Ndumbo yo Ciriro 3:1-66
-
Jeremiya anonanga mazwiro ake no vetero yake
א [Arefi]
3 Ndini ndakavona dambujiko ngokuti Mwari wakatitambuja ngo ushungu hwake hwakakura.
2 Iyena wakandigogomera wondifambisa pa cidima,* kuciripi pa ruvheneko.
3 Kunasa kunanga, iyena anomusa mukono wake kuti andihwise mukuvo wese, njiku yese.
ב [Bheti]
4 Iyena wasakaja nyama yangu no ganda* rangu,Wophwanya maphondo angu.
5 Iyena wanditendeneja, wanditendeneja ngo nvenene inovava no zvineso.
6 Iyena wakandivangirija kuti ndigare mu ndau ino cidima,* inga vandhu vakafa kare.
ג [Gimeri]
7 Iyena wakanditendeneja ngo mupfimbiji, kuti nditame kuphojomoka,Wondisunga ngo magaragajero anorema akaithwa ngo utare.
8 Pandinoperehwa ngo mazano, ndokumbira kubeswa,Iyena aazwi mukumbiro wangu.
9 Iyena wakafunga makwanja angu ngo mapuwe akacecwa,Wopeyamisa makwanja angu.
ד [Dhareti]
10 Iyena anondifindarira* kuti andihwise inga ursu, inga mbhondoro yakafindara.
11 Wakandibudisa mugwanja wondiguragura.
Wondisiya ndiri ndega.
12 Wakakunga uta hwake wondipontiyari kuti andifure.
ה [He]
13 Mupasha jo uta hwake, wakajinghwinisa mu shingamo* jangu.
14 Ndiri kusekwa ngo vandhu vese, ivona vanoimba ndini njiku yese.
15 Iyena wakandizaja ngo zviro zvinovava no kundigutisa ngo muto unovava.
ו [Wau]
16 Anophwanya meno angu ngo zvimapuwe zvidoko,Anondiita kuti ndigare mu marota ndecithya.
17 Imwimwi munondivhisira runyararo, ndakanganwa kuti mudakaro icinyi.
18 Ndizvona zvinondiitisa kuti ndinange kudari: “Kukujwa kwangu kwapera, vetero yangu kuna Jehovha yaperavo.”
ז [Zayini]
19 Ceukijanyi kuti ndiri kutambujika ndicina pokugara,Ndiri kuha muti unovava no nvenene inovava.
20 Kunasa kunanga, imwimwi munozondiceukija, moviya kwandiri no kundibesa.
21 Inini ndinonasa kuzviziva izvi mu mwoyo mangu; ndizvona zvinondiitisa kuti ndiimire ngo kusengerera kwese.
ח [Heti]
22 Rudo hucikacinji huna Jehovha, ndihwona hwaitisari kuti titame kuurawa,Ngokuti usizi hwake ahuperi.
23 Ngokuti ihwona hunoita hupsa mangwanani ese,Kugondeka kwenyu kwakakura.
24 Ndakati: “Jehovha ndiyena mupocero wangu,” “ndizvona zvinondiitisa kuti ndimuimire ngo kusengerera kwese.”
ט [Teti]
25 Jehovha wakanaka kuna wiya anomuimira,Kuna wiya anoenderera mberi ecimupsaka.
26 Zvakanaka maningi kuti mundhu aimire ruponeso hwa Jehovha akanyararisa.*
27 Zvakanaka kuti mundhu athware kanga aciri mujaha.
י [Yodhi]
28 Mwari paanomuthika kanga, iyena ngaagare ega pasi akanyararisa.
29 Iyena ngaakotamise kumeso kwake pasi, kangaije vetero inonga iciripo.
30 Ngaape dama rake ku mundhu anomutaka, ngaatukwe maningi.
כ [Kafi]
31 Ngokuti Jehovha aazotisiyi mbhera narini.
32 Pikija iyena wakatisvuzvunura, anozotiitira usizi ngo ndava yo rudo hwake hucikacinji.
33 Ngokuti mwoyo wake, audi kuitisa matambujiko kana kusvuzvunura vana vo vandhu.
ל [Ramedhi]
34 Mwari aatenderi kuti mundhu acikecike vandhu vese vakasungwa pasi pano,
35 No kurambira mundhu kuita zvakanaka pamberi po Mukuru-Kuru,
36 Pomwe no kucikirira mundhu pakutonga ndava yake.
Jehovha aatenderi zviro izvi.
