Ndumbo yo Ciriro 2:1-22
א [Arefi]
2 Jehovha wakafukija dhorobha ro* Ziyoni ngo gore ro kucamwa kwake!
Ari kudenga, iyena wakakhandira kuseja* ko Iziraeri pasi pano.
Aazivi kuceukija ciciko co soka jake pa njiku yo kucamwa kwake.
ב [Bheti]
2 Acina pena, Jehovha wakaphwanya ndau jese jaigahwa ndi Jakobe.
Ngo ushungu hwake, iyena wakaparaja ndau jainga jakavanga jo ku Judha.
Wakahidhisa no kupseruja umambo hwayo no vatongi vayo.
ג [Gimeri]
3 Ngo ushungu hwake, iyena wakapeja utongi hwese hwo Iziraeri.
Vavengi pavakakhwedera, iyena wakavhisa nyara yake yo muho,Woenderera mberi ecipisa pakati pa Jakobe inga muriro uri kupisa ciricese ciri mumbhiripiri mawo.
ד [Dhareti]
4 Iyena wakakunga uta hwake inga muvengi, mukono wake wo muho wapera kunasirira kuti ahwise inga muvengi.
Iyena wakauraya vese vaidakajisa majiso edu.
Wakadurura ushungu hwake inga muriro pa tende yo Ziyoni.
ה [He]
5 Jehovha wakaita inga muvengi,Iyena wakavhavhura Iziraeri.
Wakavhavhura zvinyumba zvayo zvese zvo kurindira,*Wopeja ndau jese jakavangiswa.
Woengejera ciriro no kucumba ko Judha.
ו [Wau]
6 Iyena anophwanya tende yake, inga dumba riri mumunda.
Iyena wakapeja mabuso ake.
Jehovha anoita kuti mabuso no masabudu zvikanganike mu Ziyoni.
Ngo kucamwa kwake kukuru, iyena anorerusa mambo no mupiri.
ז [Zayini]
7 Jehovha wakanyenya artari,Worejareja ndau yake yakaceneswa.
Mupfimbiji jo zvinyumba zvokurindira* zvakavangiswa, wakajipekeja vavengi.
Ivona vakakhuwa* pa nyumba ya Jehovha, inga njiku yo mabuso.
ח [Heti]
8 Jehovha wakasunga kuphwanya mupfimbiji jo dhorobha ro Ziyoni.
Wogwimba bote rokupima.
Aazivi kurambisa nyara yake kuti itame kuphwanya.
Ndau jo kurindira no mupfimbiji, wakazvisiya no ciriro.
Zvese zvozviviri zvakapera simba.
ט [Teti]
9 Musuvo jaro jakawa pasi.
Iyena wakaphwanya-phwanya no kugura-gura mugogo jaro.
Mambo waro no vatungamiriri varo, vari pakati po majinja.
Apana mutemo, pikija no vaporofeti varo, apana zvavari kutatijwa ndi Jehovha.
י [Yodhi]
10 Vakuru vo dhorobha ro Ziyoni, vanogara pasi vakanyararisa.
Vanodira mavhu mu musoro vosimira mapendera o saku.
Vasikane vo* Jerusarema, vanokotamisa musoro mbhera pasi.
כ [Kafi]
11 Majiso angu aremba kucema.*
Maura angu ari kuvhunduka.
Ciropa cangu ciri kukuturihwa pasi ngo ndava yo kupejwa ko mwana wokaji wo vandhu vangu,Ngo ndava yo vana vadoko no vana vatete vari kuzirika mu ndau yakazara vandhu mudhorobha.
ל [Ramedhi]
12 Pavanonga vecizirika mundau jinozara vandhu mumadhorobha, inga vandhu vakakhuvazika;Pavanonga vecifa munyara jo majimai akona;Ivona vanovhunjisa majimai avo kuti: “Zvokuha no zvokumwa zviri kwapi?”
