Mucumaeri 9:1-18
9 Ngo kudaro, ndakarangarijisisa ngo pamusoro po zviro zvese izvi, ndoguma pambhejiso yokuti varurami no vazivi pamwepo no mabasa avo ese, vari mu nyara ja Mwari wo cokwadi. Vandhu avanasi kuziva kuzondana no kudisana kukuru kwaingepo ku umwe no umweni.
2 Vese vano magumo ondhoo, mundhu wakarurama no mundhu acizivi kururama, mundhu wakanaka, mundhu wakacena no mundhu acizivi kucena, vandhu vanoita mupiro no vandhu vacingaiti mupiro. Mundhu wakanaka wakaezana no mushaishi, mundhu anoita mbhiko wakaezana no mundhu wiya anorangarira acito akaita mbhiko.
3 Ciro cinohwaja cinoitika panyika* nga ici: Zvecivoneka kuti vese vano magumo ondhoo, mwoyo jo vandhu jakazara ngo zviro zvakashata; mu mwoyo javo muno upenji pavanonga vecipona, tevere ivona vanofa!
4 Mundhu ari penye ano vetero, ngokuti iri nane imbhwa iri penye kupinda mbhondoro yakafa.
5 Ngokuti vandhu vari penye vanoziva kuti vanozofa, asi vandhu vakafa apana na cimwe haco cavanoziva, ivona avacinazve no mupocero uri wese, ngokuti zviro zvese zvaizivikanwa ngo pamusoro pavo, zvakanganiwa.
6 Kusiyapo izvi, rudo hwavo, kuzonda kwavo no ushanje hwavo, zvese izvi zvapera, ivona avacina no ciro ciri cese cavanoitazve pazvese zvinoitwa panyika.*
7 Endai, ihai zvokuha zvako wakadakara, womwa vhinyu yako uno mwoyo wakadakara, ngokuti Mwari wo cokwadi wadakarira mabasa ako.
8 Nguvo jako ngajive jokucena* mukuvo wese, zorai mafuta mu musoro mako mukuvo wese.
9 Busai upenyu no mukaji wako wo pamwoyo mu njiku jese jo upenyu hwako jicina zvajinobesera jawakapuwa ndi Mwari panyika, hina njiku jese jo upenyu hwako jicina zvajinobesera, ngokuti uwu ndiwona mupocero wako wo upenyu wako no basa raunoshanda ngo simba, iro raunovangisira kuti uriite panyika.*
10 Zvese zvaunokwanisa kuita ngo nyara jako, zviitei ngo simba rako rese ngokuti mu Guva* maunoenda, amuna basa, amurongwi mazano, amuna zivo nee uzivi.
11 Ndakavona ciro cimweni panyika,* vandhu vanogogoma maningi asipi mukuvo wese wovanowina pa muphikizano, vandhu vano simba asipi mukuvo wese wovanowina pa hondo, vandhu vano uzivi asipi mukuvo wese wo vano zvokuha, vandhu vakangwara asipi mukuvo wese wo vano upfumi, vandhu vano zivo asipi mukuvo wese wovanobudirira, ngokuti vandhu vese vanosongana no zviro zvavacikaveteri pa nguva yavacingarangariri.
12 Mundhu aazivi njiku yo kufa kwake. Inga hove jinobatwa ngo cimaricera no shiri jinobatwa ngo murau, vandhu vanobatwa ngo ngozi painovagumira* ngo civhumbu.
13 Ndakavonavo uzivi uhu panyika,* zvondishamaisa:
14 Kwainga no dhorobha doko raigara vandhu vashoma, mambo umweni ano simba wakaviya kuzorihwisa woritendeneja, iyena wakavaka mupfimbiji mukuru kuti arihwise.
15 Mondhomo mainga muno mwanarume umweni wainga murombo asi ano uzivi, iyena wakaponesa dhorobha iri ngo uzivi hwake. Asi apana no mundhu umwe hake wakaceukijavo mwanarume uwu.
16 Inini ndakati pacangu: ‘Uzivi uri nane kupinda simba; asi pikija zvakadaro, uzivi wo murombo aureremejwi, masoko aanonanga apana anomazwira.’
17 Zviri nane kuzwa masoko akathiva o mundhu ano uzivi, kupinda kuzwa masoko okukhuwa o mundhu anotonga mapenji.
18 Uzivi uri nane kupinda nvuti jo hondo, asi mushaishi umwe basi angakwanisa kupeja zviro zvizinji zvakanaka.
Masoko o Pasi
^ Gama ngo Gama: “pasi po zuva.”
^ Gama ngo Gama: “pasi po zuva.”
^ Zvinoreva nguvo jinomonikira jinokhombija kudakara, haiwa nguvo jinokhombija ciriro.
^ Gama ngo Gama: “pasi po zuva.”
^ Kana: “Sheori.” Kana kuti, kufa kunoita vandhu vese. Vonanyi Kudurujihwa ko Magama.
^ Gama ngo Gama: “pasi po zuva.”
^ Kana: “dambujiko parinovagumira.”
^ Gama ngo Gama: “pasi po zuva.”