מ [Memi]
37 Ndiyani angavereketa no kuitisa kuti izvi zviitike acizivi kuvhunjwa ndi Jehovha?
38 Pamuromo po Mukuru-Kuru,Apabudi zviro zvakashata pamwepo no zviro zvakanaka.
39 Ngenyi mundhu ari penye angan’gun’guta ngo muviyo wo zvishaishi zvake?
נ [Nuni]
40 Ngatipopore no kunasa kusota makwanja edu, tihwirire kuna Jehovha.
41 Ngatimuse mwoyo jedu no nyara jedu kuna Mwari wokudenga teciti:
42 “Itusu takashaisha no kupanduka, imwimwi amuzivi kutiregerera.
ס [Sameki]
43 Ngo ushungu, makatirambisa kuti tikhwedere phedo na imwimwi.
Makatitevererazve no kutiuraya mucina pena.
44 Imwimwi makaramba kukhwederehwa mecishandisa gore kuti mukumbiro jedu jitame kupinda.
45 Munotiita svina no duru pakati po vandhu.”
פ [Pe]
46 Vavengi vedu vese vanotishamisira muromo.
47 Nguva jese, tiri kuthya no kutambujika, tiri kupejwa no kugara ticina ciro.
48 Majiso angu, ari kupopoma kumwa ngo ndava yo kupejwa ko dhorobha ro vandhu vangu.
ע [Ayine]
49 Majiso angu, anocema* acikazorori, nee kuima.
50 Mbhera Jehovha avone pasi ari kudenga.
51 Majiso angu, ari kundihwajisa pandinovona vana vokaji vo dhorobha rangu.
צ [Tsadhe]
52 Pacina thangwe ririrese, vavengi vangu vakandinyanga inga shiri.
53 Vakanyaraja upenyu hwangu mugomba, vondifura ngo mapuwe.
54 Kumwa yakaboboja musoro wangu. Inini ndoti:“Ndazotopera!”
ק [kofe]
55 Nandi Jehovha, ndakadaninja zina renyu mugomba rakajika.
56 Izwanyi izwi rangu, mucafunga njeve jenyu, pandinonga ndecikhuwa* kuti ndibesehwe no kuponeswa.
57 Imwimwi makakhwedera pa njiku yondakamudaninja moti:“Ucathya.”
ר [Reshi]
58 Jehovha makandiinikira pa ndava yangu, mondiponesa.
59 Jehovha, makavona zvakashata zvondakaitihwa,Ndapota, ndiitirenyi zvakanaka.
60 Makavona kundihwirijira kovakandiitira, zvese zvovakaronga kundiitira.
ש [Sini] kana [Shini]
61 Jehovha, makavona kutukwa kwandakaithwa ndivona, zviro zvese zvakashata zvavakaronga kundiitira.
62 Magama o vavengi vangu no mapope ovakandirongera pa njiku yese.
63 Vavonenyi basi, vakagara pasi kana vakaima, vanondishora ngo ndumbo javo!
ת [Tawi]
64 Nandi Jehovha, munozovahwirijira mukuzwirana no zviito zvavo.
65 Munozovatuka ngo kutindivarisa mwoyo javo.
66 Imwimwi munozovateverera ngo kunyangajwa kwenyu,Mozovapeja pasi po denga renyu Jehovha.
Masoko o Pasi
^ Kana: “pa cirima.”
^ Kana: “dovo.”
^ Kana: “cirima.”
^ Kana: “anondivandira.”
^ Kana: “ndhengero.”
^ Kana: “ngo kusengerera kwese.”
^ Kana: “anorira.”
^ Kana: “ndicimima.”
