Mateu 12:1-50
-
Jesu “ndiyena Mambo wo Sabudu” (1-8)
-
Mwanarume waikhokhodara nyara anoraphwa (9-14)
-
Muranda anodiwa wa Mwari (15-21)
-
Madhimoni anogogomehwa ngo mujimu mucena (22-30)
-
Cishaishi cicikaregerehwi (31, 32)
-
Muti unozivika ngo mucero wawo (33-37)
-
Citatijo ca Jona (38-42)
-
Mujimu wakashata paunoviyazve (43-45)
-
Mai no hama ja Jesu (46-50)
12 Mu mukuvowo, Jesu wakapinda ngo mu maminda ngo Musabudu. Vajiji vake vakazwa njara, ngo kudaro, vakaamba kupurura musoso, vocenga.
2 Vafarisi pavakazvivona, vakamuvhunja kuti: “Vonai! Vajiji vako vari kuita zvicikatendehwi ngo Musabudu.”
3 Iyena wakati kwavari: “Amuzivi kuverenga zvakaithwa ndi Dhavhidhi no vandhu vaainga navo, pavaizwa njara?
4 Wakanghwina mu nyumba ya Mwari no vandhu vake voha pau jaiithwa mupiro, javacaitendehwa kuha, asi jaitendehwa kuhiwa ngo vapiri basi.
5 Amuzivi kuverenga mu Mutemo? Ngo Musabudu vapiri vaishanda mu themberi, vogara vacina ndava.
6 Asi ndinomuvhunja kuti ciro cikuru kupinda themberi ciri pano.
7 Asi kudari makazwisisa kuti anorevenyi magama okuti: ‘Ndinoda usizi kuciripi mupiro,’ amucaizotonga vandhu vacina ndava.
8 Ngokuti Mwana wo mundhu ndiyena Mambo wo Sabudu.”
9 Naavhepo, Jesu wakanghwina mu sinagoga mavo,
10 mondhomo mainga no mundhu waikhokhodara nyara! Vecida kumupumbha, vakamuvhunjisa kuti: “Zvinotendehwa here kurapa ngo Musabudu?”
11 Jesu wakavadavira kuti: “Kudari umwe wenyu ano vhuta rimwe, rowira murindi ngo Musabudu, aripo pakati penyu acikaribati worivhisemo?
12 Mundhu anosisira maningi kupinda vhuta! Ngo kudaro, zvinotendehwa kuita zvakanaka ngo Musabudu.”
13 Jesu wakavhunja mundhu wiya kuti: “Tambanujai nyara yako.” Iyena wakatambanuja nyara yake, perapo yovanga, kakutojana no imweni.
14 Vafarisi vakabudemo, vozwirana kuti vamuuraye.
15 Jesu paakazviziva, wakabudepo. Vazinji vakamuteveravo, wovarapa vese,
16 asi wakavakohomeja kuti vatame kumutokotesa,
17 kuti zvikwanirisike zvakanangwa ngo muporofeti Isaya kuti:
18 “Nga uwu muranda wangu wondakasana. Mudiwa wangu, anondidakajisa. Ndinozodira mujimu wangu pa nyezuru pake, kuti azotokotese ururami ku majinja.
19 Aazovereketesani. Aazokhuwi. Izwi rake arizoziki mu makwanja makuru.
20 Aazoguri njanga yakabweshuka. Aazojimi turusida inopfukuta,* mbhera anasirire zviro zvese zvakashata.
21 Majinja ese anozovetera mu zina rake.”
22 Pondhopo vakaza no mundhu wainga no dhimoni, wainga ari bofu, wainga mbeveve. Iyena wakamurapa. Ngo kudaro, mbeveve yakavereketa no kuvona.
23 Mbungano yese yakakahamara yotanga kunanga kuti: “Uwu asipi Mwana wa Dhavhidhi?”
24 Vafarisi pavakazwa izvi, vakati: “Mundhu uwu anogogomera madhimoni ngo zina ra Bherizebhu,* mutongi wo madhimoni.”
25 Jesu eciziva murangariro wavo, wakavavhunja kuti: “Umambo huri hwese hunoparajana ngocahwo, hunozopera. Dhorobha kana ukama hunoparajana ngocahwo, ahuzocijikiri.
26 Mu njira yondhoyo, kudari Sathana akagogomera Sathana, anojiparajanisa ega. Waro umambo hwake hungazoimisa kudini?
27 Asi kudari inini ndecigogomera madhimoni ngo zina ra Bherizebhu,* vana venyu vanogogomera ngo zina raani? Ngo zvinozoitisa kuti ivona vaite vatongi venyu.
