Naumi 3:1-19
3 Yowee dhorobha rino vandhu vanourayana!
Rakazara ngo zvokunyepa no umbavha.
Rinogara recipamba!*
2 Mushakwe jiri kuzika, marodha ari kuvhuma,Haci jiri kugogoma, ngoro* jo hondo jiri kuphuka.
3 Kuno vandhu vakapakira haci, kuno mapanga anomonikira, kuno mukhondo inoshamaisa,Kuno vandhu vakawanda vakafa, kuno mututu yo mutembo.*Vandhu vakafa avaperi.
Vanoenderera mbheri vecikhugunyika ngo ndava yo vandhu vakafa.
4 Izvi zvinoitika ngo ndava yo zviito zvo uhure, zvinoithwa ngo hure,Iyena wakaseja,* anocengeja mambokaji wo varoi,Iyena anobata majinja ngo uhure hwake, wobata mbhuri ngo uroi hwake.
5 Jehovha wo hondo anonanga kudari: “Vonai, ndiri kukuhwisa.”*“Ndinozokunya saya yako mbhera mu meso mako;Ndinozoita kuti majinja avone umitu hwako,No majimambo avone kupseruka kwako.
6 Ndinozokukhandirira svinaNdinozokuita mundhu acikashandi;Ndinozoita kuti vandhu vakuseke.
7 Mundhu wese anozokuvona, anozokutiza ecinanga kudari:‘Ninivhe yakaphwanywa!
Ndiyani anozoiitira pena?’
Ndinowanira kwapi vandhu vanozokunyaraja?
8 Kureva kuti iwewe unosisira maningi kupinda No-amoni,* waigara phedo no mugeri* jo Niro?
No-amoni waitendenejwa ngo kumwa,Upfumi hwake hwaiwanika mu jombe, mupfimbiji wake rainga jombe.
9 Etiyopiya no Ejipita, rainga simba rake ricina magumo.
Vaputi no Varibhiya, vainga vabeseri vake.
10 Asi pikija no zvakadaro, iyena wakasungwa;Wakaendeswa kuuranda.
Vana vake vakaguhwa-guhwa mu zvikina zvese zvo makwanja.
Vakakhandira sorti ku vanarume vake vano nduma,Vanarume vake vese vanosisira, vakasungwa ngo magaragajero.
11 Iwewe Ninivhe unozodhakwavo;Unozovanda.
Unozotizira ku muvengi.
12 Ndau jese jako jakawanda, jakaezana no mufigu ino mucero jiri kutanga kuivha;Ukazungunyiswa, mucero inowira mukanwa mo vanoda kujiha.
13 Vonai! Masoca ako akagara inga vanakaji pakati pako.
Musuvo jo nyika yako, jinozogara jakashama kamare, kuti vavengi vako vanghwine.
Muriro unozopisa mugogo jo musuvo yako.
14 Cerai kumwa ucito watendenejwa!
Vangisai ndau jako jese.
Nghwinai mu matope ukanye mavhu;Itai zvidhina.
15 Pikija zvakadaro, iwewe unozopiswa.
Iwewe unozotemwa ngo banga.
Iwewe unozohiwa inga sora rinohiwa ngo ndongwe.
Ivanyi makawanda inga ndongwe!
Zvokadi, ivanyi makawanda inga ndongwe!
16 Ninivhe, vandhu vako vo nyagoso vawanda kupinda ndhondho jo kumatenga.
Ndongwe jinoguvura* mapapiro ajo jomburuka.
17 Varindiri vako vakaita inga ndongwe,Nduna jako jakaita inga mutungwa wo ndongwe.
Mu mukuvo wokutondhora, ijona jinotizira ku cibaya co mapuwe, asi zuva parinobwaka, ijona jinomburuka;Akuna anojiziva kwajinoenda.
18 Iwewe mambo wo Asiriya, vahavisi vako varikuozira;Vazivi vako, vari mu mamuzi mavo.
Vandhu vako vandhandhanika mu matundhu,Akuna ari kuvaunganija.
19 Dambujiko rako ariperi.
Civonje cako acirapiki.
Vese vanozozwa masoko ngo pamusoro pako, vanozotaka nyara;Ngokuti apana acikazivi kutambujika ngo kushata kwako.”
Masoko o Pasi
^ Kana: “recitora ndau jo vamweni.”
^ Kana: “kareta.”
^ Kana: “mutembe, muviri jo vandhu vakafa.”
^ Kana: “wakanyara.”
^ Kana kuti, Ninivhe.
^ Kana kuti, Thebhe.
^ museri.
^ Kana: “kuzuura.”
