Mazwi Akangwara 7:1-27
7 Mwana wangu, zwirai zvandinokuvhunja,Vigai mutemo jangu mu mwoyo mako.
2 Zwirai mutemo jangu kuti urarame,*Ngwarirai zvandinokujijisa* inga jiso* rako kamare.
3 Zvisungirei mu zvikunwe zvako,Zvitarei mu mwoyo mako.
4 Vhunja uzivi kudari: “Iwewe uri hambzaji yangu.”*
Danijai kuzwisisa kuti: “Iwewe uri ukama hwangu.”
5 Kuti zvikujivirire ku mwanakaji acikajibati,*Mwanakaji anohura,*
Ano masoko akapfava.*
6 Ngo pa jhanera yo nyumba yangu,Ndakasota pasi ngo mabovo o jhanereyo
7 Pandaivona marethe* pakati po majaha,Ndakavona jaha rimwe rainga ricina hwiru.*
8 Irona rakapinda ngo phedo no pacikina cake,Rofamba recienda kumuzi kwake,
9 Comadeko zuva parainga recivira,Usiku pawainga wecikhwedera pomwe no cidima.
10 Ngo kudaro, ndakazovona mwanakaji eciritandamija,Akasimira inga* hure, mwanakaji anocengeja kamare.
11 Iyena anovereketa ngo izwi guru acikathyi ciro,
Nee aagari* pamuzi.
12 Nguva jimweni ari mumakwanja,Nguva jimweni ari pa ndau jakazara vandhu,
Anogara akafindarira* vandhu, phedo no pacikina ciri cese.
13 Anoribata woribhejhari,Worisota acikapseruki, worivhunja kudari:
14 “Ndaidikana kupira mupiro jo runyararo.
Nyamasi ndakwanisa zvondakapika.
15 Ndizvona zvandiitisari kuti ndiviye kosongana na iwewe,Kuti ndikuvone. Wari ndakuwana!
16 Ndapera kunasirira kama yangu* ngo nguvo jakaseja,Nguvo jino kori jakaseja* jo ku Ejipita.
17 Ndakapfapfaijira kama yangu* ngo mira, arowe no kanera.
18 Ngativate tese mbhera kuejehwa,*Ngativatane.
19 Ngokuti mwamuna wangu avako kumuziyo,Ivona vakaita hwendo kwenda ndhambo.
20 Ivona vakatora cikhwama co mare,Vanozoviya mweji ucito wakura.”
21 Iyena anorikhohwesa ngo magama anocengeja maningi.
Iyena anorikwevera ngo magama anotapira.
22 Ngo kukasika, irona rinomutevera inga n’gombe* iri kwenda kourawa,Inga benji riri kwenda kosungihwa pa danda,
23 Mbhera mupasha womubaya pa ciropa,Inga shiri inomburuka yecienda ku murau,*
Irona arizvizivi kuti izvi zvinoriuraisa.
24 Waro ndizwenyi vana vangu,Nasanyi kuteya njeve ku zvandinonanga.
25 Ucatendera kuti mwoyo wako usikire ku makwanja ake.
Ucafamba ngo mumakwanja ake.
26 Iyena wakauraya vandhu vakawanda,Vaakauraya, vakawanda maningi.
27 Nyumba yake inokuendesa ku Guva,*Inokuendesa ku ndau inowanika vandhu vakafa.
Masoko o Pasi
^ Kana: “upone.”
^ Kana: “mutemo”
^ Gama ngo Gama: “mboni,” iri idivi rakasvipa ro jiso.
^ Kana: “hama yangu yokaji.”
^ Gama ngo Gama: “waucikazivi.” Izvi zvinoreva mundhu ano mufambiro wakashata, acina ushamwari na Mwari.
^ Gama ngo Gama: “mwanakaji wo munyikanja.” Izvi zvinoreva mwanaji acina ushwari na Mwari
^ Kana: “anoemuja; anokwevejera; anosirija.”
^ Kana: “vacikazivi zvizinji.”
^ Gama ngo Gama: “mwoyo.”
^ Kana: “nguvo jo.”
^ Gama ngo Gama: “makumbo ake aagari.”
^ Kana: “akavandira.”
^ Kana: “mubhedhu wangu.”
^ Kana: “jakanyara.”
^ Kana: “mubhedhu wangu.”
^ Gama ngo Gama: “ngatiejehwe tecidhakwisana ngo rudo hwedu mbhera mangwana.”
^ Kana: “mwombe.”
^ Kana: “ku muravo.”
^ Kana: “Sheori.” Kana kuti, kufa kunoita vandhu vese. Vonanyi Kudurujihwa ko Magama.
