Mucumaeri 4:1-16
4 Inini ndakarangarirazve ngo pamusoro po kubzinyirihwa kwese kunoitwa pa nyika.* Ndakavona musoji jo vandhu vanobzinyirihwa, asi painga pacina no mundhu ari wese kuti avanyaraje. Vaya vaivabzinyirira vainga no simba, asi painga pacina no mundhu ari wese kuti avanyaraje.
2 Ndakavona kuti vakafa ndivona vakadakara, kupinda vaya vainga vaciri penye.
3 Ndakavonazve kuti ari nane kupinda vese, ndi wiya acito abahwa, acito avona zviito zvinosuruvarisa zvinoitwa pa nyika.*
4 Ndakavona kuvangisira kukuru kwaiithwa ngo vandhu no kukwanisa kuita basa veciphikizana. Izvi azvinavo zvazvinobesera, ikugogomera mbhepo.
5 Benji rinofunga nyara yaro rotama kuita ciri cese mbhera rofa.
6 Zvakanaka maningi kuzorora padoko, kuciripi kushanda maningi ngo simba wecigogomera mbhepo.
7 Ndakarangarirazve ngo pamusoro po zviro zvimweni zvabiresi zvinoitika pa nyika:*
8 Kuno mwanarume anogara ega, acina mudoni nee mwana nee hama, asi iyena aazorori pa basa rake raanoshanda ngo simba. Iyena aakwanihwi ngo upfumi. Iyena kangaije aajivhunjisi kudari: “Ndiri kushandira ani ngo simba ndecitama kudakara ngo zviro zvakanaka?” Izvi azvinavo zvazvinobesera, ibasa rinonesa.
9 Vari nane vandhu vaviri pamwepo kuciripi umwe. Ngokuti ivona vanobesereka maningi ngo kushanda kwavo ngo simba.
10 Kudari umwe wavo akawa, umweni anozomubesera kuti amuke. Waro zvicinyi zvinozoitika kudari umwe akawa acina mudoni kuti amubesere kuti amuke?
11 Kunja kwa izvi, kudari vandhu vaviri vakavata pamwepo, ivona vanojiihwa. Waro zvingaitikisa kudini kuti mundhu umwe ega ajiihwe?
12 Muvengi angakwanisa kunyisa mundhu ari ega, asi vandhu vaviri pamwepo vanokwanisa kucijikira muvengi. Bote rakakoswa katatu arikwanisi kudajuka ngo kukasika.
13 Mujaha ari murombo, asi ano uzivi, ari nane kupinda mambo waamusharuka asi ari benji, acina murangariro waushoni kuti azwe mbhangiro.
14 Ngokuti iyena* wakavha mu kadheya kuti ave mambo, pikija wakabahwa ari murombo pa mukuwo waitonga mundhu umweni.
15 Ndakarangarijisisa ngo pamusoro po vese vanopona pa nyika* no zviro zvinoitika no mujaha anotonga pa ndau yo umweni.
16 Pikija iyena ecibesehwa ngo vandhu vakawanda, pakufamba ko nguva, vandhu avazodakari ndiyena. Izvo azvinavo zvazvinobesera, ikugogomera mbhepo.
Masoko o Pasi
^ Gama ngo Gama: “pasi po zuva.”
^ Gama ngo Gama: “pasi po zuva.”
^ Gama ngo Gama: “pasi po zuva.”
^ Zvinovoneka kuti iyena uwu ari kunangira mujaha ano uzivi.
^ Gama ngo Gama: “pasi po zuva.”
