Ndumbo yo Ciriro 1:1-22
א [Arefi]
1 Dhorobha raingaya rakazara ngo vandhu, rasara rega!
Jerusarema raingaya rakazara ngo vandhu pakati po majinja, raita inga noni.
Mwanakaji wiya waingaya vahosi pakati po provhinsiya, wakavangirijwa kuita basa rakavanga.
ב [Bheti]
2 Iyena anocema* maningi no usiku, musoji jake jinoderera mu matama.
Vese vaimuda, akuna na umwe wakaviya kuzomunyaraja.
Shamwari jake jese jakamupandukira, jova vavengi vake.
ג [Gimeri]
3 Judha wakaenda kuuranda ecitambujika, muuranda hwainesa maningi.
Iyena anodikana kugara pakati po majinja; wotama ndau yokuzororera.
Vatevereri vake vese vakamuwana paainga ecitambujika.
ד [Dhareti]
4 Makwanja o Ziyoni ari pa ciriro, ngokuti akuna mundhu anoviya kumabuso.
Musuvo jaro jese japera kuphwanyika, vapiri varo vari kugomera.
Vasikane varo vari* mu ciriro, irona riri kutambujika maningi.
ה [He]
5 Vavengi varo ndivona vari kutungamirira, ivona avaneseki ngo ciro.
Ngokuti Jehovha wakariviisira zvineso ngo ndava yo zvishaishi zvaro zvakawanda.
Vana varo vakatohwa ngo vavengi varo.
ו [Wau]
6 Kukujwa kwese ko dhorobha ro Ziyoni kwapera.
Vatungamiriri varo vakaita inga shoma icina mahavoRinofamba ricina simba pamberi po muvengi waro.
ז [Zayini]
7 Jerusarema mu njiku iji jaririkutambujikari maningi ricina pokugara,Ririkuceukija zviro zvese zvakanaka zvorainga nazvo mu njiku jokare.
Vandhu varo povakawira mu nyara jo vavengi rotama kubesehwa ngo ariwese,Vavengi varo vakarivona voseka* ngo kuwa kwaro.
ח [Heti]
8 Jerusarema rashaisha maningi.
Ndizvona zvinoriitisa kuti rive zviro zvinosembhusa.
Vandhu vese vairireremeja, vari kurirerusa, ngokuti vavona umitu hwaro.
Mwanakaji uwu anogomera, wopinda akapseruka.
ט [Teti]
9 Kusvipa kwake kuri musaya jake.
Iyena aazivi kurangarira zvokumbeji kwake.
Kuwa kwake kwashamaisa maningi, iyena aana mundhu wokumuembezera.
Iyena anoti: ‘Nandi Jehovha, vonanyi matambujiko angu, ngokuti muvengi wangu wajikuja.’
י [Yodhi]
10 Muvengi watora upfumi hwo mwanakaji uwu.
Mwanakaji uwu wavona majinja ecinghwina mundau yake yakaceneswa,Majinja omakarambisa kuti atame kunghwina muungano yenyu.
כ [Kafi]
11 Vandhu venyu vese vari kugomera vecipsaka zvokuha.
Vatora zviro zvavo zvinosisira maningi vozvicinjanisa no zvokuha, kuti vaenderere mberi vecipona.
Jehovha, vonanyi kuti ndaita mwanakaji* acikasisiri.
ל [Ramedhi]
12 Kunanga kuti izvi azvirevi ciro kwamuri munofambari ngo mucitaka?*
Sotanyi muvone!
Kureva kuti kuno kuhwajihwa kwakaezana no kuhwajihwa kwandinako ngo kusvuzvunuhwa,Inga kuhwajihwa kwandakaviisihwa ndi Jehovha mu njiku yo ushungu hwake unobwaka?
מ [Memi]
13 Iyena wakatumira muriro mukati mo maphondo angu, wecivha ngo kudenga, iwona unopisa phondo rimwe nga rimwe.
Wakadira juya mu makumbo angu, wondivangirija kuti ndihwirire sure.
Wakandiita mwanakaji wakasiiwa.
Ndiri kuhwaja njiku yese ya mutero.
נ [Nuni]
14 Zvishaishi zvangu zvakasungwa inga kanga, zvakasungihwa ngo nyara jake.
Zvodihwa mumusipa mangu, simba rangu rapera.
Jehovha wandidira mu nyara jo vandhu vandicikakwanisi kunyisa.
ס [Sameki]
15 Jehovha wakhandira kunja masoca ese ainga pakati pangu.
Wounganija vandhu vakawanda kuti vacangaje majaha angu.
Jehovha wacika mwana wa Judha wainga mbhandwe mu cisviniro co vhinyu.
ע [Aini]
16 Ndiri kucema* ngo pamusoro pa izvi, musoji jangu jiri kubuda mu majiso angu.
Ngokuti mundhu anoda kundiembezera no kundinyaraja, ari ndhambo na inini.
Vana vangu vasiiwa vega, ngokuti muvengi wawina.
פ [Pe]
17 Ziyoni rakatambanuja nyara, irona arina mundhu kuti riembezehwe.
Jehovha wakatumira kuna Jakobe vavengi vese vakamutendeneja.
Jerusarema rakava ciro cinosembhusa kwavari.
צ [Tsadhe]
18 Jehovha wakanaka,* ngokuti ndini ndapandukira mutemo jake.
Vandhu vese, izwanyi, vonanyi kuhwajihwa kwangu.
Vasikane vangu* no majaha angu vaendeswa kuuranda.
ק [kofe]
19 Ndakadaninja vaindida, asi ivona vakandipandukira.
Vapiri vangu no vakuru vangu, vakafira mudhorobha,*Pavaipsaka zvokuha kuti vapone.
ר [Reshi]
20 Nandi Jehovha, vonanyi dambujiko rakakura randinaro.
Maura angu arikuvhunduka.
Mwoyo wangu uri kuhwajihwa ngo mukati, ngokuti ndakapandukira maningi.
Ngo kunja, banga rinouraya.
Mukati mo nyumba, makadari inga rufu.
ש [Shini]
21 Vandhu vanozwa kukhuwa* kwangu, asi apana anoviya kuzondiembezera.
Vavengi vangu vese vakazwa masoko ngo pamusoro po matambujiko angu.
Ivona vakadakara, ngokuti ndimwi makamaviisa.
Asi imwimwi munozoviisa njiku yo makagaja, pavanozoitavo inga ndini.
ת [Tawi]
22 Zvishaishi zvavo zvese ngazvigume pamberi penyu, imwimwi muvasvuzvunure,Inga zvamakandisvuzvunura ngo ndava yo zvishaishi zvangu zvese.
Ngokuti kugomera kwangu kwakakura maningi, mwoyo wangu uri kuhwaja.
Masoko o Pasi
^ Kana: “anorira.”
^ Gama ngo Gama: “Mbhandwe jaro jiri.”
^ Kana: “vodakara.”
^ Jerusarema ndirona ririkufananijwari no mwanakaji.
^ Kana: “mu ruwa.”
^ Kana: “kurira.”
^ Kana: “wakarungama.”
^ Gama ngo Gama: “Mbhandwe jangu.”
^ Kana: “musidhadhi.”
^ Kana: “kumima.”
