Mateu 9:1-38
9 Paakapakira ngarava, wakaambuka mwombera, woenda mu dhorobha rake.
2 Kondhoyo, vandhu vakamuviisira mutenda wainga akaoma muviri, akarajikwa pa makha. Ecivona rutendo hwavo, Jesu wakati ku mundhu wainga wakaoma muviri: “Cungai mwana! Zvishaishi zvako zvaregerehwa.”
3 Vatari vamweni vakavhunjana ngocavo kuti: “Mundhu uwu ari kutuka.”
4 Jesu, eciziva murangariro javo, wakati: “Ngenyi muri kurangarira zviro zvakashata mu mwoyo mwenyu?
5 Inga muezaniso, zvakareruka kuti ari wese amuvhunje kuti: ‘Zvishaishi zvako zvaregerehwa.’ Asi kudari ari wese akati: ‘Mukai ufambe,’ kunanga kuti waizofamba here?
6 Asi, kuti muzive kuti Mwana wo mundhu ano simba ro kuregerera zvishaishi pa nyika . . .,” tevere, wakavhunja mundhu waioma muviri kuti: “Mukai, torai makha ako upinde kanyi.”
7 Iyena wakamuka, wopinda kanyi kwake.
8 Mbungano payakazvivona, yakathya yokuja Mwari, wiya wakapa simba rakadaro ku vandhu.
9 Tevere, Jesu naavhepo, wakavona mwanarume waidanijwa Mateu, akagara pa ndau yo kushabisa, womuvhunja kuti: “Ivai muteveri wangu.” Iyena wakamuka womutevera.
10 Pa mukuvo wakazotevera, Jesu paaiha mu nyumba, vashabisi vazinji no vashaishi vakaviya kuzoha naye pamwepo no vajiji vake.
11 Vafarisi pavakazvivona, vakati ku vajiji vake: “Ngenyi mujijisi wenyu anoha no vashabisi no vashaishi?”
12 Jesu paakazvizwa, wakavavhunja kuti: “Vandhu vakavanga avadi murapi, asi vanohwaja vanoda murapi.
13 Ngo kudaro, endanyi moojija kuti anorevenyi magama aya: ‘Ndinoda usizi, kuciripi mupiro.’ Ngokuti andizivi kuviya kuzodanija vandhu vakarurama, asi ndakaviira vashaishi.”
14 Vajiji va Johani vakaviya kwaari, vomuvhunjisa kuti: “Ngenyi itusu no Vafarisi tinozira, asi vajiji vako vacikaziri?”
15 Jesu wakavadavira kuti: “Shamwari jo mukwambo jino thangwe ro kucamwa mukwambo aciripo here? Asi jinozoguma njiku jaanozotohwa mukwambo, shamwari jake jinozozira.
16 Apana mundhu anosonera cigamba cipsa pa nguvo yokare, ngokuti cigamba cipsa cinokweva nguvo yokare, zibovo rayo rokura maningi.
17 Apana mundhu anodira vhinyu imbza mu cinyede cokare. Kudari akazviita, cinyede cinomweka, vhinyu yosvejeka, cinyede ciya coita mapendera. Asi vandhu vanodira vhinyu imbza mu cinyede cipsa, zvese zvinokorondheka ushoni.”
18 Paaivavhunja zviro izvi, mutongi umweni wakamukhwederera, wogwadama pamberi pake, eciti: “Mwana wangu wokaji woda kufa, ngatende tese moomucanjikira nyara, iyena anozopona.”
19 Jesu wakamuka pamwepo no vajiji vake vomutevera.
20 Mwanakaji umweni wakapeja gumi ro makore no makore maviri ecitambujika ngo kubuda ngazi, wakamukhwederera ngo sure wopsasa ciuruji co nguvo yake,
21 ngokuti wainanga kudari ngo mu mwoyo make: “Ndikandopsasa basi nguvo yake, ndinovanga.”
22 Jesu paakasota sure, wakamuvona, woti: “Cungai mwana wangu! Rutendo hwako hwakuponesa.” Kuvhira pondhopo, mwanakajiwo wakavanga.
23 Jesu paakaguma pamuzi po mutongi wiya, wakavona vandhu vecirija ndumbo jo ciriro,* mbungano yecicema,
24 Jesu wakati: “Budanyi pano, ngokuti musikane uwu aazivi kufa asi wakavata.” Asi ivona vakatanga kumuseka.
25 Mbungano payakandobudiswa kunja, iyena wakanghwina mumba womusa musikane ngo kumubata nyara. Musikane wakamuka.
26 Masoko awo akazara mu ndharaundha yese.
27 Jesu naavhepo, vanarume vaviri vainga mapofu vakamutevera, vecikhuwa* veciti: “Mwana wa Dhavhidhi, tiitirevo usizi.”
28 Jesu paakanghwina mumba, vanarume vaingaya mapofu vakamukhwederera, iyena wovavhunjisa kuti: “Munotenda kuti ndinokwanisa kuita izvi here?” Ivona vakamudavira kuti: “Hina, Mambo.”
29 Pondhopo iyena wakapsasa majiso avo eciti: “Ngazviitike kwamuri mukuzwirana no kutenda kwenyu.”
30 Majiso avo akavona. Perapo, Jesu wakavavhunja kuti: “Bhasopanyi kuti zvitame kuzika ngo mundhu ari wese.”
31 Pavakandobuda kunja, ivona vakandhandhanisa masoko ngo pamusoro pa Jesu mu ndharaundheyo yese.
32 Pavainga vecipinda, pakaguma vandhu vamweni vaimuviisira mbeveve yainga no dhimoni;
33 dhimoni riya parakagogomehwa, mbeveve yakatanga kuvereketa. Mbungano yakakahamara yeciti: “Amuto mavoneka zvakadari mu Iziraeri.”
34 Asi Vafarisi vainanga kuti: “Iyena anogogomera madhimoni ngo simba ro mutongi wo madhimoni.”
35 Jesu wakatanga kufamba mu madhorobha no mundharaundha, ecijijisa mu masinagoga avo ecicumaera masoko akanaka o Umambo no kurapa mushovo wese wo ndhendha.
36 Ecivona mbungano, wakavazwira pena, ngokuti vainga vacikanasi kutajwa, veciherereka inga mavhuta acina muhavisi.
37 Iyena wakavhunja vajiji vake kuti: “Zvokadi, munda unoda kukotohwa, wakakura. Asi vashandi vashoma.
38 Ngo kudaro, kumbiranyi Mune wo munda kuti atumire vashandi kuzokotora mu munda wake.”
