Mazwi Akangwara 18:1-24
18 Mundhu anoda kugara ega, ari kupsaka zviro zvake basi.Iyena anoramba uzivi unobesera.
2 Benji, aridakariri ungwaru,Irona rinoda haro kubudisa zvarinazvo mu mwoyo.
3 Vakashata vanoviisa kureruswa,Kushohwa, kunoguma pamwepo no kupserujwa.
4 Masoko ari mukanwa mo mundhu, akaita inga kumwa yakajika.
Panovha uzivi, pakaita inga murambo wakazara ngo kumwa iri kupopoma.
5 Azvizivi kunaka kuinikira mundhu wakashata.Nee kupekeja ndava mundhu acina ndava.
6 Masoko o benji, anobara mapope.Muromo waro, unoritakisa.
7 Mukanwa mo benji, munoriuraisa.Muromo waro, unoendesa ku murau* upenyu hwaro.
8 Masoko o vandhu vanoreva,Akaita inga zvokuha zvinonaka.
Izvona zvinomijwa, zvopinda ngo kukasika mundani.
9 Mundhu anoumbhwa* pa basa rake,Ihama yo mundhu anouraisa vamweni.
10 Zina ra Jehovha, i biravira rakavanga.
Mundhu wakanaka, anotizira mukati mwaro, woponeswa.
11 Upfumi hwo vakhupuki, idhorobha ravo rakavangiswa.Ivona vanorangarira kuti ihwona, hwakaita inga biravira rinojivirira.
12 Mwoyo wo mundhu, unojikuja acito akawa,Iyena anojidodokesa acito akakujwa.
13 Mundhu anodavira shwiro acito anasa kuzwa masoko ese,Anoita benji, wopejisira ngo kupseruka.
14 Mundhu wakacunga,Anozokwanisa kucungirira paanohwaja.
Asi ndiyani angakwanisa kucungirira kuvora* mwoyo?
15 Mwoyo wo mundhu anozwisisa, unowana uzivi.Njeve jo mundhu anoziva, jinopsaka uzivi.
16 Cipo, cinofunungura musuvo ku mundhu wiyani anopa,Coitisazve kuti iyena, akhwedere phendo no vandhu vanosisira maningi.
17 Mundhu anotanga kuvereketa pa ndava, anoita inga anorazau,Mbhera umweni aviye kuzomuvhunjisisa.*
18 Kupsaka ndhungamiriro ja Mwari, kunopeja ndava.Kovonesazve acina ndava pakati po vandhu vaviri vakavanga vari kunesana.
19 Hama yakashaishihwa, inonesa maningi kuvereketa nayo kupinda kunyisa dhorobha rakavangiswa.Kuno mapope amweni akatojana no mugogo jo mapiravira.
20 Mucero wo muromo wo mundhu, ndizvona zvinozaja ndani yake.Anozoguta ngo zvinovha pa muromo pake.
21 Rufu no upenyu, zviri munyara jo* rurumi.Vanoda kuhushandisa, vanozoha mucero yawo.
22 Mundhu anowana mukaji wakanaka, wawana zviro zvaushoni.Jehovha anozomuitira unyasha.
23 Murombo anovereketa ecideketera.Asi mukhupuki anovereketa ngo hasha.
24 Kuno shamwari jinogara jecida kuitirana zvakashata,Asi kuno shamwari jimweni jinobatisisa ushamwari kupinda hama.
Masoko o Pasi
^ Kana: “muravo.”
^ Kana: “anoita nungo.”
^ Kana: “kusvipa.”
^ Kana: “wonasa kumupopora.”
^ Kana: “musimba ro.”