28 Asi, kudari ndecigogomera madhimoni ngo mujimu wa Mwari, Umambo hwa Mwari hwaguma kwamuri.
29 Anganghwinisa kudini mundhu mu nyumba yo mundhu ano simba, wotora ngo simba zviro zvake, acizivi kumusunga? Akaita kudaro, anozokwanisa kuba zviro zviri mu nyumba yake.
30 Wiya aciripi na inini, anohwisana na inini, wiya acikaunganiji vandhu na inini, anovagogomera.
31 “Ngo ndava yazvo, ndinomuvhunja kuti: Mushovo wese wo cishaishi co vandhu no kutuka kunozoregerehwa, asi kutuka mujimu akuzoregerehwi.
32 Inga muezaniso, wiya anoshora Mwana wo mundhu anozoregerehwa. Asi wiya anoshora mujimu mucena aazoregerehwi nguva ino, nee nguva inozari.
33 “Kudari mukasima muti wakanaka, muti uwu unobara mucero wakanaka. Mukasima muti wakashata, iwona unozobaravo mucero wawo wakashata. Ngokuti muti unozivika ngo mucero wawo.
34 Imwi vana vo vhumbi! Mungazovereketesa kudini zvakanaka kuveni muri vandhu vakashata? Ngokuti muromo unovereketa zvakazara mu mwoyo.
35 Mundhu wakanaka anovhisa zvakanaka mu upfumi hwake. Asi mundhu wakashata anovhisa zvakashata mu upfumi wake.
36 Ndinomuvhunja kuti, vandhu vanozodavira pa Njiku yo Kutongwa ngo ndava yo masoko ese o mahara avanovereketa.
37 Kudari mavereketero enyu akava akanaka, Mwari anozomuvona kuti muri mundhu anoita zvakanaka, asi kudari mavereketero enyu akava akashata, Mwari anozomutonga.”
38 Pondhopo vatari vamweni no Vafarisi vakamuvhunja kuti: “Mujijisi, tinoda kumuvona meciita citatijo.”
39 Jesu wakavadavira kuti: “Mubarihwana wakashata no wo upombo, iwona unoenderera mberi wecipsaka citatijo, asi akuna citatijo caunopuwa kuciripi citatijo ca Jona muporofeti.
40 Kudari ndi Jona wakagara mu ndani mo hove huru mazuva matatu no usiku hutatu, Mwana wo mundhu anozogaravo pasi po mavhu mazuva matatu no usiku hutatu.
41 Vaninivhe vanozomukira mubarihwana uwu pa njiku yo kutongwa, voupa ndava, ngokuti ivona vakatendeuka ngo pamusoro po masoko akacumaera Jona. Asi mundhu mukuru anopinda Jona ari pano.
42 Vahosi vo kakusi vanozomuswa pamwepo no mubarihwana uwu pa njiku yo kutongwa, voupa ndava, ngokuti vakavha ku magumo ko nyika, voviya kuzozwa ungwaru hwa Soromona. Asi mundhu mukuru anopinda Soromona ari pano.
43 “Mujimu wakashata paunobuda pa mundhu, unopinda ngo mu ndau jicina kumwa wecipsaka pandau yokuzororera. Asi aupawani.
44 Iwona unoti: ‘Ndinozohwirira kanyi kwangu kwandakavha,’ paunoguma, nyumba iya inonga icina mundhu, asi yakapsaihwa no kurongwa ushoni.
45 Iwona unoenda kotora mujimu munomwe yakashata maningi kupinda iwona. Painonghwina mu nyumba iyi, mujimu iya inogaremo. Ngo kudaro, magariro o kupejisira o mundhu uwo, anozoshata maningi kupinda o kutanga. Ndizvona zvinozoitikavo no mubarihwana uwu wakashata.”
46 Paainga acavereketa no mbungano, mai wake no hama jake vainga vakaima kunja, vecida kubhuya naye.
47 Mundhu umweni wakamuvhunja kuti: “Nandi! Mai wenyu no hama jenyu vari kunjeyo, vanoda kubhuya na imwimwi.”
48 Jesu wakamudavira kudari: “Ndiyani mai wangu no hama jangu?”
49 Ecitatija vajiji vake, iyena wakati: “Nga ava mai wangu no hama jangu!
50 Ngokuti wiya anoita kuda ka Baba wangu vari kumatenga, ndiyena hama yangu, hambzaji yangu na mai wangu.”
