Mateu 25:1-46
25 “Umambo hwo kumatenga hungaezaniswa no gumi ro mbhandwe jakatora zvibani* zvajo, joenda kotandamija* mukwambo.
2 Shanu jainga marethe, shanu jaingwara.
3 Jaingaya marethe jakatora zvibani* zvajo, asi ajizivi kutora mafuta.
4 Kuveni jaingwaraya jakatora mafuta mu mabotiri ajo pamwepo no zvibani.
5 Mukwambo paainonoka, mbhandwe jese jakaozira jovata.
6 Pakati po usiku, kwakazika izwi raidanijira kuti: ‘Ari kuza mukwambo! Endanyi komutandamija.’
7 Mbhandwe jese jakamuka jonasirira zvibani* zvajo.
8 Jaingaya marethe jakavhunja jakangwara kudari: ‘Tipungurirenyivo mafuta enyuwo, ngokuti zvibani* zvedu zvoda kujima.’
9 Jakangwara jakadavira kuti: ‘Kangaije aakwani kupungurirana na imwimwi. Endanyi ku vatengesi vo mafuta, mootenga mafuta enyu.’
10 Pajaienda kotenga mafuta, mukwambo wakaguma. Mbhandwe jainga jakanasirira, jakanghwina naye mu mabuso o mucadho, musuvo wakafungwa.
11 Sure kwazvo, jakaguma mbhandwe jimweni jiya, joti: ‘Vamukwambo, vamukwambo, tifunungurirenyivo!’
12 Iyena wakapingura kuti: ‘Zvokadi ndinomuvhunja kuti, andimuzivi.’
13 “Asi, garanyi makarinda, ngokuti imwimwi amuizivi njiku no nguva.
14 “Ngokuti zvakaezana no mundhu umweni, ecida kuronga hwendo, wakadanija varanda vake wovasiira upfumi hwake.
15 Iyena wakapa umwe matarenta* mashanu, umweni maviri, umwenizve rimwe, mukuzwirana no zvavaikwanisa kuita, wopinda.
16 Wiya wakaashira matarenta mashanu wakamaita nyagoso, wowanazve mashanu.
17 Ndizvonavo zvondhozvo zvakaita wiya wakaashira matarenta maviri, ngokuti wakawanazve maviri.
18 Asi waingaya akaashira rimwe, wakaca rindi wofushira mare* ya patarau wake.
19 “Sure ko mukuvo muzinji, patarau wakaviya, woda kuti varanda vaya vaviise mare yaakavasiiraya.
20 Wiya wakaashira matarenta mashanu, wakamukhwederera woviisazve matarenta mashanu, eciti: ‘Patarau, matarenta mashanu amakandipaya, ndawanazve mashanu.’
21 Patarau wake wakati kwaari: ‘Waita ushoni, muranda wakanaka no wakagondeka! Wagondeka pa zviro zvishoma. Ndinozokugaja pa zviro zvizinji. Dakarai pamwepo na patarau wako.’
22 Tevere, wiya wakaashira matarenta maviri wakamukhwederera, woti: ‘Patarau, matarenta maviri amakandipaya, ndawanazve maviri.’
23 Patarau wake wakati kwaari: ‘Waita ushoni, muranda wakanaka no wakagondeka! Wagondeka pa zviro zvishoma. Ndinozokugaja pa zviro zvizinji. Dakarai pamwepo na patarau wako.’
24 “Pakupejisira, muranda wakaashiraya tarenta rimwe wakamukhwederera, woti: ‘Patarau, ndaizviziva kuti makacunga, munokotora pamucizivi kusima no kuunganija zvamucizivi kushandira.
25 Ngo ndava yazvo, ndakathya, ndoenda koviga pasi tarenta renyu. Waro nga iri, ndiri kumuhwirijira.’
26 Patarau wake vakamudavira kuti: ‘Muranda wakashata no ano nungo, uri kunanga kuti waiziva kuti ndinokotora pandicizivi kusima, ndinounganija pandicizivi kushandira?
