Mikeya 1:1-16
1 Jehovha wakavhunja Mikeya* wo ku Moresheti mucivoniso ngo pamusoro po Samariya no Jerusarema mu njiku ja Jotami, Akazi na Ezekiya majimambo o Judha:
2 “Izwanyi vandhu vese!
Nasai kuteya njeve nyika no zvese zvirimo,Mambo Mukuru-kuru Jehovha ngaave capupu kwamuri.Jehovha ari mu themberi yake yakacena.
3 Vonanyi! Jehovha ari kubuda pa ndau yake;Iyena anozobzuka ozocika ndau jakakhwira jo pasi pano.
4 Matundhu anozonyunguruka pasi po soka jake,Mapani anozonyungurukaInga namo iri pambeji po muriro,Inga kumwa yadururihwa pamuterero.
5 Zvese izvi zvinozoitika ngo ndava yo kupanduka ka Jakobe,Ngo ndava yo zvishaishi zvo nyumba yo Iziraeri,
Ngokwapi kupanduka ka Jakobe?
Asipi Samariya?
Ndiyani wakaita kuti Judha ive no ndau jakakhwirira?
Asipi Jerusarema?
6 Ndinozoita kuti Samariya isare yakaita mathere mu munda,Ive ndau yokusima muuvha;Ndinozokhandira mapuwe aro mubani,Ndinozosiya pambhene njiki jaro.
7 Zvithombe zvavo zvese zvakavezwa zvinozoguhwa-guhwa,No zvipo zvese zvaakaashira ngo kupagahwi, zvinozopiswa pa muriro.
Ndinozophwanya-phwanya zvithombe zvavo zvese.
Zviro zvese izvi Samariya yakazviashira ngo mare yo uhure hwayoIzvona zvinozotohwa zvozoenda koopagahwi hure jimweni.”
8 Ngo ndava yazvo ndinozocumba no kucema;*Ndinozofamba ndicina sandariya* ndiri mitu.
Kucumba kwangu kunozoita inga ko imbhwa yo musora,Kucumba kwangu kunozoita inga ko ice.*
9 Ngokuti civonje cavo acirapiki;Cakaguma mbhera ku Judha.
Dambujiko rakaguma ku musuvo jo vandhu vangu ku Jerusarema.
10 “Mucadozivisa izvi mu Gati;Amudikani kucema.*
Burukutanyi mu bukuta mu Bheti-Afira.*
11 Endanyi muri mitu mecinyowejeka, vandhu vo Shafiri.
Vandhu vo Zaanani avazivi kubuda.
Mu Bheti-ezeri munozova no kucumba, iyena aazoendereri mberi ecivabesa.
12 Vandhu vo Marote vaivetera zviro zvakanaka,Asi zvakashata ndizvona zvakaviya ku musuvo wo Jerusarema zvecivha kuna Jehovha.
13 Sungiranyi haci pa ngoro, imwimwi vagari vo Rakishi.
Imwimwi ndimwi makaita kuti mwana wokaji wo Ziyoni atange kushaisha,Ngokuti kupanduka ko Iziraeri kwakavoneka kwauri.
14 Ngo kudaro, iwewe unozopa zvipo zvokueneka Moresheti-gati.
Vandhu vo Akizibhi vakacengeja majimambo o Iziraeri.
15 Ndinozoviisa anozomunyisa* imwimwi vagari vo Mareshaa.
Kukujwa ko Iziraeri kunozoguma mbhera ku Adhurami.
16 Gundanyi vhuji, paranyi musoro jenyu ngo ndava yo vana venyu vamunoda.
Ivanyi no mbhanja inga yo hokotora,Ngokuti matorehwa vana venyu voendeswa ku uranda.”
Masoko o Pasi
^ Kugurisihwa ko zina rokuti Mikaeri (zvinoreva “Ndiani Wakatonaja na Mwari?”) kana Mikeya (zvinoreva “Ndiyani Wakaezana Na Jehovha”).
^ Kana: “kurira.”
^ Kana: “magwada.”
^ Kana: “gundhya.” Uwu imushovo wo shiri yakakura icikakoni kumburuka.
^ Kana: “kurira.”
^ Kana: “pa nyumba ya Afira.”
^ Kana: “anozomutorera zviro.”
