Mazwi Akangwara 9:1-18
9 Uzivi hwokadi hwakavaka nyumba yahwo;Hwakaveza njiki nomwe jahwo.
2 Ihwona hwakaviisa nyama jakawanda;Hwonasirira vhinyu;Perapo hwozvidira pa meza.
3 Ihwona hwakatuma vashandiri vahwo vokaji,Kuti vaende pa ndau yakakhwirira yo dhorobha* kuti vanange kudari:
4 “Vese vacina uzivi, viyanyi kuno.”
Ihwona hwakavhunjazve vandhu vacina hwiru* kudari:
5 “Viyanyi muhe zvokuha zvangu,No kumwa vhinyu yandanasirira.
6 Siyanyi zvo upenji* zvenyuzvo kuti murarame;*Endereranyi mberi mecitungamirihwa ngo ungwaru.”
7 Mundhu anopangira mushori, ari kupsaka kushohwa,Mundhu anopangira mundhu wakashata, anojikhuvaza ega.
8 Ucapangira mushori ngokuti iyena anozokuzonda.
Asi pangirai mundhu ano uzivi ngokuti iyena anozokuda.
9 Jijisai muzivi kuti iyena azive maningi.
Jijisai mundhu wakanaka kuti iyena aengejere uzivi hwake.
10 Kuziva Jehovha, zvinoreva kutanga kuwana uzivi,Kuziva Mwari Wakacena, zvinoreva kuzwisisa.
11 Ngo pamusoro pangu, njiku jako jinozowanda maningi,Makore ako o upenyu, anozoengejehwa.
12 Kudari ukava no uzivi, izvi zvinozova zvakanaka maningi kwauri,Asi kudari ukava mushori, unozowana matambujiko basi.
13 Mwanakaji wakaungwa, anovereketa zvinopseruja.
Iyena anoramba zvese, kuveni apana zvaanoziva.
14 Iyena anogara pa musuvo wo muzi wake.Anogara pa kadera, pa ndau yakakhwirira yo dhorobha,*
15 Iyena anodanija vaya vari kupinda ngo citaka,*Vari kutofambavo havo ngo ngwanja, ecivavhunja kudari:
16 “Mundhu wese acina uzivi, ngaaviye kuno.”
Iyena anovhunjazve vandhu vacina hwiru* kudari:
17 “Kumwa yo kuba inotapira,Zvokuha zvinohihwa pakafindara* zvinonaka maningi.”
18 Asi ivona avazvizivi kuti muzi wake wakazara ngo vandhu vakafa,Vandhu vaanokoka vari mu Guva* rakajika.
Masoko o Pasi
^ Kana: “sidhadhi”
^ Gama ngo Gama: “vacina mwoyo.”
^ Kana: “kutama uzivi.”
^ Kana: “mupone.”
^ Kana: “sidhadhi.”
^ Kana: “ruwa.”
^ Gama ngo Gama: “vacina mwoyo.”
^ Kana: “pakavanda.”
^ Kana: “Sheori.” Kana kuti, kufa kunoita vandhu vese. Vonanyi Kudurujihwa ko Magama.