27 Ngo kudaro, waidikana kuvigisa mare yangu ku vavigi vo mare, pandaizoviya, ndaizoashira mare yangu yawanda.
28 “‘Mutorerenyi tarenta, muripe wiya ano gumi ro matarenta.
29 Ngokuti wiya anazvo anozopuwa zvizinji, wova no zvakawanda maningi. Asi wiya acina, anozotorehwavo no zvishoma zvaanozvo waro.
30 Khandiranyi kunja kuno cidima muranda acikabesi. Kondhoyo anozocema no kugeda-geda meno.’
31 “Akazoviya Mwana wo mundhu mu nduma yake pamwepo no ngirozi jake jese, iyena anozogara pa cigaro co nduma yake.
32 Majinja ese anozoungana pamberi pake. Iyena anozoparajanisa vandhu, inga muhavisi anoparajanisa mavhuta no mbuji.
33 Iyena anozodira mavhuta ku mukono muho wake asi mbuji ku mukono boshwe.
34 “Mambo anozovhunja vari ku mukono muho wake kuti: ‘Viyanyi imwimwi makakomborehwa ndi Baba wangu. Garanyi utaka hwo Umambo hwamakanasiririhwa kuvhira pa kutanga ko nyika.*
35 Ngokuti ndainga no njara, imwimwi makandipa zvokuha; ndainga no nyota, imwimwi makandipa kumwa. Ndainga murendo, imwimwi makandiashira ushoni;
36 ndainga mitu,* imwimwi makandisimija. Ndaihwaja, imwimwi makandikorondha. Ndainga mu kadheya, imwimwi makaviya kuzondivona.’
37 Vakarurama vanozomudavira kuti: ‘Mambo, takamuvona rini muno njara, tomupa zvokuha; muno nyota tomupa kumwa?
38 Takamuvona rini muri murendo, itusu tomuashira ushoni; muri mitu, itusu tomusimija?
39 Takamuvona rini mecihwaja kana muri mukadheya, itusu toviya kuzomuvona?’
40 Mambo anozovadavira kuti: ‘Zvokadi ndinomuvhunja kuti, zvese zvamakaitira umwe wo hama jangu doko iji, makazviitira inini.’
41 “Sure kwazvo, anozovhunja vari ku mukono boshwe kuti: ‘Ivhanyi kwandiri imwimwi makatukwa. Endanyi ku muriro ucikaperi wakanasiririhwa Dhiyabhu no ngirozi jake.
42 Ngokuti ndainga no njara, imwimwi amuzivi kundipa zvokuha; ndainga no nyota, imwimwi amuzivi kundipa kumwa.
43 Ndainga murendo, imwimwi amuzivi kundiashira ushoni; ndainga mitu, imwimwi amuzivi kundisimija. Ndaihwaja, ndainga mukadheya, asi imwimwi amuzivi kundikorondha.’
44 Ivona vanozomudaviravo kuti: ‘Mambo, takamuvona rini muno njara, muno nyota, muri murendo, muri mitu, mecihwaja kana muri mukadheya, itusu totama kuviya kuzomubesa?’
45 Iyena anozovadavira eciti: ‘Zvokadi ndinomuvhunja kuti, zvese zvamucizivi kuitira umwe wo hama jangu doko iji, amuzivi kuzviitiravo inini.’
46 Vakashata ava vanozoenda koparajwa kucikaperi, asi varurami vanozoenda ku upenyu hucikaperi.”
Masoko o Pasi
^ Zvigabhu-gabhu.
^ Kana: “koashira.”
^ Zvigabhu-gabhu.
^ Zvigabhu-gabhu.
^ Zvigabhu-gabhu.
^ Tarenta rimwe ro Cigiriki rinoezana no kiru jinokwana 20,4.
^ Gama ngo Gama: “sirivha.”
^ Zvinoreva kuti: Kutanga kubahwa ko vana va Adhamu na Evha.
^ Kana: “ndicina nguvo jakakwana.”
