Mazwi Akangwara 17:1-28
17 Zviri nane maningi kuva no dimbu ro pau rakaoma, pano runyararo,Kupinda kuva no nyumba yakazara ngo zvokuha, kuveni muri kunesana.
2 Mushandi ano hwiru, anozotonga mwana anoita zvinopseruja,Iyena anozoashira divi ro utaka, inga mwana wo pamuzipo.
3 Sirivha, inonasiririhwa mu cikari co kunasirira,No goridhi, rinonasiririhwa mu coto co kunyungurusa,
Asi Jehovha ndiyena anopopora mwoyo.
4 Vakashata, vanopurutana* masoko anokhuvaza,Vanonyepa, vanozwa rurumi hunovereketa zvakashata.
5 Mundhu anoshora murombo, ari kutuka wiya wakamuita,Anodakara ngo kutambujika ko vamweni, anozopangihwa.
6 Vazukuru, vakaita inga korowa yo vasharuka,Vana vanowana zina raushoni ngo ndava yo majibaba avo.
7 Masoko okadi, aadakajisi mapenji.
Vatongi, avadakajihwivo ngo masoko okunyepa.
8 Cipo cakaita inga buwe rinosisira ku mune waco,Cinomuitisa kuti abudirire kuri kwese kwaanoenda.
9 Mundhu anoregerera cishaishi, arikupsaka kusakurira rudo,Asi wiya anogara ecivereketa ngo zviro zvakashaishwaro,
Ari kupsaka kuparajanisa shamwari jakanaka.
10 Mbhangiro inobesa maningi kuna wiya anozwisisaKupinda kutaka benji ngo zana ro mushakwe.
11 Vandhu vakashata vanopsaka kupanduka basi,Mutumwi wakashata, anozoendesweyo kuti aende kovasvuzvunura.
12 Zviri nane kusongana no ursu yarasa* zvivana zvayo,Kupinda kusongana no benji no upenji hwaro.
13 Kudari mundhu akahwirijira zvakanaka ngo zvakashata,Zvakashata azvizovhi pamuzi pake.
14 Kutanga mapope kwakaita inga kufunungura kumwa,Budai ngo kukasika mucito mavereketesana.
15 Wiya anonanga kuti wakashata aana ndava, na wiya anonanga kuti wakanaka ano ndava,Vese vo vaviri vanonyenywa ndi Jehovha.
16 Zvinobeserenyi benji kukwanisa kuwana uzivi,Kuveni irona nee aritoudi?
17 Shamwari yo cokwadi, ino rudo mukuvo wese,Iyona inova hama yakabahwa kuti ibesere pa njiku jo matambujiko.
18 Mundhu acina hwiru,* anobatana nyara no mundhu umweniEcitendera kuti umweni afiyari ngo zina rake pamberi po mudoni wake.
19 Mundhu anoda mapope, anoda cishaishi,
Mundhu anorebesa musuvo wake, ari kupsaka kuwa.
20 Mundhu ano mwoyo wakashata, aazobudiriri,Mundhu anovereketa zvokunyepa, anozourawa.
21 Baba vo benji, vanozogara vakanyangajwa,Baba vo mwana acina hwiru, avazovi no mudakaro.
22 Mwoyo wakadakara, mutombo waushoni,Asi kucamwa kunopeja simba ro mundhu.
23 Mundhu wakashata, anotendera kufidhihwa pakafindara*Kuti ashaishe kutonga ndava.
24 Uzivi huri pamberi po vandhu vanozwisisa,Asi majiso o mapenji, anondombeya-mbeya mbhera pakaperera nyika.
25 Mwana anopenga, anonyangajisa baba wakeWocamwisa vakamubara.
26 Azvizivi kunaka kusvuzvunura* vandhu vakanaka.Kutaka vandhu vanokujwa, azvizwirani no zvakanaka.
27 Mundhu anoziva, anongwarira masoko ake,Mundhu wakangwara, anogara akathiva.
28 Nee mapenji anotovoniwa inga akangwara ngo pamusoro po kunyararisa,Kufunga muromo, kunovonesa inga mundhu anozwisisa.
Masoko o Pasi
^ Kana: “vanopurukira.”
^ Kana: “yasveja.”
^ Gama ngo Gama: “acina mwoyo.”
^ Kana: “pakavanda.”
^ Kana: “kuripisa.”
