Ndumbo ya Soromona 3:1-11
3 “Pa kama yangu mu usiku hwese,Ndaipsaka wiya wandinoda maningi,
Ndaimupsaka, asi andicaimuwanepi.
2 Inini ndinomuka ndoenda mudhorobha,*Mu makwanja no mundau jakazara vandhu,Ndopsaka wiya wandinoda maningi,
Inini ndamupsaka, asi andizivi kumuwana.
3 Inini ndakasongana no vangwariri vaingwarira dhorobha, ndovavhunjisa kudari:
‘Imwimwi mwavona mudiwa wangu?’
4 Pondakandovapindirija,Ndakasongana no mudiwa wangu.
Inini ndakamubata, andizivi kumusiya,Mbhera ndomunghwinisa mumba ma mai wangu,Mumba ma wiya wakandimita.
5 Imwimwi vasikane vo Jerusarema,Pikanyi ngo kuseja* ko mbhwembhwe no shoma:
Kuti amuzocunguji,* no kumusa rudo kwandiri mbhera ihwona hude.”
6 “Zvicinyi izvo zviri kuvonekaro zvecikhwira mubani,Zvakaitaro inga usi,Zvakazuzihwa mira no oribhano,
No mukhaindi wese wo upfu unonuhira womutengesi?”
7 “Vonanyi! Ikadera* ya Soromona,
Iyona yakatendenejwa ngo 60 o vanarume vakavanga,Pakati po masoca akavanga o Vaiziraeri.
8 Vese vakabata mapanga,Vese vakajijiswa kuti vaite hondo,Umwe na umwe wavo, ano banga mucihunu* cake,Kuti ajijivirire ku ngozi jo usiku.”
9 “Ikadera* ya mambo Soromona,Yaakaita ecishandisa muti jo Rebhanoni.
10 Iyena wakaita makumbo ayo ngo sirivha,Wakaitazve zvinoicijikira ecishandisa goridhi.
Painogarihwaro, pakaithwa ngo ruji hwokupsukirikiraMukati mwayo mwakasejeswa* ngo rudo hwese ngo vasikane vo Jerusarema.”
11 “Vasikane vo Ziyoni, viyanyi,Vonanyi mambo Soromona,Akasimira korowa yaakaitihwa ndi mai wake,Pa njiku yo mucadho wake,Pa njiku yaidakara mwoyo wake.”
Masoko o Pasi
^ Kana: “musidhadhi.”
^ Kana: “kunyara.”
^ Kana: “amuzocakanusi.”
^ Ikadera yakafukijwa, inoshandiswa kuti ithware mundhu anosisira maningi.
^ Vonanyi Kudurujihwa ko Magama.
^ Ikadera yakafukijwa, inoshandiswa kuti ithware mundhu anosisira maningi.
^ Kana: “mwakanyariswa.”
