera, aasisiri kwandiri.
39 Wiya anopsaka kuponesa upenyu hwake, anozohuruza, wiya anoruza upenyu ngo ndava yangu, anozohuwana.
40 “Wiya anomuashira, anondiashiravo, wiya anondiashira, anoashiravo Wiya wakandituma.
41 Wiya anoashira muporofeti ngokuti muporofeti, anozowana mupfupo wo muporofeti. Wiya anoashira mururami ngokuti mururami, anozowana mupfupo wo mururami.
42 Ariwese anopa kopo imwe yo kumwa yo kutondhora ku umwe wo vadoko ava ngokuva mujiji wangu, ndinomuvhunja cokwadi kuti aazoruzi mupfupo wake.”
Masoko o Pasi
^ Kana: “anovangisira.”
^ Mu Ciputukezi i cobre.
^ Kana: “mbiri.”
^ Zvinoreva kuti: Vetero yokuwana upenyu.
^ Vonanyi Kudurujihwa ko Magama.
^ Zvishiri zvidoko.
^ Gama ngo Gama: “asi ndakaviisa banga.”
^ Vonanyi Kudurujihwa ko Magama.