מ [Memi]
13 Ndingashandisa cinyi inga capupu?
Nandi mwana wokaji wo Jerusarema, ndingakuezanisa naani?
Nandi mbhandwe yo Ziyoni, ndingakuezanisa naani kuti akuembezere?
Ngokuti matambujiko ako akakura maningi inga jombe.
Ndiyani angakurapa?
נ [Nuni]
14 Zvivoniso zvakava no vaporofeti vako ngo pamusoro pako, zvainga zvokunyepa, zvicikashandi,Ivona vakaviga zvishaishi zvavo, izvo zvaizotama kuvaendesa kuuranda.
Asi vakaenderera mberi vecibhuya zvivoniso zvokunyepa no zvinocengeja.
ס [Sameki]
15 Ngo ndava yaro, vese vanofamba ngo gwanja, vanoriseka vecitaka nyara.
Vanorija mundozva ngo kushamaisika, vojunguja ngo ndava yo dhorobha ro Jerusarema veciti:
“Kunanga kuti ndirona dhorobha rainangwaya kuti: ‘Irona rakaseja* maningi no kuviisa mudakaro kuvandhu vese vanogara pasi pano’?”
פ [Pe]
16 Vavengi vako vese vanokushamisira muromo.
Vorija mundozva, vogedagedesa meno veciti: “Itusu tamuvhavhura.
Iyi injiku yataiimira! Iyona yaguma, tiri kuzvivona!”
ע [Ayine]
17 Jehovha wakaita zvaaida, wakaita zvaakagondesa,Zvaakananga kare kamare.
Wakaphwanya acina pena.
Wakatendera kuti muvengi wako adakare ngo ndava yako,Wokuja simba ro vavengi vako.
צ [Tsadhe]
18 Nandi mupfimbiji jo dhorobha ro Ziyoni, mwoyo jo vandhu jiri kukhuwira* Jehovha.
Musoji ngajiderere usiku no masikati, inga kumwa inopopoma mumagomokomo.
Ucazorora, nee majiso ako acazorora kubuda musoji.
ק [kofe]
19 Mukai! Khuwai* no usiku panotanga nguva jo kurinda.
Dururai mwoyo wako inga kumwa pamberi pa Jehovha.
Musai mukono jako uite mukumbiro ngo ndava yo upenyu hwo vana vako,Varikuzirikari ngo njara mumativi ese.
ר [Reshi]
20 Nandi Jehovha, vonanyi, sotanyi vandhu vomakasvuzvunura.
Kunanga kuti vanakaji vaidikana kuha vana vavo, vana vano uhomi hwaushoni vavakabara here?
Kana kunanga kuti vapiri no vaporofeti, vaidikana kuurawa mu ndau yakacena ya Jehovha here?
ש [Shini]
21 Majaha no madhodha apera kufa, vakati ndha-ndha-ndha mumakwanja.
Vasikane vangu* no vafana, vakauraiwa ngo banga.
Imwimwi makavauraya mu njiku yo ushungu hwenyu, makavauraya mucina no pena.
ת [Tawi]
22 Imwimwi munounganija zviro zvinothyisa kuvha kumativi ese, inga zvinoithwa pa njiku yo mabuso.
Pa njiku yo ushungu hwa Jehovha, apana mundhu wakaphojomoka nee kupona,Vandakabara no kurera, muvengi wangu wakavapeja.
Masoko o Pasi
^ Kana: “kunyara.”
^ Kana: “sidhadhi yo.”
^ Kana: “Wakavhavhura zvirindo zvese.”
^ Kana: “jo zvirindo.”
^ Kana: “vakamima.”
^ Gama ngo Gama: “Mbhandwe jo.”
^ Kana: “kurira.”
^ Kana: “rakanyara.”
^ Kana: “kumimira.”
^ Kana: “Mimai.”
^ Gama ngo Gama: “Mbhandwe jangu.”
